الشاعر : ابن نصار
الوزن : النصاري

صورة الشاعر
اسم الشاعر : ابن نصار
حملات سيد الشهداء وشجاعته ومصرعه الأليم
وهي عدة قصائد من ضمن ملحمة النصاريات

الحملة الأخيرة لسيد الشهداء ومصرعه (النصاريات 11-13)


الحملة الأخيرة لسيد الشهداء

ليش الموت الاحمر راغ واصفَر
أثاري احسين للميدان سدّر

سدَر واعلن ابحد السيف ناره
او لعنان السما ثوّر شراره
خلّه الليث ما يندل افراره
يفر ويجيه موت امنين ما فر

تفر اگرومها او يحمل عليها
يحوم الها او يحوم الموت بيها
اشچم حرّان ذبه عند اديها
او خلى الخيل بالهامات تِعثَر

فل اجموعها او لفّ الروايا
ابسيف الرّضع من ثدي المنايا
شگ الزلم والخيل السبايا
چِدَسها او ذب الازرگ فوگ الأحمر

صك الخيل وادعى الخيل طشّار
ابسيفه للدرع والطاس فزّار
رد العود سوّه الصار ما صار
او چبده امن العطش ويلي تفطّر

دار العسكر على احسين يا حيف
ناسٍ بالرماح او ناس بالسيف
يشبه دورها على الليث المخيف
بياض العين بصبيها ايتدور

دار العسكر على احسين وافتر
او صار اشبيح للنشاب مَكوَر

تلگّه انبالها احسين ابوريده
نوبٍ بالضلوع او نوبْ بيده
تلايم غيمها واثجل رعيده
او بالزانات فوگ احسين يمطر

ثگل ما يندره ابنشابها امنين
يجيه وزانها يخطف على احسين
سهَم بيده او سهْم ابحاجب العين
يويلي وافغرت روحه امن الحر

صار اشبيح بيه امن المنيه
ألف نبله يويلي او تسع ميه
وگف تبّة نبِل بالغاضريه
او زور ارماح شابچ عيب ينطر

اوچب يستريح احسين ساعه
ضعف حيله او ثگل بالسيف باعه
رن الحجر من وجهه ابشعاعه
او دمه مثل ماي العين فجّر

شال احسين ثوبه يمسح الدم
اولن سهْم المْحَدّد ناجِع ابْسم
ابگلبه وگع لا وخّر او جدّم
هوه واظلَم هواها والسّما احْمَر


الحسين يسقط من ظهر جواده

ليش اظلم هواها والسّما احْمَر
اثاري احسين من فوگ المهر خَر

يرضنا اليوم ميدي اويا سما مور
او بعد احسين يا ماي البحر غور
يا گلبي دذوب او يا دمع فور
او يا چبدي على افراگه تفطّر

هوى والمهر گام ايحوم دونه
يحامي عن وليّه من يجونه
خاف الگوم لنهم يا خذونه
او يرُكْبَه غير خياله المشكّر

عگب ما آيس الطمّاع منّه
رد روعه اوراح الخوف عنّه
صهل واعول اوحنّ او جذَب ونّه
سحَب صرْعه او لعِنْد احسين سدّر

اجنح فوگ راعيه او شمه
او صار اظلال دون الشمس يمه
مرغ وجهه او ناصيته ابدمه
او نادى بالظليمه او للخيم فر

بچت سكنه او نادت بالمذلّه
يعمه المهر حط بالگلب علّه
طلعت صارخه زينب تگلّه
يمهر احسين وين احسينا خَر

يمهر احسين وين احسينا خر
اشمالك روعت گلبي يمكْدَر

يمهر احسين وين احسين گلّي
اشوفك جيتني تصهل ابذلي
خلاف احسين گلّي وين اولّي
او مالك روعت گلبي يمكْدَر

يمهر احسين گلي عن وليّي
بعد فيّه يخايب بيش افيّي
اشچم اصواب گلّي ابگلْب اخيّي
او من يا جرِح دمّه ايفوّر اكثر

اهنا گلّي يصير اعلاج لحسين
أفت گلبي وَاذرْ جرْح الگلب زين
وانگّط فوگ جرحه ابدمعة العين
بلچي اصواب اخويه احسين يخدر

گام ايهَمِّش اصْفاحَهِ ابسنّه
يدگ بالگاع رجله او يجر ونّه
وابّباب الخيم رجليه ثنّه
دگ راسه او سالت دمْعِته او خر

فرن يمه ايجَلْبَن اجروحه
ابگَلُب خفّاج او عبره سفوحه
لگنّه ايلوج ويعالج ابروحه
يون واصواب گلْبه دم يفوّر


العقيلة عند مصرع أخيها

اجت زينب تصيح: الله واكبر
يخويه: ليش هالنومه ابها الحر

بچت زينب او نادت يا وليّي
ينور العين يا عگلي واخيّي
يخويه الصبر من بعدك امعيي
عليه او نار فگدك دوم تسعر

يخويه من ضرب راسك ابسيفه
طعن گلبك ابرمحه واخذ حيفه
او ما خلّه ابروحك بس اطريفه
خفيّه او شالها الموت المگدّر

يخويه من سمعْت المهُر يصهِل
تخيّلتك ابجود الماي مجبل
أصد لن المهر محْرِب او مُعوِل
جالب عدّته والسّرج يصفِر

على امصابك لحرم لذّة العيش
بعد فگدك يخوي احسين ما عيش
يخوي اصواب كلمن مات بالريش
او جرحك بالگلُب يحسين يسعر

على امصابك لجيمن دوم نوحي
يعيني بالدموع اليوم سيحي
امصابك يا اعيوني شعَب روحي
لونّه بالصخر ذاب او تفسر

تصيح ابصوتها يحسين وينك
يخويه جاوب او صِدلي ابعينك
يخويه ذاب گلبي من ونينك
يخويه موش گلبي صخَر مرمر

فك عينه او زرگها او شِبَح ليها
او حن او خرّت ادموعه عليها
ولمَن صدّت لعِد دمعة وليها
ليلو فوگ جرحه يجلب احمر

فك احسين عينه والدمع خر
ليلو فوگ جرحه يجلب احمر

ناداها ابضعيف الصوت يختي
مهو حچيچ شعب گلبي دسكتي
ينور العين خليني ابمهجتي
اعالجها ترى گلبي تمرمر

بچت عنده او صاحت له يعگلي
يروحي او نور عيني او باجي اهلي
يخوي احسين شتهيس دگلّي
يخويه يا اصواب اليوجع اكثر

يگلها اصواب البوجهي بهضني
والِبراسي حمَس چبديِ او فتني
والبضلعي بهض حيلي او ضَهَدني
والِبگلبي يخويه يوجع اكثر

يخويه يابس امن العطش چبدي
يخويه والترابه احرگت زندي
يخويه والشمس ذوّبت خدي
دفيّي لي ابردن ثوبچ امن الحر

يخويه ما أحب سكنه تجيني
تشوف اجروحيِ او تسمع ونيني
مالي گلْب اشوفنها ابعيني
ذليله ما لها واليِ الينغر

يخويه لا تلوعي الگلُب بالله
وببنيي علي هلّةٍ هالله
يخويه مِن بعَد عيني الكم الله
واذكريني او كل امصاب يزغر

يحاچيها او تصب عينه ادموعه
لن گلبه انخطف واحنت اضلوعه
غُمَض عينه او صارت بيه موعه
هوَت فوگه او دمعها اعليه ينثر

تشم احسين واتجلب ابجرحه
او لن الشمر يدفعها ابرمحه
گومي يو اذبحچ فوگ ذبحه
واخليها ابطول الدهر تذكر


المصرع الأليم

بالله يا شمر عنه دوخّر
اذبحني وخل اخوي احسين واسْدِر

تگله يا شمر بالله دخلّيه
او ماشافه امن الطبرات يكفيه
تشوفه ايلوج ما غير النفس بيه
او عينه نوب يشبحها او تغمر

دگلّي يا كتر خالي امن الجروح
تحط سيفك يخايب والدم ايفوح
طبره فوگ طبره تشعب الروح
يشوغ الگلُب من عدها او يفغَر

يخايب خلي اخويه احسين ساعه
أغمّضله وامد للموت باعه
مهو شمامة الحلوه اطباعه
دخلّي ابراح روح احسين تظهر

يخويه بيش اضمك وين اوديك
يخويه اشلون اصد عنّك واخلّيك
تراني اتحيّرت يا مهجتي بيك
يخويه بيش اظلّل لك امن الحر

هوت يمّه تشم كسر البضلعه
أخوي الما طبُع يشبه الطبعة
غابت روحه او فزّت تودعه
اولن راسه براس الرمح مِزهر


اترك تعليق

avatar
  Subscribe  
نبّهني عن