الطفل الرضيع
طفل احسين ظامي والوكت حر
أويلي امن العطش چبده تفطّر
تگله الطفل راح اللون عنّه
يبويه ما بگت بالطفل ونّه
جف دمعه او جف اللبن منّه
او ظل يلوج بلسانه او يفغَر
يبويه ما ابعيني دمع واسجيه
لونّ الموت يرضى الساع لفديه
يبوي شوف شمسوي العطش بيه
يبويه امن العطش چبده تفطّر
گامت شالته او جتّ الوليها
فك اعوينته يبحّر عليها
تخيّل جايبه اميه بديها
شاله احسين ودموعه اتّنثر
گامت تستدير اعيون طفله
شبح عينه لبوه اوعين لهله
أيس شاف اميّه ما حصل له
رد غمّض اعويناته او سكّر
شمه او حبه ابصدره او خده
او چبد احسين يابس مثل چبده
يبويه ما بعد للعيش رده
اهو ايحاچيه اولن سهم المگدر
طاح الطفل للگاع او تعفّر
او دمه مثل ماي العين فجّر
تلگه احسين دم الطفل بيده
اشحال اليِچْتَل ابحضنه اوليده
سال او ترس چفّه من وريده
او ذبه للسما او للگاع ما خر
اويلي من لفت سكنه تنادي
يبويه العطش هالفتّت افادي
صدت لن اخوها الطفل غادي
يلولح رُگبته او دمّه يفور
يبويه ذاب چبدي او چبدة امه
دخلّيني اودعنه واشمه
يبويه ليش ما تسجيه دمه
بلچن چبدته تبرد امن الحر
يخويه عون من حبك او شمّك
يخويه عون من راواك لامّك
لغسلنك يخويه ابفيض دمّك
او گبرك بالگلب يا خوي لَحْفر
گام احسين يمشي يم الأنصار
وگف يمهم او چبده امن العطش نار
نده عباس خويه والدمع فار
يخويه گوم لينه الساع واحضر
اترك تعليق