الشاعر : ابن نصار
الوزن : النصاري
الموضوع : القاسم

صورة الشاعر
اسم الشاعر : ابن نصار
قصيدة في شجاعة القاسم بن الحسن عليه السلام ومصرعه
وهي ضمن ملحمة النصاريات

القاسم بن الحسن (النصاريات 6-13)


في محاربة القاسم وشهادته

طلع جاسم يصيح: الله واكبر
درخصني يعمي مگدر اصبر

بس شافه شبگ فوگه او تباچوا
اختنگوا بالبواچي او ما تحاچوا
لمن غابت الروح او تتاچوا
على التربان ويلي والوكت حر

ومن ردّت الروح ابعمه او بيه
طلب جسام رخصه او ما يخليه
وگع ويلي يحب ايده او رجليه
درخصني يعمي مگدر اصبر

يگله ابگه لبن عمك تباريه
عليل او ما بگه غير النفس بيه
يعمي اخلافنا بلچن تسليه
واظن هيهات يتسلى او يستر

تگلي اسدر يعمي للصواوين
امن اگلك راد ليها چذب يحسين
أرد عنك دعلمني ابيا عين
واشوفنك على الرمضا امطبر

يگله يا گمر بيتي يشعاع
يعمي اوداعة الله هذا الوداع
ركب وارزم او ذبها موش مرتاع
شهاب او يحرج الطاغي امن ايخر

عرض للحرب جسام واشهر
شهاب او يحرج الطاغي امن ايخر

جر السيف والزانه نكثها
او طفّح على الملزمومه او فرثها
جثث بالروس والروس ابجثثها
اسم الله عليه خلاها اتعثّر

تبردگ فوگ مهره او گال يومي
او گال لزانته اعله الخيل حومي
رفها او گال للرايات گومي
عن دربي وصيري اتياه بالبر

يخز عين الطليع وگال ثجّل
ابظلمه والمذهّب واج مِشعل
من يلمح شعاع السيف يثوَل
احمام او من يشوف الطير يصگر

من يدنه او عزرائيل بيده
غيث او من صواجعها رعيده
گانوص او تلولح على الصيده
ابظهْر اشگر شُمَر فرْسَه امسَفِّر

انگص اشراك نعله اوگام يلويه
والازدي اجاه والسيف مخفيه
ضرب راسه او جاسم ما درى بيه
خرّ او صاح يا عمي المشكر

علي ابن الحسن يا گلبي تِفطر
خرّ او صاح يا عمّي المشكّر

بس ما سمع صوته شرعبت بيه
چتل چتال جسام او سدر ليه
لگاه ايعالج او يبحث ابرجليه
يلوج ابروحه او دمّه يفوّر

بچه او ناداه يا جاسم اشبيدي
يريت السيف گبلك حز وريدي
هان الكم تخلوني اوحيدي
على اخيمّي يعمي الخيل تفتر

يعمي اشگالت من الطبُر روحك
يجاسم لا تراويني اجروحك
لون ابگه يعمي چنت انوحك
ابگلب مثل الغضا وابدمع محمَر

حط احسين صدره ابصدر جسام
شبگ فوگه او شاله اليم الخيام
صدره ابصدر عمه او خط بالجدام
بالتربان واحسين ايتعثّر

جابه او مدده ما بين اخوته
بچه عدهم يويلي وهم موته
بس ما سمعن النسوان صوته
إجت سكنه تصيح: الله واكبر

إجت سكنه تصيح: الله واكبر
يجاسم ليش هالنومه ابها الحر

عسى ابعيد البِله خدك على الگاع
يجاسم موش وكت الموت هساع
يجاسم يبن عمي لون تنباع
ابماي العين چنْت اشريك يا حُر

عساهي ابرگبتك كل الخطيه
تخليني غريبه واجنبيه
يا جاسم عرِس اگشر عليه
عريّس او يزفونك امطبر

امبارك بين سبعين الف جابوك
ابدال الشمع بالنشاب زفوك
عنِ الحنه ابدم الراس حنّوك
على راسك املبس نبِل ينثر

يجاسم ليت هالطبرات بيه
يجاسم گوم ريت الموت ليه
صدگ رايح يجاسم هاي هيه
تخليني اون الليل واسهر

اجت زينب او دمع العين غدران
او صدت للخيم نادت النسوان
گومن جاي نلطم على الشبان
تهاووا مثل مهوى النجم من خر


 

اترك تعليق

avatar
  Subscribe  
نبّهني عن