في محاربة علي الأكبر وشهادته
شنّ اطرادها ابن احسين الأكبر
او خلّه الخيل بالهامات تعثر
امصيت هلهلت له الخيل لو لاح
عليها او صفّگت له اطراف الارماح
ورگصت له السيوف ابروس الاگراح
او فوگ الطوس دگت ضرب الاگشر
من هاشم امنتب موش ملفوف
ابوه احسين بالميدان موصوف
او جده حيدر الكرار معروف
او عمه الحسن والعباس الازهر
اهتز ابغيرة الله وفرّع الراس
تبارگ بالوجه والدرع والطاس
او سيفه الشعشعاني المرهب الناس
او بالخيل الگلايع ضيگ البر
اشچم حرّان من غدارته نس
مهو ابن احسين ضرب السيف اله او بس
ابرمحه اشچم عجيد اصياح لبّس
او خلاها ابجماجمها اتعثّر
تموج الخيل من يجبل عليها
چن الخيل أبو الحسنين بيها
ذب هذا وره او هذا لِديها
مِساميها ورمحه يلحگ الفر
شباب ولا يهاب الموت طفاح
ابسرج عالي طويل الظهر نفاح
أرْضَه السيف واطّه شرطْ الارماح
اورد ايلوج بلسانه او يفغر
مض العطش بابن احسين الأكبر
او رد ايلوج بلسانه او يفغر
يصيح ابصوت فت گلبي او شعبني
يبويه گوم ليه العطش ضرني
يبويه درعي او طاسي بهضني
يبويه او نشفت ارياگي امن الحر
يبويه شربة اميه لچبدي
اتگوّه وارِد للميدان وحدي
يبويه انفطر گلبي وحگ جدي
العِطش والشمس والميدان والحر
يگله امنين اجيب الماي يبني
مهو حچيك بهض حيلي او شعبني
وفت روحي او حمس چبدي او ضهدني
يبوي استخلف الله العمر واصْبِر
يگله والدمع بجري امن العين
يبعدي او بعد كل الناس يحسين
تگلّي اصبر او گلبي صار نصين
اشلون اصبر يبويه والصبر مر
حن احسين ويلي او سال دمعه
على ابنيّه يويلي او كِسر ضلعه
دار ايده على اطواگه يودعه
يشمه ودمعه امن الحزن محمر
تسايل بالدمع لوداع الأكبر
ويگلبي ذوب لوداعه او تفطر
يويلي من تلاگوا عند الوداع
امشابگ طول لمن هووا للگاع
لاع ابنٍ لبيّه والأبو لاع
على ابنيّه يويلي اوداع الاگشر
يشم احسين خد ابنه او يحبه
او دمعه مثل دمع ابنه يصبه
والنار اللي ابگلب ابنه ابگلبه
يخفيها على ابنه او نوب تظهر
يگله والدمع بالعين دفاگ
ابعبره امكسره وابگلب خفاگ
يبويه اوداعة الله هذا الفراگ
يبويه اشبيدنه هذا المگدر
يبويه للسيوف اسدر او للزان
او لُوح ابغارتك واشلش الميدان
يبويه اليوم مرواحك لِلجْنان
او بالكوثر يبوي اليوم تِفطر
تحسر ويل گلبي وجذب ونّه
او منّ الماي آه انگطع ظنّه
عرف لنّ المنية دنت منّه
جره دمعه او للميدان سدّر
شبل احسين للميدان سدّر
او خلّه الخيل بالهامات تعثَر
سدر والكون شابچ زان واسيوف
نشّاب او نَبِل وارماح واحتوف
ما والله رجف گلبه امن الخوف
ولا وجهه من اشراگه تغيّر
رد اسيوفها والنبل والزان
حِطيبَه والگروم اوجوه نسوان
شبل طاوي او نفج من شيب غِيلان
او شاف الغنم بالمران تِجْتَر
هز غدارته او ذبّ العمامه
نِشر راسَه اسم الله اعله النشامه
خز اگلوبها او شرّگ الهامه
او لَف راياتها وللسّرب نشّر
روّط زانته والموت بيها
او حزّ ارگابها او حوّم عليها
يا مبعد أهاليها عليها
وين اتفر او طير الموت يفتر
عگب ما شرّگ الهامات والطاس
اجتّه ضربة العبدي على الراس
ضعف واتواردو بسيوفها الناس
شبگ عالمهر ويلي والمهر فر
على ابن احسين يا گلبي تفطر
شبگ علمهر ويلي والمهر فر
شبگ عالمهر لبّاله يودّيه
لبوه احسين عنّ الگوم يحميه
أويلي المهر للعدوان فر بيه
وأوچب آه بِموسط العسكر
داروا بالسيوف عليه والزان
مثل چتال سبع المات فرحان
عسى ابعيد البلا وليته العدوان
أراذل بالمعايب دوم تفخر
هذا يگطع ابسيفه وريده
او هذا بالخناجر فصّل ايده
او هذا يغط من رمحه الحديده
ابخاصرته وهو يعالج او يفْغَر
ثگل بيه الطبر وتلوج روحه
اومحد عرف غير الله اجروحه
دِمَاياته على احصانه سفوحه
لمَن خرّ ابهناديها اموذّر
نده يحسين هذا الساع جدي
سگاني الماي واروى عطش چبدي
يگول اسرع تراك اليوم عندي
أويلي احسين صاح: الله واكبر
أويلي احسين صاح: الله واكبر
يبوي ليش هالنومه ابهالحر
گعد عنده او شافه امغمض العين
ابدمّه سابح امترّب الخدين
متواصل طبُر والرّاس نصّين
حنه ظهره على ابنيّه او تحسّر
يبويه گول منهو الشرگ راسك
ينور العين من خمّد انفاسك
يعگلي من نهَب درعك او طاسك
يروحي اشلون اشوفنّك امطبّر
يبويه من عدل راسك او رِجليك
او من غمض اعيونك واسبَل ايديك
ينور العين كل سيف الوصل ليك
گطع گلبي او لعند احشاي سدّر
يبويه من سمع يمّك ونينك
من شبحت لعند الموت عينك
للعشرين ما وصلن اسنينك
او حاتفني عليك الدهر الاگشر
اريد امسح اجروحك واشم خدك
واحط صدري على صدرك ووسدك
ما راعوا يبويه حرم جدك
واجت زينب تصيح: الله واكبر
اجت زينب تصيح الله واكبر
يعمه ليش ها النومه ابها الحر
هوت فوگه تشم خده او تحبه
او تِطبُگ طبرة الراس او تعصبه
او تسفِر زيج ثوبه او تجس گلبه
لگت دمه من افادّه يفوّر
يويلي ولولت واحنت ظهرها
تِخَمش اخدودها واتِشِد شعرها
وتدگ ابراسها وتلطم صدرها
او تنعى ابصوت طر گلْب الصخر طر
يشمس الگيض ياليلهب وهجها
يبدر التم يالمطفي سرجها
يسم الخيل يالمِچثر مرجها
اشلون امِنْ السرج تنشلع واتخر
ينجم اسهيل يالحامي الشرايع
يا جرناس يمعذب البراجع
يشبل الموت يمْكَدْر الطلايع
اشلون امسيت للنشاب مَكْوْر
خويه احسين وين ابنك تگنطر
دليني يخويه اعله المشكّر
خاف المهر من ذبّه تعوّر
گال الها يزينب راح الأكبر
ردها احسين للصبوان بالهم
او شاف الخيل دارت عالمخيم
اولن ابن الحسن جسام مجدم
يصبح ابصوت عالي: الله واكبر
اترك تعليق