في شجاعة العباس ومصرعه
أبو فاضل تلولح فوگ الاشگر
ليث او هاج من شِيبه امعفّر
نزل عباس يتمرضع بالحسين
يحب ايده او جدم رجليه والعين
تسايل بالمدامع على الخدين
لما حن او بچي احسين او تحسر
صاح احسين يا خويه يعباس
ينور العين يا تاجي على الراس
يخوي انت الدرع والسيف والطاس
اشلون اتروح وانا ابگه امحير
يخوي احسين يا زهرة ايّامي
يخوي نحّلت سكنه اعظامي
دخليني أريد الحگ عمامي
اريد الثار گلبي دم يفور
يگله اوداعة الله يا عيوني
نيتكم اوحيدي تخلوني
ركب وارزم وگلهم تعرفوني
طليعة حيدر الليث المشكر
تشعشع بالحرب عنده الحرب عيد
سم ابصاجعه او طاحت امن رعيد
يحسب السيف مبسم والنبل غيد
تتماوع او عج الخيل عنبر
عروس الحرب والعباس عريس
ايبتختر بين زفافه ملابيس
نكس وارعب اگلوب المداليس
او طفحها كفوا نعمين واكثر
شمّر فوگها او خلّه المداريع
ما تعرف رِسِنها امن المصاريع
تهاوت واخلست بين المشاليع
تخاف ارواحها امن الموت الأحمر
گلب يمنه الحرب من فوگ يسراه
او يسره الحرب ذبها فوگ يمناه
لوه الجنحين فوگ الگلب ولْواه
عليهم والعزيز الروح من فر
حرُب عباس مِن صَحَّه او يعرْفه
بيده السيف والبيرگ ابچفه
او بيده الرمح والجربه ابچتفه
مترهي تلولح على العسكر
يحاچي النفس يا نفسي تهونين
كل الناس تغدى فدوه لَحسين
ألف وسفه يخويه مالك امعين
تظل بعدي يبو سكنه امحير
ابو فاضل وِله الشاطي او حدّر
او چبده من لهيب العطش فطّر
خاض الماي بس هيّس ابّرده
ترس چفه يروّي عطش چبده
تذكر لن اخوه احسين بعده
ذب الماي من چفه او تِحسر
هذا الماي يجري ابطون حيات
واضوگه گبل اخوي حسين هيهات
واظن طفله يويلي امن العطش مات
وظن موتي گرب والعمر گصّر
اشلون اشرب وخوي احسين عطشان
وسكنه والحرم واطفال رضعان
واظن گلب العليل التهب نيران
يريت الماي بعده لا حِله او مر
همْته بس يِوَصْل الماي لَحسين
لا گامن ولا گعدن الچفين
همْته اطفال موتى بالصواوين
عطاشا اگلوبهم تلهب امن الحر
طاح ايمين ابو فاضل والايسر
خطف جوده ابحلگه او للخيم فر
اجاه السهم للجربه او فِراها
وگف يبچي او سكنه ما نساها
مواعدها على اميه لحشاها
او منها يستحي للخيم يسدر
سمع حسّه الحسين او ركب وارزم
غار اعله العدا من بابِ لِخْيَم
رد يمّه او شافه سابح ابدَم
تخوصر فوگ راسه والدمع خر
حط راسه ابحضنه او راد الوداع
شاله او ترَّبَه عباس بالگاع
رد احسين راسه ابگلب مِرتاع
شاله اردود للتربان والحر
يخويه العلم گلي وين اوديه
ينور العين دربي بيش اجدّيه
انحنه فوگه يشمّه واشبَچ ايديه
عليه او صاح: خوي الله واكبر
يخويه انكسر ظهري او لا اگدر اگوم
وصرت مركز يخويه الكل الهموم
يخويه استوحِدوني عگبك الگوم
ولا واحد عليه بعد ينغر
يخويه امنين اجتني هالرميّه
يخوي اسا وگع بيتي عليّه
يخوي اسا عدوّي شمت بيّه
وشوفنّك يبو فاضل امطبر
راد ايشيل اخيّه للصواوين
انتبه عباس لحسين او زرگ عين
يگله اشرادتك يا خويه يحسين
يگله أرد اشيلنك او أسدر
يخوي احسين خليني ابمچاني
يگله ليش يا زهرة زماني
يگله واعَدِت سكنه تراني
ابماي واستحي منها امن اسدر
يخوي اشلون اشوفنها ابيا عين
لو جتني او گالتلي الوعد وين
دخليني أموت اهناه يحسين
يخوي المستحه من شيمةِ الحر
گام احسين يبچي للصواوين
ينَشّف دمعِته عنّ النساوين
خايف لنهن ايْفقدن على احسين
او يگلّن له عليمن هالدمِع خر
او يلي تلگته تبچي اسكينه
تگله عمي العباس وينه
شرب ماي او نسانا ما نسينه
العطش واگلوبنا تلهب امن الحر
سالت دمعة احسين او تِنَحّب
او گالِلها أو نار الگلب تلهب
ابشاطي العلگمي عمّچ امترب
گضه، او فرت تصيح: الله واكبر
اترك تعليق