شجاعة بني هاشم ومصارعهم
أويلي من الانصار الخيم تصفر
بس اولاد هاشم نجِم تزهر
الكِل شبّان ما منهَه البْخَده
اختَط الشعر لا والله او جدّه
او بين ادرك ابلوغ او بين بعده
او بين البلمهد عطشان يِفغر
يويلي من تلا گوا عند الوداع
دروا ما بعد ملگه غير هساع
غدا ماي الدمع ينچال بالصاع
وتِگلّه اگلوبها امن العطش والحر
هذا يشبگ ابهذا او يحبه
او هذا ابگلب هذا يحط گلبه
او هذا دمعه الهذا يصبه
او هذا يشم خد هذا او يصفَر
أويلي غدت للشبان حنّه
غدا هذا الهذا يجر ونّه
او كل واحد لعد موته تمنه
ولا يبگه الهذا اليوم الاگشر
شهادة عبد الله بن مسلم بن عقيل
سبگ للحرب عبد الله بن مسلم
امنتَّب من ابوه النَّفِل والأم
شباب بن اهدعَش مِزراگ مِن سم
تلوّه او نِفج يِگْطر موت أحمر
إبن مسلم لعند الحرب شمّر
شباب او لا يخاف الموت مِسفِر
اسم الله اعليه فرّع بالذوايب
گمر لاچن ابليل الشَّعَر غايب
حاط الخيل وادعاها جنايب
او خلاها امروج اتروج بالبَر
يشع بسّام بالميدان مِسْوِد
او رجّف زانته والموت يِرعد
تنخه او گال: وِصلت لعد هالحد
لراويكم اليوم الموت الأحمر
ابن هاشم او شبل الليث معلوم
امجرّب والزُّمَط يِنعِرِف هاليوم
طفّحها او ذبها على الصمصوم
او رد الرمح بالهندي امكسّر
حُر يتخَطّف الزانات بيديه
او مِن يوصل الحدّه الموت يلويه
يجر سيفه والمگدر يشع بيه
او خاف الموت من عنده او كشّر
اجاه السهم بس تسمع رعيده
امنيشن گصّته ابرميَه شِديده
شِگف عن الوجه ويلاه بيده
سمرها الگصته او خلاه يفغر
يا گلبي لبن مسلم تفطر
شباب او مثل روح الطير من خر
عجز ويلاه من تحريك چفه
أيّس من حياته او رِكب حتفه
نِفَض ويلي عدُوّه اعليه شلفه
تكور مثل روح الطير مِن خر
عزيز الروح بالتربان ممدود
او دم السهم يجري فوگ الخدود
گمر لاچن ابدم اشرَگ او بِچبود
يوَسْفَه اعليه بالرمله امعفّر
شابح تحت عجّ الخيل عينه
ما ينشاف بس تسمع ونينه
يريد احد يغمضله اعيونه
أيّس وافغرت روحه من الحر
اشبيّب والهنادي وزّعنّه
وابدم الشهاده غسّلنّه
ابعج الخيل ويلي چفّننّه
او دِفننّه ابشعاع الشمس والحر
نزلوا بعد ابن مسلم الشبان
تنخوا واسفروا لمطالگ الزان
حاسوا خيلها وشلّوا الميدان
لمَن طاحوا تگول انجوم واتخر
طفل يخرج إلى الميدان
على الشبان يا گلبي تفطر
تهاووا مثل مهوى النجم من خر
بعدهم طلع طفل امن الصواوين
امطوّگ والتراچي على الخدين
يدير العين يسره او نوبه ايمين
طفل مدهوش يتلفت امذعَّر
چبده من لهيب العطش بورح
تراچيه على اخدوده تِطوطح
عليه السهم يا ويلي تلولح
ابوريده وگع لا جدّم او وخّر
ظلت شهربانه بس تولول
على التربان يا ويلي المدلل
طوگه بفيض دم نحره امبلَّل
فوگ الرمل تحت الشمس والحر
غدوا وسفه بني هاشم مطاعين
الجميع او موحشه منها الصواوين
ولا ناصر بگه منهم اويه احسين
بس عباس والجاسم والاكبر
اترك تعليق