في شجاعة الأنصار ومصرعهم
الكون اظلم ابعج الخيل واغبر
او شع ابلمعة الانصار وازهر
احتوف او هايجة ما تعرف الذل
اشلون اللي ابعرينه او هاج مشبل
اتّلوّه دون عزهه لَوْيةِ الصّل
ابزاغوره او نفج علموت الأحمر
كل لماع مِدْرع يشع للناس
وجهه والدرع والسيف والطاس
متبسِّم امشرعب ناشر الراس
كفو بالموت دون احسين مستر
اشچم حدّان من رمحه ايتطاير
تگول الموت من سيفه ايتگاطر
ما والله گرب ليه او تجاسر
صنديد او يظل بالكون يذكر
اشمحله من لفت ذيچ المشاهير
احلول الموت وحلول المغاوير
اظْلّم الكون بس لمع الغِدادير
تشع اوجوهها بالكون تزهر
لو صاح الحِريب او رجوا الزان
ما والله يظل بالكون حرّان
تغدِي اگرومها شي شفِت غزلان
ابمرتعها اسباع الزور تفتر
گضوا حگ العليهم دون الخيام
ولا خلوا خوات احسين تنضام
لَمَن طاحوا تفايض منهم الهام
تهاووا مثل مهوى النجم من خر
على الأنصار يا گلبي تفطر
تهاووا مثل مهوى النجم من خر
هذا الرمح بفّاده تثنّه
او هذا بيه للنِشّاب رنّه
او هذا الخيل صدره رضرضنّه
او هذا او ذاك بالهندي اموذّر
هووا ما بين من گطعوا وريده
وگع راسه او بين الطارت ايده
او بين امشَبِّح ابرميه شديده
او بين اصار للنشاب مَكْوَر
او يلي الروس شالوها على الزان
او لعبت خيلهم علجثث ميدان
انجوم اتموج من دمها ابغدران
نوبٍ تِطفح او نوبٍ تِغَوِّر
ركب غوجه او تعنّه احسين ليها
لگاها بس جثث وامسَلّبيها
صبّ الدمع واتلهف عليها
او گال احتسِب عند الله واصبر
ويّه احسين ما ظل بالمخيم
غير اولاد اخوه واولاد مُسلم
واولاده واخْوته او وِلدة العم
وغير اولاد عبد الله بن جعفر
اترك تعليق