المسير من كربلاء

حادي الظعن والإمام السجاد

هلّةٍ هلّه يحادي بالعِليل
الگيد ضره او شوف دم ساگه يسيل

مهجة الزهره ترى هو والحسين
ما بگه برويحته غير الونين
شوف روحه رايحه غمْضتِ العين
لا تحطّ ابرگبته غلّ الثجيل

بالمدلل لا تسچ والوكت حار
ناحل اتشوفه او مثل العود صار
طارِف ابمسراك بطْراف النهار
والظهر مسراك گيّل لا تشيل

اشلون يحمل بالشمس لفْح السموم
ولو گعد بالگاع ما يگدر يگوم
فاجد اهله اهنا يلايم لا تلوم
لو جذب ونّه او سهَر ليل الطويل

ويل گلبي من يصد لسكينه
اتصيح ابوي احسين خويه وينه
تسچب ادموعه او تِهَمْل اعيونه
اتجاوبه اسكينه يويلي بالعويل

هلّةٍ هلّه ابزين العابدين
يجِر بالحسره او يجذب بالونين
فاجد اعضيده علي او عوده الحسين
وعمّه بو فاضل شبل حامي الدخيل

فاجد العرّيس جاسم والشباب
فاجد اهل الشيم سبعين الاصحاب
على امصايبهم تسلّه او چبده ذاب
يون نوب او نوبٍ ادموعه تسيل

هلّةٍ هلّه يحادي بالحرم
تنحب الوليانها أهل الشيم
سلّبوها او حرگوا اعليها الخيم
او لا بگه عدهن ولي او لا تم چفيل

هلّةٍ هلّه يحادي بالأطفال
ماهي مِتْعَلْمَه على اركوب الِجمال
چانت امْعَلّمَه اعله العز والدلال
لا تِخَلْها اتنوح تِعلن بالعويل

هلّةٍ هلّه ابچلثوم او رباب
وزينب او سكنه نسِل داحيِ الباب
تنْحَب اعله احسينها بدْر الشهاب
بالعرش واللوح قط ماله مثيل

العقيلة تستنهض أخاها الحسين

گوم للشبان حل اطواگها
حاميه امن الشمس واشراگها

احسين منته الشمس واضحت مظلمه
والگمر عباس خرّ امن السما
والچواچب تسبح ابفيض الدما
وسبحت اطفال النجوم ابراگها

يا بدور الأبد ما يتخضبون
امعفّره وانوارها تغشى الِعيون
اتفجّرت طبراتهم بَحْمَر اللون
والمسِچ يتنافَح امن ازياگها

لخْوِتچ گومي يسِكنَه انزورها
نِشِم منها اخدودها ونحورها
ابفيض دمها راويات اصدورها
ويل گلبي ناشفات ارياگها

كل شجاع امن اخوتي يخسه السبع
الموت يتدرّع ولا لمهم دِرِع
دون مبناهم وهُم عشْره او سبع
گابلوا شاماتها واعراگها

من سوگ الحرب ساموا الروس
وارخصوها وابذلوا بيع النفوس
الناس تتسوگ امچيله لو لبوس
واخوتي طعْن او طبر مسواگها

اشلون نمشي والجثث خلوها
اشلون نبگه وروسها شالوها
اتحيّرت بالبگت والمشّوها
باصروني مگدر اعله افراگها