العقيلة تصف حال الرضيع وتستنهض العباس لطلب الماء
طفل احسين ظامي او يجذب الونه
يريد الماي ما ضاگ الشرب منّه
تلوج اعليه أمّه ادموعها رابت
لعِد زينب تنادي او للطفل جابت
شوفي اوليد اخيچ چبدته ذابت
يِلوج ونِشف دمعه او بيش ابِلّنّه
يِونّ او يهد حيل الدهر بونينه
او صوته انگطع منّه او غرّبت عينه
أريدنچ يعمْته اليوم تسجينه
دگومي لابن اخوچ او لاحگي منّه
گامت ليه تتحسر على حاله
تصد ليه او دِموع العين همّاله
صِرخَتْ يم ابوه او وگفت اگباله
يخويه الطفل مات او لا بعد ظنّه
تنادي او من بچت يمّه انخطف لونه
ما تدري يخويه طفلَك اشلونه
نِشف ريجه وحليبه او غارت اعيونه
ثلثتيّام ما هاد او رضع منّه
ناداها أنا اشبيدي او تنخّيني
شوفي الگوم عالماي أخْرجَت دوني
على طفلي يزينب كدّريتيني
وچيف اگدر على افراگه واصد عنّه
نادت وين اخوي الچاسب النوماس
ضخري وابن ابوي الضيغم العباس
ناخيتك يخويه وفرّعِتْ للراس
الطفل احسين اخوك الماي اريدنه
نادى احسين ظهري لا تكسرينه
صبري او طود صبري لا تهدمينه
دخل طفلي ايموت او لا تفزعينه
يختي او يشعب افّادي امن افگدنه
صال الليث او تچنه او نخه عدها
يزينب دونچ الجيمان لرْبدْها
لَخَلّيها تموج الخيل ابعددها
واَصِلْ للماي وعيونچ لجيبنه
رج رمحه الرديني او طارت اگصمَّه
وجذب سيفه او عِدَى والگوم ملتمّه
وصل ليها الشفيه البَغْرَث اللّمّه
ردمها او نهم بيها واخلست منّه
طفح بيها الشفيه ابظهر ميمونه
يِخَبْط الموت والجِربه على امتونه
صوّل للشريعة او من يگف دونه
اشحدها والجموع اتمايلت عنه
ترس جوده او عدوّه الگوم بدروبه
يصول وچبدته امن العطش معطوبه
لكد غوجه يويلي او فات مطلوبه
طاح او خيل عدوانه يدوسنّه
اترك تعليق