استنهاض صاحب العصر والزمان

استنهاض الإمام المنتظر

شبل طه شيعته عزها بناه وشيّده
يَمْتَى لمنادي يبشّرنا برض مكّه بدا

إمامنا علّة الكون او دام بوجوده الوجود
حيث لَن العالم الخيمه وهُو بيها العمود
يَمتى يظهر برض مكّه او ندرك أيّام السّعود
والنّصر يمشي أمامه ولَملاك اتأيّده

گوم يَبن الحسن چم دوب الصّبر هذا الصّبر
گطّع امعانا او شربنا امن العدا كاس الكدر
طالت الغيبه يَبن طه انهض ابْسيف النّصر
هاي شيعتكم ذليله او عايثه بيها العدا

چان ما نستاهل النا تثور يمشكّر فزيع
ثار جدّك بو علي عد آل أميّه لا يضيع
ما نظن تنسى الحريم الضّايعه او تنسى الرّضيع
واليتامى اللي اضربوها والخيَم لمفرهده

والخبر عندك يَبو صالح عن الصار او جرى
ظل ابوك حسين يتلظّى ظما فوگ الثّرى
وداس بنْعاله الشّمر صدره او نحره هبّره
وجثّته ظلّت على حر الصّعيد امجرّده

وانتَ بعد حسين تدري ابحال زينب والحرم
يوم صاح الرّجس وجّوا النّار نحرگ هالخيَم
للفضا فرّت تنخّي وينكم يَهل الشّيم
امحيّره او محّد يرد اجوابها غير الصّدا

اتصيح يا عباس وين الوعد يا ضنوة علي
امن المدينه الكربلا مَنته التباري محملي
يوم ممشانا گلت گومي او تخيّرتك ولي
ابشاربك عبّاس ما تنهض ترى الحادي حدى