في رثاء الإمام علي بن موسى الرضا

وفاة الإمام الرضا

اتزَلْزَلَت طوس ابأَهلها وغدت ضجّه بالعويل
ماجت السبع العلا لمصيبته او عرش الجليل

يا گلب ذوب او تفطّر حزن لمصاب الرّضا
گطّع المأمون غيله گلبه ابسمّه وگضا
وكت موته حضَر بحْذاه الجواد او غمّضه
امْن المدينه الطوس جا له وبالحزن جسمه نحيل

غَمَض عينه واسبل ايده وكت موته ومدّده
والشّهيد حسين وكت الموت محّد وسّده
وجثّته ظلّت على حر الصّعيد امجرّده
امْن المخيّم للحريبه اشْلون ما راح العليل

حيف ابو امحمد گضا نحبه غريب ابغصّته
وطوس ضجّت له ولفى المأمون يسچب دمعته
وحول بيته اجتمعت الشّيعه الشيل جنازته
غدت مدهوشه تحن بالويل والحزن الطّويل

ويوم فاضت روح ابو سكنه او على صدره شمر
على خيامه الخيل دارت وانهتك ذاك الخدر
والحرم سلبوا يزرها او فرّت ابليّا ستر
غدت من گلّة الوالي ضايعات ابلا كفيل

بَرض سامرا گبور اتغيبت بيها شموس
من سمع شمس العوالم تختفي ابطي الرموس
والمصيبه اللي افجعتنا بدرٍ اتغيّب ابْطوس
جرّعه ابن الغادر السّم واشتفى منّه الغليل

خان بيه ابن الرّجس والگلب منّه گطّعه
امن الغدر حافي لفى له وشال نعشه او شيّعه
والخلگ هذا يلوج او ذاك يجري مدمعه
وهذا يلطم على الهامه والدّمع منّه يسيل

للنّبي حگ الرّساله اليوم أدّت أمّته
خانت اعهوده ابْغَدرها او جارت اعْلَه عترته
واصبحت من غير سايه بالفيافي امشتّته
هذا هالك بالسّجون وذاك من دمّه غسيل

الناظم:
اهنا يبو امحمد نخيتك وانت لي حصن ومنيع
مَدد طالب من الباري وانت لي نعم الشّفيع
من يگول اليلتجي بظلّك يَبن طه يضيع
تدري ابْمَگصد عطيّه شلون يا حامي الدّخيل

الزهراء تنعى وترثي أولادها

ابكل بَلده وكل وادي من اولادي بدر غاب
ذاب گلبي من مصايبهم ومنّي الرّاس شاب

كل صباح وكل مسيّه ينفگد منّي ولد
شرّدوهم بالفيافي ولا يآوون ابّلَد
خاليه منهم منازلهم ولا منهم أحد
بس حرم وايتام مدهوشين من عظم المصاب

بعض راحوا بالمباني او بعض راحوا بالسّجون
والذي بالبر هاموا للوطن ما يرجعون
والگضوا بالسّم غيله يا خلگ ما ينحصون
والذي انذبحوا تظل أجسادهم فوگ التراب

بعض عندي بالمدينه او بعض هاموا بالبرور
بعض حصلوا الهم اموارا وبعض ماحصلوا اگبور
چم جسد بالطّف عاري او راسٍ ابْخطّي يدور
وچم طفل مرمي ابكتْر حسين دامي او چم شباب

ومن فعل بغداد ذابت مهجتي او گلبي انكسر
مهجتي باب الحوايج ظل رميّه اعْله الجسر
والمصيبه اللي دهتني ابْطوس مخسوف البدر
عنّه بعيده العشيره وميّت ابّلدة اجناب

واصبحت طوس ابزلازل والخلگ كلها ابْعَويل
لَجْل ابو امحمد تزلزل يا خلگ عرش الجليل
والاعلام السّود منشوره او مدامعهم تسيل
اهتزت السّبع العليّه او بالأرض صار انقلاب

گام شبله ايغسّله والدّمع من عينه همى
مدّده اعْلَه المغتسل والماي جاه من السّما
وبالطفوف حسين جدّه اتغسّل ابفيض الدّما
والچفن سافي الثّرى عريان مسلوب الثّياب