الإمام السجاد وأبو حمزة الثمالي

السجاد مع أبي حمزة الثمالي

لا تهيجني ترى سيف الصّبر گلبي فرى
اتلومني چنّك مَتَدري بالمصاب اللي جرى

لا تهيّجني ترى مْن النّوح جبدي اتفطّرت
عاينت عيني مصايب بالبرايا ما جرت
ابيوم واحد كل عشيرتنا ابْصعيد اتعفّرت
روسهم فوگ العوالي ولَجساد اعْلَه الثّرى

شوف عيني من وگع بو الفضل شيّال اللوا
راح ابويه حسين شافه ادمومه او مخه سوى
ورجع محني الظّهر ويصيح طود العز هوى
وانا بس اجذب الونّه والدموع امنثّره

شوف عيني ابن الحسن من طلع چنّه غصن بان
لابس اثيابه يبو حمزه مثل لبس لَچفان
والوجه مثل البدر ياضي على بخت الزّمان
ظل رميّه اعْله الوطيّه والخدود امعفّره

عاينت عيني يَبو حمزه علي لَكبر الشّاب
وگع بالعركه وجابه والدي يم لَطناب
بالسيوف مبضّعينه وراس ابوه عليه شاب
شعب گلبي حال ليلى اتحوم حوله محيّره

وچان ابيّن لك مصاب اللي صدر رايك يضيع
جاهدوا حتّى تفانوا والغسل فيض النّجيع
يا بوحمزه ما تگلّي اشْذنب عبد الله الرّضيع
بيد ابويه حسين شفته السّهم فاري منحره

والمصيبه اللي تهزّ العرش وتفت الصّخر
من شفت طاح الشّهيد ابْسَهم من ظهر المهر
وأمَضْ منها يوم شفته ايهبّر اوداجه الشّمر
والحراير نصب عيني بلبرور امطشّره

وچان ما تدري أخبرك والخبر صعْب او شديد
نادوا علينا خوارج بالسّكك مثل العبيد
وگفوا بنت الرّساله امچتّفه ابمجلس يزيد
مالها ساتر ذليله وباليتامى اممّرمره