طريق الشام وقضية أم هجام لعنها الله

شكوى زينب حالها لأبيها

يا علي يا ياب ما تدري اشْسَدى اعليّه وجرى
بالمجالس وگفوني وگبل چنت امخدّره

سلّبونا او ركّبونا يا علي فوگ الهزل
يسر للكوفه خذونا او ربّگونا بالحبل
وعلى ابن زياد ادْخلونا او دمعنا ابْخَدنا يهل
وظل يتهكّم علينا او سِن اخونا كسّره

سافروا بينا من الكوفه اُو ودّونا اليزيد
سيّرونا مثل سبي الرّوم لو سبي العبيد
والذي نحّل اعظامي شوفتي راس الشّهيد
ناصبينه گبال وجهي ويهل دمعي امْن انظره

فوگ خطّي امعلّگينه وينظر السكْنه ورباب
يا علي او كلما نطب بلده نگول اهْنا العذاب
ريتني اتگضّت ايّامي او لبتليت ابهالمصاب
ولا وگَفْت ابدار غربه ابْهَاليتامى امحيّره

وطبّة الشّام المشومه اتشيّب الرّاس الرّضيع
ضايعه وضايج عليّه يا علي الرّحب الوسيع
فارگت روحي عسى او لا شوف هالحال الشّنيع
ولَنْظُر الها الذبح اخيّي اعلام كلها منشّره

وعلى ايزيد الرّجس دخلونا ابْكسيرتنا ننوح
وبينّا السجّاد وابْرجليه من گيده جروح
فَت مُهجتي راس اخيّي بالطّشت شفْته يلوح
بالقضيب ايكسّر اضراسه او شفتها امكسّره

آ يَهَظم اللي لگيته من يزيد ومجلسه
ابحَبل چتّفنيِ او سب اهليِ وراسي نكّسه
وآنا حرمه ومبتليّه ابهاليتامى والنّسا
والعليل اللي شعب گلبي ابْونينه محيّره

ضرب الرأس الشريف بالحجر

صدّوا ابْراس الولي امْن النوح هلكت نسوته
شيبه امخضّب او سكنه اتنَحّلت من شوفته

يا زجر مَيّل ابراس حسين ذوّبت لَطفال
ما تخاف الله افْجَعتنا او ما بگى للحرم حال
تلعب ابراس الولي فوگ الرّمح يَمْنه وشمال
مَگدَر انظر بو علي تلعب الرّيح ابْشيبته

بالأمس شوفة عزيزي حسين تجلب لي السّرور
لو ركب مهره او تسلّح والوجه يلمع ابْنور
وحوله أولاده او أخوته او ظِل على اخْيَمنا يدور
ومن يطب عندي الخيمه شلون حلوه طبّته

وهسّه فوگ الرّمح وايْگودون خلْفه ناگتي
ايدير لي بالعين من يسمع عزيزي نحبتي
وينذهل گلبي او غصب بالهودج اضرب جبهتي
لا تلوموني ترى امْن الحزن چبدي امفتّته

والذي خلاّ الگلب منّي يذوب او ينفطر
والدّمع دم صبّت عيوني مثل صبّ المطر
ضربة ام هجّام راس حسين اخيّي بالحجَر
مَر عليها ايسبّح او نوره يشع من غرّته

گالت الرّاس الذي يسطع على الرّمح الطّويل
صاحب الشّيبه البهيّه او صاحب الوجه الجميل
چان راس حسين جرّب بَلْكي يبرد لي غليل
وبالحجر بنت العواهر ويل گلبي صكته

شلّت ايمينچ يميشومه اشْفَعَل بيچ الشّهيد
ما كفاچ اللي جرى اعْلَه الجسَد من عسكر يزيد
گطّعوه او هشّموا جسمه على حر الصّعيد
وانتي اتضربين راسه بالحجَر متشمّته