طريق الكوفة ودخولها

شكوى السجاد حاله لعمّته زينب

زينب اتعاين وليها ولَغلال ابْرگبته
فوگ ناگه امهزّله امْگيّد وتجري دمعته

ينظر الها ويجر ونّه وهي تنظره او تنتحب
والحرم تخفي البچا والنّوح خوف امْن الضّرب
نادته يا نور عيني ذوّبت منّي الگلب
هلّت ادموعه واخذ يبدي الشّكايه العمّته

عمّه يا زينب سفرنا فوگ هالهزّل طويل
وانا من كثرة جروحي هذا دم ساگي يسيل
نحّل عظامي اركوبي اعْلَه الجمَل وانا عليل
وهالرّجس كل ساع يضربني ويزجر ناگته

صاحت وظلّت يَويلي فوگ ناگتها تجود
يا زجر بالله دخفّف عن علي من هلگيود
آه يَفرسانٍ نسوني آ يَعزٍ ما يعود
من طرفنا ما تخاف الله او ترحم حالته

رد عليه ابن الخنَا او من شاف حاله الغيظ زاد
صاح كِتْر اللي يوجعك وين يا زين لعباد
گال حَدْر الجامعه او موضع اغلالي ولگياد
شال سوطه وغابت امن الضّرب ويلي ارويحته

دخول العلويّات الكوفة

ماجت الكوفه بَهَلْها وطلعت ابْضَرب الدفوف
والودايع حايره والسّتر راحات الچفوف

ابْحَالة الگشره يتامى حسين دخلوها تنوح
والحراير ما بگى الها امْن الضّرب والسّير روح
والزّلم بالسّكك تهرع والنّسا فوگ السّطوح
وين أبو فرجه الشّفيّه ليت يحضرها ويشوف

وغدت كوفيّه شجيّه تصيح هاللي اعْلَه الجمل
من تنعّي ذاب گلبي او من تحن دمعي انهمل
صوتها يصدّع او يشبه صوت أبو حسين الفحَل
ضايعه او نسوه وراها امركّبات اعلى لعجوف

ظنّتي هاللي تحن گدّام هاي امّ المصاب
واظن المذبوح اخو الْها لو ولد بعده شباب
ردّي اجوابي يَمَسبيّه تراهو الگلب ذاب
واخبروني انتوا امنين او صاحت ابْدَمعٍ ذروف

لا تنشديني ترى رسم الصبر منّي عفى
ضايعه ابْليّا ولي وابهاليتامى امكلّفه
ما دريتي احنا يَكوفيّه سبايا المصطفى
امسلّبات وهالأعادي كلها تتفرّج اعكوف

صاحت اشلون النبي المختار تسبى نسوته
وهاللي تتفرّج عليكم كلها تتبع ملّته
گالت امْن الدّهر هذا او من يزيد او فعلته
انذبحت اخواني او ظلّوا اعْلَه الثّرى بَرْض الطفوف

وانا زينب والذي من حولي أيتام اخوتي
والذي فوگ العوالي روس گومي او عزوتي
شوفي أحوالي سليبه او زجر گايد ناگتي
ومن يهل دمعي ضَرَبني عگب أبو فرجه العطوف

چنت انا ابعز او جلاله او مثل خدري ما جرى
وتبهج الخاطر هَلِي ابْذيچ الوجوه المزهره
مَحْلَى مَشْيَتهم سويّه والشعور امنشّره
خلف ابو سكنه وتخط فوگ الثّرى ابنود السيوف

واصبحت فرجه وطماشه عگب فرساني او هَلي
فوگ ناگه امهزّله او كل ساع يصْغي محملي
ولو بچيت الرّجس يضربني ولا ليّه ولي
اُو وين مَيْشوف الخلگ متجمّعه بينا يطوف