زين العابدين يدفن أباه

حضور السجاد لدفن الحسين

طب علي السّجاد للعرصه او دموعه امنثّره
شافها تزهر ومن طيب لَمجاد معطّره

شاف جسم حسين واجساد العشيره امضجّعه
وشاف جمع امْن الخلگ عند الجسد متجمّعه
گال شلكم يا خلگ عد هالجثث لمصرّعه
گالوا نتفرّج عليها ودم دمع عينه جرى

گال لا تخافون انا ابن حسين جيت ابْوَجعتي
گصدي أدفن والدي وادفن اعمامي واخوتي
گوموا حفروا گبور عنّي المرض ناحل گوّتي
وخلّوا ادماهم غسلهم والچفن سافي الثّرى

حفروا گبر حسين يمّه وگام محنيّ الظّهر
وضع يَدْ تحت الرّجل والثّانيه تحت الظّهر
گام كلما رفع جانب جانب الثّاني يخُر
صاح بويه اشْلون اشيلك ولوصال امطشّره

لا چفن تحصل يَبويه او لا حنوط او لا غسل
نور عيني او لا عضو منّك بالاخر متّصل
ذاب گلبي باريه بالله احضروا لي بالعجَل
نجمع اوصاله او نركّبها او نلفّه او نگبره

ركّب اضلوع الصّدر والدّمع من عينه ذروف
حط على اچتافه الزّنود او على الذّرعان الچفوف
ويل گلبي من فگد خنصر ابو سكنه العطوف
رد يحوم ويجذب الونّه او يدوّر خنصره

لَمْ جميع اوصال ابوه اللي انكسر واللي انهشم
حتّى گطعة گلبه اللي استخرجوها بالسّهم
ما بگى غير الكريم اعْلَه الرّمح يبرى الحرم
ولفّه اُو مدّده ابْگبره وظل يشمّه ابْمَنحره

رد على الأكبر لگاه امگطّع وراسه گطيع
حفر گبره وانحنى له وشاله ابگلبٍ وجيع
جهّزه او جهّز الجاسم واخوته او وارى الرّضيع
والتفت للمشرعه او حن او تعلاّ اتْحسّره

گصد للمَسْناة يسچب عبرته محني الظّهر
شاف ليث الحرب متوسّد اذراعه اعْلَه النّهر
صاح عمّي انتحل جسمي امن المصايب والقهَر
ابْذمّتك زينب يَبو فاضل او تمشي اميسّره

وين چفّينك يَعَمّي او ين راسك والعلم
آه لو سلمت اچفوفك چان ما حرگوا الخيم
وچان ما واحد كَفُوا يسلّب يتيمه امْن الحرم
ليت دهري ايعود ليّه بالليالي المزهره