وداع القتلى

الرحيل عن كربلا

كافل ايتامي يَحادي تفت گلبي فرگته
ريّضوا سويعه تودّع هَلمرضّض عيلته

ريّضوا بينا نودّع بو علي وانجهّزه
واتركونا اننوح يمّه والشعور مجزّزه
اشلون نمشي او للعزيز حسين ما ننصب عزا
أرد انفّس نار گلبي چان تبرد جمرته

گومي يَسْكينه نواري جثّة ابن امّي الشّهيد
لا يشيل الظّعن عنّه ويظل عاري اعْلَه الصّعيد
يا رباب ابْعَجل گومي زيحي عن جسمه الحديد
وسجّي ابن امّي عدل چنّه اعْله وجهه طيحته

صدّت الذاك العليل امغلّل وتهمل العين
نادته انسف هالسّلاسل عنّك وبَطْل الونين
گوم يَبْني اويه النّسا گبل السّفر جهّز حسين
أنا افيض دموع عيني وانت گلّب جثّته

ظل علي السجّاد يتلهّف او يجري مدمعه
ايصيح عمّه حسين ابويه اوصاله كلها امگطّعه
شلون اشيله او جسمه المرضوض بيش انجمّعه
ومن يجيب الچفن ليّه او ياهو يحفر حفرته

گالت انا او هاليتامى ابْعجَل نحفر له گبر
والغسل بالدّمع ما يحتاج كافور او سدر
ولَچفان انشوف چان اعْله الحرم ظلت إزر
وزندي او زندك نعش يَبْني او نشيل اجنازته

سمعها وحن وجذب حسرات ودموعه تسيل
گلها عمّه الوكِت ضيّگ والظّعن هسّا يشيل
والحرم ما تدفن الموتى وانا گيدي ثگيل
والسّلاسل ولَغلال ابهضت جسمي وهدّته

ودّعي شيخ العشيره او هالجثث لمجرّده
ولمّي أيتامچ يَزينب چنه الحادي حدى
هذا راس حسين ابويه اعْلَه الرّمح نوره بدا
وهالضّيا السّاطع يَبِنْت المرتضى من غرّته

واگبل الحادي عليها ايصيح بس من هالحنين
گومي ركبي اعله الهزيله واتركي عنچ حسين
نكّسي راسچ يَزينب راحت اليوث العرين
وگفت أيّام السّعد والدّهر هذي عادته

مرور النساء على مصارع القتلى

سافرت زينب بلا والي اُوواليها عليل
ومرّت وشافت وليها اعْلَه الثّرى ابدمّه غسيل

امغسّل ابدمّه يَويلي ولچفوف امگطّعه
وعاينت عبّاس متعفّر ابْجنب المشرعه
وجاسم او لَكبر جثثهم على الرّمضا اموزّعه
ظلّت اتنادي يَفرسان الظّعَن عزّم يشيل

عزّم ايشيل الظّعن دنهض يَجاسم يا علي
يا مگطّع بالشّريعه گوم عدّل محملي
تدري ماني امعوّده أمشي يسيره بلا ولي
وخرّت سكينه على بوها او مدامعها تسيل

تسيل دمعتها يَويلي او تمسح ادموم الجروح
وحين ضمها لعد صدره انفجعت او ظلّت تنوح
ورَدْ شمر بالسّوط ليها او روحها رادت تروح
وزينب اتشوفه وتتدخّل ولا يفيد الدّخيل

يا شمر مَتْراگب الله ذوّبت منها الفؤاد
تضرب اطفيله او ثلتيّام ما ضاگت الزّاد
گال فزعي لي هَلِچ گالت هلي عنّي ابعاد
بالأمس عندي حموله واصبحت مالي كفيل

عتاب العقيلة عند الرحيل

گرّبوا لينا المطايا وطوّح الحادي وسرى
وجثّتك يا نور عيني امّدده فوگ الثّرى

والله ممشانا يَخويه بالغصب ما هو ابْرضى
بعدكم يا طود عزّي ضايج اعليّه الفضا
شلون ممشانا او جنايزكم طريحه امرضضه
وروسكم فوگ العوالي اگبال عيني مشهّره

واومت على المشرعه او صاحت يَبو فرجه الغيور
وين وعدك ضاعت النّسوان يالليث الجسور
خويه ما نگدر بلا وليان نگطع هلبرور
يالولي خلّيتني بين الأعادي امحيّره

خويه هذا اللي گبل منّه يَبعد اهلي خفت
چان يتصوّر ابْعيني وبيه يا حيد اُوْگعت
اتيسّرت بعد المعزّه والخدر واتسلّبت
حيث ظلّيتوا ضحايا وانا رحت اميسّره

جيت ويّاكم من اوطاني عزيزه يا هلي
بالطفوف الكل جفاني وشال ظعني ابلا ولي
زجر من بعدك يَطَيْب الذّات يبْرى محملي
سفر وايتام او عليل شلون حاله امّرمره

وَسْفَه يا عبّاس فوگ النّهر طالت نومتك
موش انا امن المرتضى عندك وديعه ابذمّتك
وهسّا بين اعداك تتركني ذليله نيّتك
هاي آخِرْةِ الأخوّه اوْياك يا ليث الشّرا

رد عليها لسان حاله ايّسي من نهضتي
چفچفي دمعج وكفّي العتب اُو ودْعي جثّتي
راسي فوگ الرّمح ويّاكم يباري عيلتي
وراس اخوچ حسين جدّام الظّعن يمخَدّره