شجاعة الحسين ومصرعه وحال النساء

صولات الحسين ومقتله

صال ابن حيدر وجرّد عزم حيدر والفقار
وظلّت اتموج العسَاكر هَلَع واظلمّ النّهار

ذكّر العدوان صولات الوصي من صولته
وغنّى فوگ الرّوس سيفه ولا يثنّي ضربته
صرخ بالعدوان او فرّت ترتعد من صرخته
ينظم ابْرمحه او سيفه امْن العزم ينثر شرار

اتْزَلْزلَت من شد عليها او ثغر ابو سكنه ابتسم
والعساكر شطر مرمي اعْله الثّرى او شطر انهزم
ما نجت من سيف ابن حيدر علي لولا السّهم
شگ گلبه ووگع يتلظّى ظما فوگ لَوعار

شگ گلبه وخر أبو السّجّاد من ظهر المهر
ظل يعالج بالسّهم وانخسف صندوگ الصّدر
واتّچا واستخرجه يا ويل گلبي امْن الظّهر
والگلب منّه انمزع والدّم جرى شبه الانهار

ضعف من نزْف الدّما وظل ايتمرّغ بلَوهاد
جمع بيمينه وشماله امن الترايب له اوساد
وسَّد الخدَّه وشبح لمخيّمه نسل لَمجاد
وانغشى اعْليه وبگى مطروح مدَّة امْن النّهار

الخيل هجمت واوگفت زينب اعْله التّل تندبه
اتصيح يَبن امّي ادركنا او فتح عينه او انتبه
شاف زينب واليتَامى فارّات امن الخبا
صاح خويه ايعز عليّه ايسلّبونچ هلَشرار

ردّي الخدرچ يَزينب او آيسي من نهضتي
سهم لمثلّث يَمحزونه استخرج مهجتي
خايف ايتامي تذوب اگلوبها من شوفتي
وخايف اسكينه تجيني وگلبها ايصيبه انذعار

وينظر الخيل الأعادي اعْله فساطيطه تدور
والحراير كالحمام الحلّت اعْليها الصگور
هاي يَمنه وذيچ يَسره فارّات ابْلا شعور
والشّهيد ابْضعف صوته يصيح واهتك الستار

على اعْزيزات النّبي يا گوم لا يهجم أحد
واگصدوا ليّه ابنفسي ما بگى ليّه جلَد
لا تهتْكوا هالخدر ما دام روحي بالجسد
ليّه ردّوا لا ترَوعوا الحرم چان انتو أحرار

رجوع الجواد إلى المخيم

حِسْ جواد حسين يصهل حي اخونا وجيّته
گوموا نتْلگّى ولينا يا بناته ونسوته

گومي يَسْكينه اطلعي له ابْغير مُهله وانظريه
چنّه متنكّر صهيله اشْصار ما ندري عليه
أظن گحّم وانذعر من عسكر المحتاط بيه
يكثر الصّيحات مُهر حسين ما هي عادته

طلعت سكينه او مدامعها على خدها تسيل
واوگفت والعين مشبوحه على حس الصّهيل
شافته يسحب عنانه امزلزل البر بالعويل
ودم ابوها حسين يجري فوگ عرفه ورگبته

اندهشت سكينه وصرخت بس يعمّه امن الخدر
راح والينا يَعمّه وصار والينا زجر
طاح ابويه حسين واگبل يسحب اعنانه المهر
صرخت وجيب الگلب والثّوب عاجل شگته

صرخت ودم الگلب من عينها انهل وجرى
حسين يَبن امي انهتكنا چان طحت اعْله الثّرى
باچر العدوان تاخذ هالحريم اميسّره
وعگب عزّي والخدر تصبح احوالي امشتته

وصل مُهر حسين خالي يا بنات المرتضى
اتحيّرت مَدْري شَسَوّي وضاگ بي رحب الفضا
ابهالخيَم نگعد حيارى لو نروح انغمّضه
مگدر أگعد چان هالونّه الخفيه ونّته

فرّت وشبكت على الهامه اليسرا واليمين
نوب تمشي ونوب تعثر گاصده حسّ الونين
اتصيح ذابت مهجتي يا خلگ من ونّة حسين
وصلت التّل باليتامى وطود عزها نادته

جيت بايتامك ولا ظل بالخيَم غير العليل
وانا مدْري بيا كتر طايح ولا ليّه دليل
صاح ردّي باليتامى لا تموت امن العويل
وانا تركوني لي الله وابني باروا علّته

وصاياه لشيعته

مهجة الزّهرا على الغبرا يطوّح ونّته
اتصدّع الجلمد وصايا اللي بداها الشيعته

شيعتي نصبوا المآتم والعزا لمصيبتي
واذكروا تعفير خدّي بالتراب وذبحتي
لو شربتوا ماي ذكروني العَطَش فَتْ مهجتي
واگصدوني الكربلا والكل يسچب عبرته

لو تشوفوني يَشيعه اعْله الثّرى مرمي طريح
خدّي اموسّد ترايب والدّما منّي تسيح
چم عضيد وچم ولد ليّه گضى گبلي ذبيح
واحد ايظل بالشّريعه اُو واحد ارفع جثّته

شيعتي واللي گطع ظهري ونحل منّي الگوى
وحدتي من وگع يم النّهر شيّال اللوا
وصّلت يمّه ولگيته ادمومه ومخّه سوا
ولچفوف امگطّعه ايذوب الگلب من شوفته

شيعتي وابن الحسن جسّام عرّيس وشباب
صارت العركه عروسه ودمّه السّافح اخضاب
والنثار النّبل وفراش الولد حر التراب
وبين كوفي وبين خطّي وبين هندي زفّته

شيعتي وابني علي لَكبر نحل منّي الجسَد
بس شبح بالعين ليّه اعْله الثّرى راح الجلَد
بدر كامل ما جرا عند الخلگ مثله ولد
يجذب الونّه او يعالج نور عيني رويحته

شيعتي او لازم يوصّلكم خبَر عنّي وعلم
طفلي عبد الله على صدري انفرى نحره ابْسَهَم
شفته او گلبي تفطّر واستهل دمعي ابْدَم
شبح لي ابعينه وجذب ونّه ومالت رگبته

شيعتي كثر البچا حگي عليكم والنّحيب
شفتوا مثلي بالخلگ مذبوح عطشان وغريب
والچفن سافي يَشيعه وبالدّما شيبي خضيب
والحراير نصب عيني من خدرها امشتّته

مقتل الحسين

يا شمر تدري أنا سبط النّبي وريحانته
جيب لي اميّه ترى امْن العَطَش چبدي امْفتّته

يا شمر گلبي تفطّر بالظّما ولفح الهجير
جَلَد ما عندي ولا ظل لي من رجالي نصير
وين جدّي وين حيدر ما يشوفوني عفير
ما يثور الحسن لعضيده او يعاين حالته

صاح بيه ابن الرّجس مالك حموله ولا رجال
لحز نحرك بالظّما واتْموت مَتْضوگ الزّلال
واحرگ اخيامك وسَلّب هالحراير ولَطفال
والله لَتْرك هالحريم ابهالفيافي امْشتّته

گام عن صدره وچبّه ويل گلبي اعْلَه الثّرى
وجلس متربّع على ظهره وظل ايطبّره
هبّر اوداجه وزينب تجر حسره وتنظره
والشّهيد حسين يتعفّر ويجذب ونّته

نادته يا شمر شيل السّيف عن باگي هلي
هذا شمامة الهادي وفاطمه ومهجة علي
وين اوَلّي اوعگْب اخويه احسين ما عندي ولي
والرّجس ما راگب الله وظل ايحز الرگبته

وعزل راسه امن الجسد والكون ضج ابْزلزله
وشاله ابْعالي قناته وماج وادي كربلا
وكعبة الأحزان فرّت باليتامى معوله
تصيح ركني يا مصوني هالرّزايا هدّته

المصرع الأليم

وين من يوصل لبو الحسنين حيدر يخبره
عهدي ما يرضى الشفيّه بالمصاب اللي جرى

‎ابن الضّبابي فوگ صدر حسين متربّع جَلَس
والشّهيد يگول وخّر خل أعالج بالنّفس
جيب لي گطرة اميّه ذاب گلبي امْن الشّمس
ما تخاف الله دست صدر النّبي خير الورى

لا تحز يا شمر نحري والعطش فت مهجتي
وين ابويه ووين جدّي وين گومي وعزوتي
وين حمزه ما يجوني ينظرون اشْحَالتي
طايح او شمر الخنا نحري ابسيفه ايْهَبّره

صاح بيه الشّمر تنخى عزوتَك والأهل وين
ما بگى واحد من اخوانك ولا عندك معين
لحز نحرك وارفع اعلى الرّمح راسك يا حسين
واحرگ خيامك واخلّي هاليتامى مطشّره

وانحنى يگطّع اوداجه والفيافي اتزلزلت
وضجّت الاملاك لَجْلَه ولَفلاك اتعطّلت
وشال راسه وشافته زينب وصاحت واعولت
ليت راسي گبل راسك شمر گاطع منحَره

اوداعة الله يالذي راسك على سنان ارتفع
حسين يا شيّال حملي بس طحت حملي وگع
بعد مثلي ما أظن بالكون بخوانه انفجع
ضايعه او گلّة ولي او عندي جنايز بالثّرى

خيَم محروگه وحريم امسلّبه وعندي عليل
واليتامى ذوّبوني امْن البواچي والعويل
والمصيبه باجر امْن الصّبح للكوفه نشيل
ويظل جسم حسين مرمي ولا أحد له يگبره

سماع النساء أنّة الحسين

اشْهَالونين اللي نسمعه يا سكينه اشْهَالونين
ذوّب احشاي ونحلني خايفه ونّة حسين

سمعت الونّه سكينه ودمعها هل وجرى
اتصيح يا عمّه أبويه حسين طاح اعْلَه الثّرى
ودارت اعليه العدا وجثْته رميّه امطبّره
واظن هالونّه اليجرها وللخيم شابح العين

اتعرّفي الونّه يَعَمّه چان هذي ونّته
انروح للعركه الوالينا او نعاين حالته
انغمّض عيونه گبل تطلع يَعمّه ارويحته
وعلى الجبله نعدل الوالي ونسبل لليدين

طلعت وچفها على الرّاس ومدامعها تسيل
وفرّت اوياها الحراير واليتامى بالعويل
اتصيح يَبن امّي شَسَوّي ابهالأيامى والعليل
لو لفاني الليل يَبْن امّي ولا عندي عوين

لا تطوّح ونّتك يَحْسين ذابت مهجتي
امحيّره ابليّا ولي وزادت عليّه محنتي
گوم يَبْن امّي وعاين ضيم حالي وضيعتي
سمعها وظل ايتگلّب على شماله واليمين

صاح ردّي واستعدّي يا مصونه للرّحيل
عگب ساعه الظّعن للشّامات يا زينب يشيل
چان مرّيتي اعْله جسمي وچان شفتيني جديل
خلّي ايتامي سويعه اتصب عَلَي دمعة العين

وچان ما خلّوچ يَخْتي اتشيّعين اجنازتي
سافري بوداعة الله والله الله ابعيلتي
نادته يا نور عيني گوم حرگوا خيمتي
گلها عذرينا يبنت الطّهر كلنا امصرّعين