وداع العائلة

وداعه نسوته وعياله

رد ابن حيدر للمخيّم يكفكف دمعته
وگف ما بين الخيم عزمه يودّع نسوته

يصيح يا زينب ابهالنّسوه ولَيتام اطلعي
وبالعجل يمْخدره منّي تعالي اتودّعي
وگرّبي ليّه جوادي وشيّعيني المصرعي
طلعت اتگود المهُر والچبد منها امفتّته

نادته يا نور عيني شفت مثلي بالدّهر
للمنيّه ماشي ابن امّي وادنّي له المهر
گلبي امقاسي مصايب يالولي اتفتّ الصّخر
خرّت اتوَدعه وبالمنحر يَويلي شمّته

فتح باعه للوديعه وضمّها ضم الوداع
صاح خويه وداعة الله وگلبها الذّايب ارتاع
غدت مدهوشه تضمّه الصدرها والرّاي ضاع
نادت اليوم الدّهر يحسين شملي شتّته

گال شفتي يا عزيزه مثل خيّچ بالملا
ذبحت انصاره طبگ حتّى الطّفل ما ظل اله
وينظر اولاده واخوته بالتّراب امجَدّله‌
والحرب شبّت لظى والعطش مض ابْمُهجته

وحال سكنه حال لَگشر يوم اجتّه اتودّعه
تنتحب وتصيح عزّ الحرم ماشي المصرعه
سمعها اتنعّي وتحدّر فوگ خدّه مدمعه
واحتضن ذيچ العزيزه وظل يجذب حسرته

نوبٍ ايضمها الصدره ويجذب الحسره وينوح
ونوبٍ اتشمّه وتگلّه عگب عينك وين اروح
هذا طير اليتم يَمْشكّر على راسي يلوح
والحرم ضجّت على حالة سكينه وحالته

صاح يَسْكينه ترى نوحچ عگب ذبحي يطول
عگب عيني يا حزينه اتكابدين امرٍ مهول
تنظريني اعْلَه الثّرى والجسد ميدان الخيول
وانتي حسره اعْله جمل تنحل الگوه مشيته

نادته ماني العزيزه اللي تودني يا شهيد
اشلون تتركني غريبه والوطن عنّي بعيد
بويه ترضى غيرتك حسّر يودّونا اليزيد
بين اعادي والعدو صعبه يَبويه وليته

محاورته مع الرباب عند الوداع

ودّع حسين الحريم وطلعت اتنوح الرّباب
شافها وهلّت ادموعه والگلب بالوجد ذاب

وگفت اگباله وعلى خدها المدامع سايله
وخرّت او حبّت اجدامه امْدوهِشَه وتْسايله
عگب عينك من يشيل ابهالحرم من كربلا
كلنا نسوان او غرايب چيف نمشي اويه لَجناب

تمشي وانا ابذمتك يحْسين يا حامي الدّخيل
عفتني وانا العزيزه او لا تعيّن لي كفيل
من يركّب هالنّسا ويبرى الهوادج من تميل
والخيم تدري مَظَل بيها من الفتيه شباب

گلْت انا ايعيش الطّفل واسلي اهمومي ابْشوفته
ورحت تطلب له اميّه والعطش فَتْ مهجته
وجيتني بذاك الطّفل والسّهم فاري رگبته
سلّمت لله وگلْت امْن الاولاد الظّن خاب

گلت بحسين الخلَف ياليت يفداه الوجود
يرجع اوطانه ابْسَلامه والدّهر يرجع سعود
سمعها وسالت دموعه وظل ابو سكنه يجود
صاح ذابت مهجتي بطلي البواچي يا رباب

چان شفتي جثّتي فوگ التراب امطبره
ودارت اعليّه العدا بالطّعن والرّاس انبرى
ظلّلي جسمي گبل ما تركبين اميسّره
وباري سكينه العزيزه چان هجموا اعْلَه لَطناب

الله الله ابهاليتيمه لوسرى زجر او حدى
وركّبوها اعْلَه هزيله اميسّره بين العدا
عزيزتي لا تتركيها يا رباب ابلا ردا
خايف العدوان تسلبها حليها والثياب

چنّي أنظرها يتيمه امشرّده من هالخبا
امروّعه تطلب الملجا ابهالفيافي امسلّبه
اتحوم مذعوره ومن ضرب السياط معذّبه
تلتجي ابْزينب وزينب راسها امْن الضّيم شاب