وحدة الحسين بعد فقد أنصاره

وحدة الحسين وخطابه لأنصاره

طب ابو سكنه المعاره ايشوف گومه وعزوته
وگف يجري الدّمع وبصدره انكسرت عبرته

ظل يناديهم يَفرساني تخلّوني وحيد
شالسّبب عفتوا مخيّمكم ونمتوا اعْله الصّعيد
لا ولد ليّه بگى يحمي حريمي ولا عضيد
وبن سعد بعدي ييسّر هالحراير نيّته

شلون يا عبّاس تتركني وحريمي امحيره
عايف الخيمه يَبو فاضل او نايم بالثّرى
وهاي زينب عگب عينك بالحرم متْمَرْمره
وتدري باليفْگد عضيده اتگل يَخويه حيلته

وعاين الجاسم اچفوفه امخضبه ودمّه يسيح
وگف ودموعه يهلها والگلب منّه جريح
صاح يَبن الحسن ساعه امعرّس وساعه ذبيح
على مصابك جيبها سكنه العزيزه شگته

وبس نظر لَكبر علي او عاين اوصاله امگطّعه
نسى الجاسم والعضيد اللي ابْجَنب المشرعه
وانحنى فوگه وغسل طبرة الرّاس ابْمَدمعه
وجذَب حسره اعْلَه الولد والحزن ذوّب مهجته

صاح يَشْبيه النّبي ما شوف لك شبه ومثيل
گوم نرجع للخيَم سكّت النّسوه امْن العويل
شاب راس امّك يَبويه والجسد منها نحيل
آه يشابٍ فارگ الدّنيا وراح ابحسرته

وعاين اخوانه وبني عمّه ابْنَجيع الدّم تموج
چانت انجوم العلى وخرّت من ابروج السّروج
وگف يعتب متّچي اعْلَه السّيف يا ويلي ويلوج
واخذ ينخاهم وهُم فوگ التّرب من وحدته

صاح يَزْهير او يمسلم يا هلال او يا حبيب
صحبتي كلكم نسيتوها وتركتوني غريب
ما تجون الهاليتامى ذوّبوني من النّحيب
ظلّت اجثثْهم تموج وتضطرب من نخوته

اتصيح سامحنا يَبو سكنه ترى احنا امصّرعين
شوفنا هذا اچفوفه امگطّعه وهذا طعين
صاح معذورين ياللي اعْله التّراب امجزّرين
واگبل اعْلَه مخيّمه عزمه يودّع نسوته