مصيبة علي الأكبر

رثاء علي بن الحسين الأكبر

حلّي احزامه يَليلى وغمّضي عين الشّباب
وارفعي خد لمدلّل مهجتي عن هالتّراب

شدّي اجروحه يَزينب فطر گلبي ابونّته
وبالدّمع بالله دغسلوا هالدّما عن وجنته
يختي شدّوا ابهالعمامه طبرة اللي ابجبهته
يا علي والله گمر لكنّه اتكوّر وغاب

ما تهنّيت ابْشَبابك ليت عيشي لا هنا
يا گصير العمر يبني ليت يومك لا دنا
على الدّنيا امْحَسَّر وعمرك ثمنتعشر سنه
عَفْيَه گلبي شلون صابر چيف مَتفتّت وذاب

هيّجت نيران گلبي يا شبيه المصطفى
نور عيني عگب عينك يا ضيا عيني انطفى
بعدك آنا العمر ما ريده وعلى الدّنيا العفا
عذب موتي من عگب فرگاك والعيشه عذاب

جَف دمع ليلى من الدّهشه وتگلّب بالجروح
حايره واتْصيح يَبني ضيّعتني وين اروح
چان يَبني تروح روحك روحي ويّاها تروح
نومتَك ذوّبت گلبي وراس ابوك حسين شاب

فتَح عينه وعاين امّه وگال صبري الأمر فات
وزينب اتْناديه سالم يا ملاذ الضّايعات
شبح ليها وجذب حسره وغرّبت عينه ومات
وگام ابوه حسين ودموعه تصب صب السّحاب