عرس القاسم ومصرعه

زفاف القاسم بن الحسن

يالّذي اعْله المشرعه ظلّت رميّه جثته
هذا جاسم زافّينه انهض وعاين زفّته

چان يا كبش الكتيبه بيك للنّهضه جلَد
فزّع اخوانك وثوروا ابْعَجَل زفّوا هالولد
وصّل ازْفَافه وانا مفرود ما عندي أحد
بس حريم اتجر ونّه والگلوب مفتّته

گوم بسّك يا گمر عدنان من نوم التراب
وگّض اشبال الهواشم والبسوا جديد الثياب
والذّوايب سرّحوها وگوموا انزف هالشّباب
وانتخوا جدّام جاسم چان تنْشَف دمعته

وزينب اتگلّه يَبو سكنه افْجَعتْنا ابْهَالنّدا
عرس عدْنا شلون يبن امّي حزنّا اتزيّده
يا الولي اتْنخّي جنايز عالوطيّه اممدده
ودمع ابن خيّي جرى وحِسْها تنعّي زوجته

ورمله ما بين النّسا تلطم صدرها معوله
ردْت انا ازفاف الولد بوجود گومه وكل هلَه
ما دريت يصير عرس ابني ابوادي كربلا
وينظر بعينه على الرّمضا عمامه واخوته

اشلون يا مظلوم عرسه وانتَ معدوم النّصير
والعرس ويّا الجنازه ابْيوم واحد ما يصير
جذب حسره وگال انا ادري ابهالولد عمره گصير
لكن ابن امي وصاني اشْلون اخلّي وصيّته

هل دمع جاسم وصاح الگلب يا عمّي انكسر
لا تزفّوني يَعَمّي چان انا عمري گصر
وخلني أطلع للمنيّه وانتو حفروا لي گبر
ضمّه الصدره وبچى والكل يجذب حسرته

ما بعد مصرعه

گشّعوا فرشة الجاسم لبّسوا سكنه حدود
هلمدلّل گوموا انزفّه يَزينب للّحود

خلّوا اسكينه تشگ الجيبها وتحثي التّراب
عن العرّيس اخبروها ابهامته يَختي انصاب
نادوا الرمله تجي واتشوف حالة هالشّباب
تجري ادمومه ومخ راسه على صفاح الخدود

ظلّت اتنادي يَسكنه بدّلي عرسچ انياح
ترى حسين الظّهر منّه انكسر والعرّيس راح
طلعت سكينه ولگت جسمه اموزّع بالجراح
هوَت فوگه وظل يعاينها وهوابروحه يجود

طلعت امّه تصيح يا جسّام ظل مظلم البيت
فتّح اعيونك عساني عگب يومك لا بگيت
ساعه امعرّس وساعه فوگ صدر حسين ميت
واظن يَبني الگمر بالذّابح مَهو سعد السّعود