مقتل العباس

سقوط العباس بالمعركة

طاح ابو فاضل وراح يغرّد ابصوته البشير
شمل عدوانك تشتّت گرّة عيون الأمير

گرّة اعيونك عميد الجيش بالميدان طاح
بيرگ العزّ انكسر منهم وعزم حسين راح
هسّا من بعده يظل كالطّير مكسور الجناح
منكسر ظهره يدير العين معدوم النّصير

وگف معدوم النّصير حسين ودموعه تهل
صاح يَعْضيدي وگع وَسْفَه على الگاع الحمل
بعدها ابْتَنواك سكنه وبيدها بعده الطّفل
وچان اخبّرها اوگعت بَحوالها تدري اشْيصير

احزام ظهري او يا كفيل ايتامي اشبيدي عليك
بطّل ونينك وگوم اختك تراهي ترتجيك
هذا رمحك هذا جودك وين سيفك وين ايديك
فتح عينه وظل لخيّه حسين بزنوده يشير

يشير لعْضيده بزنود مگطّعه منها الچفوف
سهم البعيني دشلْعه واغسل الدّم چان اشوف
أنظرك نظره گبل موتي يَبو سكنه العطوف
ملتظي وروحي افْغَرَت يحسين من لفح الهجير

گعد عد راسه ايتلوّى ورفع خدّه امْن الثّرى
ورد سحب راسه الشّفيّه وبالتّرايب عفّره
ايگلّه جثْتك عگب ساعه اتظل رميّه ابهالعرا
اتشيل خدّي امْن الثّرى وتالي يظل خدّك عفير

لا تودّيني الخيمه يا عضيدي ومهجتي
ينصدع گلب الوديعه بس تعاين حالتي
لا تفارگني ترى گربت يخويه موتتي
وجذب ونّاته وغدت عينه لخيه تستدير

فارگت روحه وأبو السجّاد مدّد جثّته
وغمّض عيونه وعلى الخدّين هلّت دمعته
أيّس وگام ومثل ما گال گلّت حيلته
ورجع گاصد للخيَم يجذب الونّه مستحير

رجوع الإمام بعد مصرع العباس

يا بنات حسين گومن رَدّ ابو سكنه وحيد
شوفتَه مكسور ظهره ظنّتي راح العضيد

صرخت ام كلثوم وسكينه وطلعن بالعجل
وزينب تصيح انهتكنا جان أبو فرجه انجدل
والشّهيد حسين ينحب والدّمع منّه يهل
نادته سكنه العزيزه وين عمّي يا شهيد

بس وصل شيخ العشيره دارن عليه الحرم
وزينب اتنادي يخويه وين شيّال العلم
گال منّا يا حزينه بو الفضل باع السّهم
واستحب نوم الشّريعه وجيت يا زينب وحيد

لو تشوفينه يَزينب چيف مگطوع الزّنود
والعلم يمّه وگع والرّاس مفضوخ ابْعَمود
گالت انْأَيّس أجل عبّاس لينا ما يعود
گوم نمشي انْعالجه گال المعالج ما يفيد

گالت اوصف لي أحواله گال مخه اعْله الچتوف
والسّهم ناشب بعينه يا حزينه او لا يشوف
شعر راسه امخضّب ابدمّه ومگطوع الچفوف
يختي والله انكسر ظهري يوم شفته اعْلَه الصّعيد

نادته دنهض ابهالنّسوه نروح الجثّته
وناخذ اويانا نعش حتّى نشيل جنازنه
كافلي يا بو علي ودّي أعاين غرّته
گال ما ينشال يا زينب امگطّع بالحديد