صورة الشاعر
اسم الشاعر : ملا عطيه الجمري

يا حبيب ابن البتولة


حبيب بن مظاهر الأسدي

يا حبيب ابن البتوله لا تخلّي نصرته
ابْكربلا ايگولون ظل محصور بَهله واخوته

ابكربلا يگولون شبل المرتضى حط الخيم
ما له ناصر يا حبيب وعنده اطفال وحرم
وچان راح حسين ما يرتفع للشّيعه علَم
ترضى ليّه بالخدر وحسين تسبى نسوته

وگفت اتنخّي وتخمش للخدود امفرّعه
انچان ما تنهض ابهمّه وتطب ذيج المعْمَعَه
جيب لعمامه يَبن عمّي وخذ هالمقنعه
وظل حبيب ايعاين الها وغصب هلّت دمعته

صاح ما يحتاج هالنّخوات بطلي امن الحنين
آنا عبد ابن الرّسول وعبد امير المؤمنين
ذاب گلبي من سمعت ابكربلا خيّم حسين
واسمع ايگولون جيمان الأعادي حاطته

ما حلى ذيچ الشّمايل يوم طب الكربلا
وطلع عبّاس البطل بَولاد اخوه يستقبله
مرحبا ايگلّه الشّهيد او زينب اتگلّه هلا
وصل مستبشر لبو سكنه وتناول رايته

جاه من زينب سلام ومدمعه بالحال سال
واگبل ايسلّم على الحورا وعلى ذيچ العيال
صاح يا وَسْفَه يَزينب تركبين اعْلَه الجمال
حيّته بحسن تحيّه وسر گلبها ابْنخوته

صاح زينب يالذي من گبل چنتي امدلّله
اتروح شيعتكم طبگ فوگ الصّعيد امجدّله
أرواحنا تطلع ولا تركبين ناگه امهزّله
فدوه لحسين الشّفيّه اتروح كلها شيعته


اترك تعليق

avatar
  Subscribe  
نبّهني عن