الوزن : الهجري
الموضوع : مسلم بن عقيل

صورة الشاعر
اسم الشاعر : ملا عطيه الجمري

مسلم بن عقيل وأولاده


رثاء مسلم بن عقيل

مسلم ابْولية أعادي وين گومه وعزوته
فوگ عالي الگصر حزّوا يا ضياغم رگبته

انذبح ودموعه اعْلَه أهله فوگ وجناته تخر
وگع راسه وجثّته يا خلگ من فوگ الگصر
والرّوايا شهِّروها واشهِروا اسيوف النّصر
وخل ابو فاضل وسط كوفان ينشر رايته

راية الكرّار نشروها وثوروا بالفزَع
على الكوفه وزلزلوها امْن الگصر مسلم وگع
شانكم عز ومعالي ما تعرفون الجزع
وين ابو سكنه الشّفيّه ما يذب اعمامته

الكم يبو سكنه جنازه مالها مواري ترى
امْن الگصر للگاع خرّت بالتّراب امعفّره
اجنازة الطّاهر ابن عمّك اضلوعه امكسّره
تنسحب فوگ الصّخر بين الخلايگ جثّته

يا صناديد الحريبه وين ذيچ المرجله
بالحبل ينسحب مسلم چي رضيتوا يا هله
ما جرت عاده الجنايز تنسحب بين الملا
وين عبد الله بن مسلم ما يعاين حالته

وين ابو سكنه الشّفيّه ما يسل سيفه ويثور
وين جعفر وين عبد الله وعثمان الغيور
عن ذبيح ابدار غربه ما احتضى ابْنوم الگبور
لا يذلكم هالدّعي ابن زياد هجموا كوفته

يا ليوث الغاب چيف اعْلَه المذلّه تصبرون
هذا مسلم مثّلوا بيه شالسّبب ما تنهضون
يَبو فاضل يا علي الأكبر يَجاسم ما تجون
تنغرون الولد عمْكم ترفعون اجنازته


رثاء ولدي مسلم

خر على عضيده ودموعه اعْلَه الخدود منثّره
وذاب گلبه من نظر له يضطرب فوگ الثّرى

جذب حسره بَثَر حسره والصّدر فوگ الصّدر
يشعب گليب الينظره او ونّته اتفت الصّخر
ايصيح بيه اوداعة الله او آنا خويه اعله الأثر
ينشعب گلبي امْن اعاين هَلَوداج امهبّره

والرّجس ما لان گلبه او لا رحم منّه الحال
شهر سيفه وگطع راسه او عفّره فوگ الرمال
والعجوز اتصيح انا اشبيدي عليكم يَلطفال
والدتكم ريتها اتعاين جثثكم بالعرا

جبتكم يَولادي عندي ظنّتي عندي نجاة
صرت يَولادي سببكم واجْلبتكم للممات
روسكم راحت هدّيه والجثث وسط الفرات
ذبحكم نحل ترى اعظامي وگلبي فطّره

خالكم مذبوح وامكم ركّبوها اعْلَه الهزل
والأبو مسلم عگب ذبحه يجرّونه ابْحَبل
والمدينه امْن العشيره مقفره وخالي النّزل
غلّگوا ذيچ المنازل ولَبواب امغبّره

ذاب گلب امكم عليكم دابها تبچي وتنوح
راحوا أولادي ابهالبر في طلبهم من يروح
ليتني بس فارگوني امْن الجسد تطلع الرّوح
ابهالفضا فرّوا وانا من غير والي امحيّره


بكاء بنت مسلم

طلعت سكينه ويتيمة مسلم اتهيل التراب
فوگ هامتها وگلبها اندهش من عظم المصاب

تجذب الحسره وتنادي راح ابويه او لا رجع
وصرت من بعده يتيمه والگلب منّي انصدع
طود عزّي بالحفيره يا خلگ خر اُو وگع
اوحيد ما عنده عشيره حاير ابّلدة اجناب

اشْگالت ابوسط الحفيره يا حماي ارويحتك
حاير امچتّف ودم الوجه خضّب بردتك
من مسح دمّك ويا هُو الشد يَبويه طبرتك
بين عدوان وهلك عنّك يَبو طاهر اغياب

يَبوعبد الله يَبويه ريت واراني الگبر
ولا دهتني هالرّزيّه او لا سمعت ابْهالخبر
وانا كل يوم ارتجي اتجيني هدايا هالسّفر
كلّما اطرّش تحيّه ما ترد ليّه جواب

طلعت سكينه تسلّيها وتهل دمعة العين
اتصيح هاي اوّل مصيبه اتصبّري لا تجزعين
واطلبي امْن الله يسلّم عصمة الخايف حسين
والخلف بالله وبخوانچ صناديد الحراب

ريت يختي الدّهر يقنع منّچ ابهاللي جرى
چان ما كل هالعشيره تنظريها اعْله الثّرى
وچان ما جثّة ولينا تنظريها امطبَّره
وچان ما تخلى الخيم من كل شيخ وكل شاب

وچان ما نبگه غرايب ضايعات ابْلا ولي
وينذبح عبّاس والجاسم مَعَ الأكبر علي
وچان ما زينب عگب عزها وخدرها تنولي
وچان ما تهجم علينا الخيل ما بين لَطناب

بَسِّچ امن النّوح يَختي واتركي كثر الحنين
نطلب من الله نرد لَرض المدينه سالمين
يطلع الله يا حزينه چان ما نفگد حسين
ومن عگب عينه نضيع وننسبي بين لَجناب


 

اترك تعليق

avatar
  Subscribe  
نبّهني عن