إبن الحنفية والعليلة وهلال عاشوراء
لا تنشديني عن احوالي يَبنتي الگلب ذاب
هل عاشور وشعبني ومفرگي امْن الحزن شاب
شاب راسي يا حزينه وبيرگ العز انطوى
من بدى هلال المحرّم منخسف منّه الضّوا
واسمع يگولون اخويه نزل وادي نينوى
للبچا گومي استعدّي والبسي ثوب المصاب
گالت هلال المحرّم لو بدى گلّي اشْيصير
گال بيه اجساد توگع بالثّرى او روسٍ تطير
چنّي أنظر بو علي محتار معدوم النّصير
هالشّهر هذا اليفرّگ بينّا وبين لَحباب
نادته كثر البواچي والنّياحه ما تفيد
گوم واسأل عن أخوك حسين يا وادي يريد
واسأل الرّكبان عنّه ابيا بلد عيّد العيد
هالحچي خلّه شِعبت اگلوبنا يَبن لَنجاب
شالسّبب زادت احزانك من نظرت الهالهلال
ذوّبتنا لا تفاول على اخوانك هلَفوال
بالسلامه ايعود ابويه انشا الله وذيچ لَبطال
گال ما فاول يَبنتي وهالحچي عين الصّواب
يوم عاشر هالشّهر چنّي يمَحزونه أشوف
جسم أبوچ حسين عاري مگطّع ابْضرب السيوف
واخوتي هذا طعين وذاك مگطوع الچفوف
غسلهم فيض الدّما واچفانهم سافي التراب
صرخت وصاحت يَعمّي عن اخوانك ليش جاي
گلها لا تهيجي همومي امن الأسف ذايب حشاي
كلهم ايروحون وانا ما حصل لي على هواي
وانتي اتعرفين عمّچ ما يهاب امن الحراب
عزمي وياهم أروح وردني حسين الشّهيد
لولا أمره چان أنا اعليّه الدّرب ما هو بعيد
لَوَنْ حاضر يوم عاشر چان ذاك اليوم عيد
لَطُب واخبصها واخلّي السّيف يحصد بلرگاب
واحمل اعْلَه الميسره وعبّاس يحمل عاليمين
نصرخ اعْلَه الخيل ونشگ الصفوف مفرّعين
لكن اشْبيدي نصيبي ما احتضى ابنصرة حسين
گاعد وشغلي البچا وبنصرته اتفوز لَجناب
اترك تعليق