الخروج من مكة

خطاب زينب لابن عبّاس في مكة

لحد ايشور اعْلَه والينا يخلّينا ويشيل
ما نطيگ افراگ اخونا ولا نحب غيره كفيل

مالنا عيشه هنيّه انچان يتركنا ويروح
ويترك اديارٍ خليّه ويترك ايتامٍ تنوح
يبن عبّاس ارحم ابحالي ترى روحي تروح
والله ما فارگ عزيزي وين ماجد الرّحيل

چان خايف يذبحونه وننسبي سبي العبيد
روحنا من روح اخونا وعن گضى الله ما نحيد
وابصدرها انكسرت العبره وسفح دم الشّهيد
وصاح يختي انتي الوديعه من علي حامي الدّخيل

ولفراگ ايصير يا زينب ابوادي كربلا
جثّتي تبگى طريحه من دماها امغسّله
وانتي يختي اتفارگيني فوگ ناگه امهزّله
ما يظل ويّاچ غير ابني علي لكن عليل

وبيكم اتمر الأعادي وتنظرينا امصرّعين
ولا يخلّونچ يَمَحزونه الجثثنا اتودّعين
وتنظريني بينهم محزوز راسي وليدين
بالرّمح راسي وجسمي امرضّض ابحافر الخيل

وداع عبد الله بن جعفر بمكة

في أمان الله يَشمّامة الهادي ومهجته
اتروح وانتَ الحج لَكبر والمقام وكعبته

وين حجّك والمناسك وين هديك والنّحر
وين زمْزم والصّفا او وين المشاعر والحَجَر
تطلع وتتْرك الكعبه ما تگلّي اشْهالعذر
راد يتكلّم ابو سكنه وهلّت دمعته

صاح انا غصبٍ عليّه امْن ارض مكّه طلعتي
اتلومني والخبر عندك يَبن عمّي ابحالتي
همّة العدوان ذبحي وذبح گومي وعزوتي
ترضى دمّي ينْسفك والبيت تهتك حرمته

يعرفوني من گبل ما طيع للفاجر يزيد
ولا أحط للذّل راسي ولا أفر مثل العبيد
ولو يظل ظعني ابمكّه چان ما عيّد العيد
رِد يَبن عمّي وخل الدّهر يفعل رادته

وهالسّنه عيدي وحجّي اتعين ابْأرض الطّفوف
وارد اضحّي ابهالصّناديد الذي حولي اوگوف
هذا جسمه امگطّعينه وذاك مگطوع الچفوف
وهذا ما يحْظَه ابساعه بين عرسه وذبحته

لو تشوف اشلون اهرول من يناديني شباب
وابتدي بالتّلبيه والنّوح ما بين لَطناب
نوب صوب المشرعه وانظر گمر عدنان غاب
ونوب وسط المعركه للولد وارفع جثته

وانا بيت الله واظل من فيض طبراتي غريج
والحجر نحري يبن عمّي ويتاماي الحجيج
وتسمع الها حول جسمي امْن الضّرب حنّه وضجيج
بين اعادي والعدو تدري شديده وليته

وادي حجّي غير وادي والشّهر غير الشّهر
وتنگضي كل هالمناسك يوم عاشور الظّهر
أظل مرمي اعْله الثّرى ويركب على صدري الشّمر
يفري أوداجي او مُهجْتي امْن الظّما متفتته

وثوب لمخرّگ احرامي وينسلب فوگ الثّرى
والبس امخيط الدّما وابگى رميّه بالعرا
ويرتفع راسي على الذّابل وزينب تنظره
ويل گلبي وتجذب الحسرات كلما شافته ‌

وداع عبد الله بن جعفر لزينب

يالوديعه وداعة الله سافري ابْخدمة حسين
سفركم والله شعب گلبي اشْبيدي على العين

عايف اوطانه وحجّه وشايل ابگومه وهلَه
نشدته وگلّي أنا حجّي ابوادي كربلا
وانتي يا بنت البتوله مخدّره وامدلّله
اعْلَه السّرى بالبر وارْكوب الجمل ما تگدرين

ماخذ اخوانه ضحايا معزّم ايلاگي الممات
عيدهم عاشر محرّم والحرم شاطي الفرات
وتصبحين ابغير والي اميسّره وشملچ شتات
افراگكم يصعب علينا وهالگضا جانا منين

والله لو ليّه استطاعه چان فزت ابْنصرته
وافدي ابروحي يَزينب دون اخوچ ومهجته
اُوياه أنا اتمنيت اجاهد وانذبح مثل اخوته
لكن اولادي ثلاثه وللسّبط منهم اثنين

هذي أولادچ خذيهم يخدمونچ بالمسير
لو نزلتي او لوركبتي بالفيافي اعْلَه البعير
إنچان جيتوا الكربلا وشفتوا السّبط ماله نصير
بذلي أولادي ضحايا دون ابن طه الأمين

رفع صوته بالعويل وصاح وادموعه تصُبْ
سامحيني اوداعة الله وانشعب منّه الگلب
نادته امسامح يَبن عمّي ترى افراگك صعب
لكن امفارگ الرّوح اهون من امفارگ حسين

مگدر اعْلَه افْراگ اخيّي وين ما حط ونزل
راضيه ابْگطع الفيافي اوياه وركوب الجَمَل
واطلب امْن الله يسلمه ويجتمع بيه الشّمل
هالمعزّه عگب اخويه حسين تحصل لي منين