في رثاء أمير المؤمنين

وقوعه بالمحراب

وگع بالمحراب حيدر يشد بيده طبرته
غاله الطّاغي بن ملجم ويح گلبي ابْسَجدته

صارت الصيحه وطلعت كل بناته والبنين
وزينب تنادي دگوموا يخوتي اتهدّم الدّين
بالسّما جبريل ينعى انصاب امير المؤمنين
وَسفه بعد المرتضى الإسلام طاحت رايته

زَلْزَل العالم ندا جبريل والكوفه تموج
والخلگ صارت ابضجّه والارض ظلّت تروج
والحسن فز بخوته او حيدر ابمحرابه يلوج
غارج ابدمّه او خضب ياويل گلبي شيبته

حال شيعة حيدر الكرّار يا حالٍ فظيع
من لفوا له وعاينوه امخضّب ابفيض النجيع
انفجعوا ونادوا عگب فرگاك هالامّه تضيع
وشالوا الكرّار للمنزل وتفجع ونته

وزينب اتنادي يَبو الحسنين بطّل ونّتك
هيّج احزاني وفت گلبي معاين طبرتك
يا حبيب المصطفى انقاسي عظيم امصيبتك
لو نقاسي من العدو كثر الشّماته وفرحته

عگب عينك ذلّت السّبطين يا حامي الجار
والدّهر يَمْأمّن الخايف علينا اليوم جار
مظلم العالم أُو وحشه من بعد فگدك الدّار
والنّبي ورضوان مستبشر وتزهر جنّته

‌‌وصاياه وعهده

يا حسَن يانور عيني اسمع يبويه للكلام
بعد فرگاي الله الله ابهالحريم وهلَيتام

باچر اتصبّح اولادي ونسوتي بحالٍ فظيع
يا حسن لَيْكون هالعيله عگب عيني تضيع
لاحظ الحرمه يَبويه وسكّت الطّفل الرّضيع
وآنا باچر تفگدوني وتبلغ أعداك المرام

يا حسن وامّا عضيدك مهجتي حسين الشّهيد
ليت عينك تنظره اعْلَه الگاع مگطوع الوريد
والخيول اتّدوس صدره وراسه يروح اليزيد
سكّن اگليبه تراهو من عگب عينك إمام

ودار عينه على اولاده ودمعه ابعينه يهل
صاح جيبوا لي أبو فاضل وزينب بالعجل
نادته زينب يَبويه هذا خيّي بو الفضل
يا علي يا طود عزّي اتموت مَتّم الصيام

فتح عينه وصاح يا عبّاس هذي ابذمّتك
هاي من عندي وديعه وطود لازم رگبتك
لا تضيّعها تراهي لايذه بحميّتك
لا تذل مادام راسك سالم وسالم الهام

گال انا او جعفر او عبدالله او عثمان العطوف
كلنا خدّام الوديعه وعزمنا يرد السّيوف
گال يبني چنّي ابعيني يبو فاضل أشوف
جسمك امجدّل وزينب حايره بين اللئام

نادته زينب يبويه عگب عينك وين اروح
وكل وكت تالي يَبويه شخصك اگبالي يلوح
جذب ونّه وگال مگدر يا وديعه على النّوح
دسْتعدّي يا حزينه للسّبى ودخلة الشّام

وفاته وشهادته

فارگت روحه او تِزلزل يا خلگ عرش الجليل
ماجت الكوفه وضجّت بالبواچي والعويل

والبنات الهاشميّه امن الخدر طلعت تنوح
والسّماوات العليّه اتزلزلت واعلن الرّوح
وزينب تنادي عسى روحي گبل روحه تروح
ليت تدفنّي يَبويه ولا تخلّيني وتشيل

واعولت واجذبت حسره والدّمع بالخد سال
تصيح يا عزٍ تگضّى وللمگابر گضى وشال
عجب يا سيف المنايا اتموت يا موت لَبطال
يا حسن يَحسين خلّونا عن الكوفه نشيل

ردّت الكوفه عليكم يخْوتي ردّوا الوطن
والدي شيخ العشيره شال عنكم واندفن
يا علي ابْعيد البلا جسمك يلفّونه ابْچفن
ما يفيد الأسف والحسره ولا ينفع الويل

گلت انا بشيخ العشيره الدهر يرجع لي سعود
عافني كهف الأرامل واستحب نوم اللحود
يا علي السّفره طويله لو على اولادك تعود
ذاب گلبي والجسد منّي على فراگك نحيل