اسقاط جنينها وخروجها إثر أمير المؤمنين
مهجة المختار صاحت والگلب منها انذهل
گومي تچّي لي يَفضّه وسنّديني بالعجل
گومي درْكيني انكسر ضلعي وسگط منّي الجنين
وانظري ادموم لبْصَدري اتسيل يا فضّه امنين
هشّمت منّي يَفضّه الجسَد رفسة هاللعين
بالعجل گومي اعرفيه امنين صاحب هالفعل
هالّذي كسّر اضلوعي ولطم خدّي اتعرّفيه
وذاك داحي الباب جالس بالعجَل روحي اخبريه
گالت ملبّب خذوا حيدر وليتِچ تنظريه
گايد الفرسان حيدر چيف گادوه ابْحَبل
طلَع لكن ذوّبت گلبي يَفاطم حالته
منكسر گلبه وتجري فوگ خدّه دمعته
حاير ويكسر الخاطر يوم دنّگ رگبته
وبالحبل مگيود ما چنّه أبوحسين الفحَل
شلون اخِبْره وعينه اتشوفچ يَزَهرا ورا الباب
يسمع الصّيحه ويشوفچ يوم طحتي اعْلَه لَعتاب
شفته يتحسّر واظن گلبه من الحسرات ذاب
گلت هسّا ايثور حيدر يشهر السّيف ابْزَعل
صاحت ام الحسن يدري بحالي الليث الجسور
ويترك العدوان تضربني وهُو اعليّه غيور
لكن ابگيد الوصيّه امگيّدينه ولا يثور
گومي تچي لي ترى جسمي من الضّرْب انتحل
طلعت ولن الدّروب تموج من كثرة النّاس
لگت داحي باب خيبر طوع يمشي اويَا لَرجاس
نادته حيدر ادركني او شافها او نكّس الرّاس
جذب حسره بَثر حسره والدّمع منّه يهل
شافته املبّب وشهگت صارخه ابدمعٍ سفوح
عگب عينك يَبِن عمّي ابهاليتامى وين اروح
والعبد بالسّوط ألّمها وهي بجنبه تنوح
اتصيح ورّم ترى امتوني العبد يا خير العمل
بالضّرب ورّم متنها وحيدر ايشوف ويحن
صاح صبري مثل صبري اعْلَه الهضم يم الحسن
كاتب الله يا بتوله انعيش بالذّل والمحن
لا تشعبيني ترى ابْنَار الحزن گلبي اشتعل
شكاية الزهراء وعتابها لأمير المؤمنين
المشتكى لله يَبو الحسنين من فعل لَصحاب
رحت انخّيهم او حتّى امْن النّواخي الگلب ذاب
مَدري تدري يا علي لو ما دريت بحالتي
رحت انخّي او لا شفت واحد يلبّي دعوتي
وجيت مهضومه وتجري فوگ خدّي دمعتي
دنهض وطالب ابحگي ليش متوسّد تراب
مَنْته داحي باب خيبر منْته طاعون الزّلم
ينّهب حگي وضلعي يكسر وعندك علم
لايذه ابظلّك يَكَهف الخايف شلون انظلم
مَنْته ليث الله يَحيدر چيف تفرسك الذياب
من شطَر مرحَب ابْسيفه ومن ردى بن عبد ود
ومن جلى ذيچ الكتايب عن الهادي يوم احد
تنظر ابْعينك عليّه يلْتوي سوط العبد
طايحه وتسمع ونيني يا علي فوگ لعتاب
من زغر سنّك يبو الحسنين جيدوم الحَرُب
غوث كلمن يستغيث امن الشّرق وامن الغرب
شالسّبب مَتْغيثني او مَتْني اسوّد امن الضّرب
والجنين اتعفّر وخر غصب من عصرة الباب
وين سيفك ما تسلّه وين عزمك يا فحل
وين صولاتك على الفرسان يا خير العمل
آه يَحبل الله المتين اشلون گادوك ابْحبل
جذب حسره وصاح يم الحسن بس من هلعتاب
هذا سيفي وساعدي وعزمي يَبتْ خير الورى
لو لي رخصه چان شفتي هلَوغاد امجزّره
ولا أسِمْعِچ تندبيني والضّلوع امكسّره
هاج عزمي يا بتوله وبالگلب شب التهاب
تِعْرِفيني ما ترد عزمي جنود امجنده
وسيفي ابحدّه المنايا اتلوح كلما جرّده
لكن ابگيد الوصيه هلزنود مگيّده
بالصّبر موصي عليّه المصطفى عالي الجناب
ظل يناشدها وتجري فوگ خدّه دمعته
وشهالعصابه يَبنت المصطفى وريحانته
گالت الطّاغي لطَم خدّي وعماني بلطمته
ونحل جسمي بنبتة المسمار يا ليث الحراب
دخول الحسنين عليها بعد شهادتها
صاح سبط المصطفى ودمعه على خدّه انحدر
ما تون امنا يَأسما ابحالها مَدْري اشْصدَر
ليش ما نسمع ونين امنا ولا نسمع كلام
انشاالله طابت العلّه وطاب ضرب ابن اللئام
لو يَأسما سافرت عنّه وخلّتنه ايتام
والشّهيد يصيح لاتْفاول ترى گلبي انكسر
سالمه وياليت يَبن امّي كلامي لا يكون
فالها فال السّلامه وليت علّتها تهون
گال خويه امنا نحيله او بهضها ضرب المتون
نسأل الله الضّلع لمكسّر من الزّهرا انجبر
وين يَبْن امّي السّلامه والجسد منها نحيل
والضّلع منها امكسّر والصّدر دمّه يسيل
ظنّتي يا نور عيني اليوم والليله تشيل
والأسف ما وصلت العشرين خويه من العمر
صاحت اسما يولاد المرتضى وروح الرّسول
ذاب گلبي ولَگدر احچي لْكم يَساداتي شگول
لكن الحجره ادخلوها وعاينوا حال البتول
وبالعجل ودّوا لَبُوكم يا ضيا عيني الخبر
وعلى الزّهرا يوم دخلوا عاينوها امّدّده
نايمه نومة الموتى اوْساد ماهي اموسّده
بالمصلّى ويل گلبي امسدّله عليها الرّدا
خرّوا عليها ومدامعهم تهل شبه المطر
علي والحسنين على نعشها
صاح ابوالحسنين ودموعه على خدّه تسيل
يا حسن يحسين ودعوا امكم ترى حان الرّحيل
جذب ونّاته وتزفّر وانتحب خير العمل
هالجنازه ودّعوها يا يتامى بالعجل
لا تكثرون البواچي جسْم ابوكم منتحل
طلعوا ايتام الوديعه بالبواچي والعويل
وزينب اتهل المدامع والگلب منها انفطر
لازمه ام كلثوم وتنادي غدر بينا الدّهر
هاي يا بويه الوديعه شلون تدفنها ابگبر
للگبر خذني وياها ولا تخلّيني وتشيل
والمصيبه حين وگفوا اشبالها فوگ النّعش
ومدّت ايديها على السّبطين والكل اندهش
وضمّت الأيتام ليها وماج واهتز العرش
واخذهم حيدر عن الزّهرا وعبراته تسيل
ومن رفع ذيچ اليتيمه عن صدر ذاك الشّهيد
يوم مرّت فوگ ناگه وشافته فوگ الصعيد
راسه ابخطّي وجسمه امگطّعينه بالحديد
خرّت تنادي يبويه شال ظعني بلا كفيل
اترك تعليق