بكاء الرباب لما نظرت وحشة الدور
جيت المدينه وهاج حزني ومفرگي شاب
وعاينتها ظلمه وخليّه ابيوت لَنجاب
وحياة راسك يا ضيا العينين يحسين
مِن يوم عاشر بالمحرّم يا ضيا العين
ما غمّضت عيني ولا بطّلت لونين
كل ساع تتمثّل بعيني يَبن لَنجاب
مَيْغيب عن عيني جمالك يا حبيبي
يا نور عيني انگطع من وصلك نصيبي
ولا فادني كثر الحنين وشگ جيبي
لهجر يعز الحرم بيتي واغلگ الباب
مرّت عليّ ايّام يا كعبة الوفّاد
بظلالك الضّافي عزيزه يَبن الامجاد
وهسّه مِحزْنه ولا انوضع راسي على اوساد
عميَت عيوني والگلب يا بوعلي ذاب
توگف اببّاب الدّار واتهل فيض لدموع
اتنادي وهي تجذب الونّه بگلب موجوع
يا بوعلي نگطع رجانا لو لك ارجوع
ماظنتي ترجع يَضنوة داحي الباب
وتجلس مع سكينه ابحَر الشّمس وتنوح
والدّار مكشوفه ومنها الدّمع مسفوح
اتگلها يَسكنه عگب عزّي وين انا روح
وحسين فت گلبي ونحل جسمي بهالمصاب
والله يَسكنه عگب ابوچ حسين ما عيش
ولَنسى مصاب الْنحَل جسمي ونغّص العيش
ولَنْسى اتْشتِّتنا وطلعتنا مداهيش
وارجالنا كلهم ضحايا فوگ لتراب
زينب ودار الحسين
وگفت اببّاب الدّار زينب والنّساوين
وتصيح وين حسين يا دار الميامين
يا دار وين اهل النبوّه والرّساله
واللي أفاض الله عليهم من جلاله
وين الانوار اللّي على ابوابچ تلاله
اُو وين لوفود اللّي ابمطاياهم امخيمين
يا دار وين اهل الرّياسه والامامه
اشمالج امظلمه اُو وينها ذيچ النّشامه
انجوم السّما چانت على اسگوفچ علامه
ونورچ يعم اعْلَه المدينه اشمال ويمين
يادار وين حسين اخيّي او وين عبّاس
اشبال ابويه اللّي على چتف النّبي داس
وين الگروم الهاشميّه الترفع الرّاس
بالعجل ردّي اجْواب خبريني عن حسين
اتگلها يهلّلي اعْلَه لَبواب اتخاطبيني
وعن بيت أبو طالب يَحورا تنشديني
ويّاچ طلعوا امْن المدينه وفارگوني
آنا أَنشدچ يالوديعه عن هَلِچ وين
عنّي ابجلاله وشرف وياهم طلعتي
آنا الأنشدچ عن الدّوله ماهو انتي
يَمخدّرة حيدر ابهالحاله رجعتي
بس اليتامى يا حزينه والنّساوين
أرد انشدچ شمس الوجود حسين وينه
أوحش الدّنيا وانطفى نور المدينه
وين لَبطال اللّي عن اشماله ويمينه
حرمه بلا وليان يا زينب ترجعين
أرد انشدج جسّام وين اُو وين لَكبر
وين الأسود الضّاريه من اولاد حيدر
جسّام وعضيده وعبد الله وجعفر
ذيچ لبدور السّاطعه اولاد ام البنين
اتگلها يدار حسين هاجت بي احزاني
منِّچ طلعت وحايطه الهودج اخواني
يحدون بالتّهجيد حلوين المعاني
وارجعت نحلانه ولا شوف الدّرب زين
مخاطبتها للدّار
ردّي عليّه اجْواب يا دار الولي حسين
وين لبدور اللّي گبل بيهم تزهرين
يا دار يوم اللّي طلعنا شلون ممشاي
وحسين واخوانه اليوث الغاب ويّاي
والأمر من عبّاس مشّوا الظّعن بهداي
ابهيبه مشينا والعشيره شمال ويمين
ابهيبه ارتحلنا وبالهضم جيناچ يا دار
راحت مشايخنا وصفينا ابولية اشرار
يا دار ما غير الحرم واطفال لِزْغار
عندچ تلوع وتندب وتنشد هلچ وين
يا دار غابت من سماچ اشموس طيبه
والغاب غابت عنّه اليوث الحريبه
سكنت حماچ البوم وغراب ابنعيبه
عگب التّلاوه والدّرس قفرا تصيرين
يا دار بظلال الأهل منّچ مشينا
وجينا بليّاهم عسى لا چان جينا
بعد اخوتي ابْيا عين اعاين للمدينه
مدري أنشدچ لو تنشديني عن حسين
يا دار خلّيناه بَرض الطّف عريان
ما له امواري والكريم ابراس لسنان
گوّه مشينا والتسوگ الظّعن عدوان
والظّعن ما غير العليل اويا النّساوين
وتالي رجعنا الكربلا وشفناه مدفون
ويَم گبر اخويه حسين هيّدنا بلظعون
ذابت على گبره اگلوب وعميت اعيون
وجينا وجبنا من دما اخوتنا نياشين
جينا ودم احبابنا تحفة سفرنا
والدّهر هدّم طود عزنا وانكسرنا
خلصت چتل شبّانّا واحنا انيسرنا
لو ردْت اعدّد هالمصايب ويني اُووين
اترك تعليق