الخروج من الشام والوصول إلى كربلاء

خروج السبايا من الشام

ظعن الحرم بالرّوس غادر بلدة الشّام
گصده المدينه وموكب النّعمان جدّام

طلعوا من الشّامات بدموعٍ ذروفه
يتذكّرون اهوالها وذلّة الكوفه
وگلوبهم صوب النّجف والطّف لهوفه
مَفْرَگ دربهم نزلوا النّسوه ولَيتام

مرور النساء بكربلاء

گولوا لحادينا يمر بالغاضريّه
انسلّم على الوالي وننصب له عزيّه

گولوا الحادينا يمر بينا على حسين
نبغي نزور حسين وانشوفه اندفن وين
والله لروّي گبر اخويه ابدمعة العين
وياليت فوگ الگبر تحضرني المنيّه

نادى العليل ومدمعه بالخد مذروف
اكسب اويانا اليوم يا نعمان معروف
مرّوا ابعمّاتي وخواتي برض لطفوف
گلّه فلا اعصي لك أمر يبن الشّفيّه

عرّج على گبر الشّهيد وصار لنياح
والعابد السجّاد من فوگ الجمل طاح
وزينب تنادي آه يا عزٍ گضى وراح
خرّت على گبره ويتاماها سويّه

نوبٍ تگوم ونوب توگع والدّمع سيل
تجري على خدها وبس تصيح بالويل
أهوت على گبره وبگت لترابه اتهيل
وتگول شوفوا باب گبر حسين ليّه

ظلّت تنادي يا يتامى ويا نساوين
هيلوا تراب الگبر بَدْخل بنظر حسين
وبَنْظر تچفّن لو بگى من غير تچفين
واسكن معه ولاريد هالدّنيا الدنيّه

واومت على خوها أبو فاضل تناديه
دگعد يمن گطعوا على جوده أياديه
ما ظن يخويه الشّام ترضى انشوف واديه
يَكرام ما تاخذكم الغيره عليّه

دگعد يراعي العلم راسي امْن الحزن شاب
مانا الوديعه من أبوكم داحي الباب
لوتشوف خوي شلون جسمي بعدكم ذاب
تدرون انا مگدر على ركوب المطيّه

زينب على قبر أخيها الحسين

لاحت اطفوف الغاضريّه والحزن زاد
يم گبر اخوي حسين وصّلني يسجّاد

لا حت بعيني كربلا وتفتّت حشاي
ابعيني اتصوّر يا خلگ تعفير ولياي
چنّي اعاين جثّة الطّايح على الماي
لگصد كفيلي واشتكي فعلة ابن زياد

خرّت من النّاگه وفرت مالها شعور
تنادي اخبروني وين اخوي حسين مگبور
شافت ضريحه واعولت والدّمع منثور
خرّت على گبره وصرخت واللطم زاد

دارن حريم حسين ويّاها ولَيتام
لجيوبهن شگن وزينب تلطم الهام
اتنادي يخويه جيت بيتامك من الشّام
ذابت ابهالسّفره مهج وانتحلت اجساد

دگعد احچي لك عن هضمنا يا ضيا العين
وانظر الحالي وحال سكنه والنّساوين
دشّوا بنا الكوفه وفزعوا النّاس صوبين
يتفرّجون اعْلَه اليتامى وكلهم اوغاد

وعاينت مسجد والدي وقصر الاماره
وذكرت دهر اللّي مضى وراحت اوطاره
كنّا ابمعزّه وسلطنه وهسّا يساره
هِچي يخلگ الله الدّهر يفعل بلمجاد

والشّام مگدر يَبو اليمّه اعْلَه التّفاصيل
عيّدت واحنا نطوف بيها اعْلَه مهازيل
بالحبل گادونا وعلي برجله زناجيل
وضيم الجرى اعلينه شعَل بالگلب وگاد

دگعد تلگانا ونزِّل هالنساوين
يا نور عيني باب گبرك گلّي امنين
ياليت ضمني هاللحد ويّاك يحسين
ترجع يخويه لوتظل اليوم لمعاد

زينب تجول على القبور

وصلت الحورا والحريم الهاشميّه
بعد اليسر باحزانها للغاضريّه

وصلت عگب گطع الفيافي والسّباسب
واتجسّمت جدّامها كل المصايب
وهاجت عليها احزانها من كل جانب
وگصدت الگبر حسين بالعيله سويّه

خرّت على گبر الشّهيد اتشم لتراب
اتگلّه يخويه اگعد وعاين مفرگي شاب
من شوفة الشّمّات گلبي يالولي ذاب
ويلاه من هضْم الجرى ابديوان اميّه

وگصدت گبر عباس منها الدّمع مذروف
اتگلّه تچنّى وگوم يا مگطوع لچفوف
وصلت يَبو فاضل العيله دنهض وشوف
تدري بعدكم يالكفيل اشْحَل عليّه

دگعد يَبو فاضل تلگى هالظّعينه
وعدّل محاملها ورجّعها المدينه
وانچان تسألني ترى امْن الشّام جينا
دربٍ كلف وارجاس مابيهم حميّه

صدّت ونادت گوم دلّيني يَسجّاد
جاسم وخوته وين مدفنهم ولَولاد
وعزوة عقيل وجعفر الظّفرين لَمجاد
گلها ابگبر كلها السّلاله الهاشميّه

وامّا علي الاكبر دفنته يَم ابونا
شفته وشعبني وگلت لازم تعزلونه
واولاد عبدالله بن جعفر يا حزينه
ويّا الهواشم والرّضيع ابگبر ابيّه

مدّت على الوادي بصرها وهملت العين
وصاحت ابدهشه كربلا وين الميامين
وين الأُسُود الضّاريه ومخيّمي وين
ومهجة الزّهرا حسين ردّي جواب ليّه

محاورة بين زينب وكربلاء

ردّت على الحورا الجواب الغاضريّه
نلت الفخر بيكم يَسادات البريّه

مهجة الزّهرا انتي تركتي حسين معفور
عنّه مشيتي وجثّته عمَّتني ابنور
واصبحت معراج السّما من يوم عاشور
بجسمه افاخر جنّة الخلد العليّه

أهل الكسا رب العرش عندي جمعها
جدّچ وابوچ وفاطمه والحسن معها
وشافت اخوچ امرضّض اونسيَت ضلعها
ست النّسا ونصبت ابهالوادي عزيّه

بضعة الهادي يالوديعه عندي تنوح
وعندي نزل آدم يَزينب والنّبي نوح
والانبيا ليل ونهار اتزور وتروح
ولَملاك عندي كل صباح وكل مسيّه

ربي حباني بشرَف من بين الأراضين
وجبريل ناول تربتي خير النبيّين
ابدمعه مزجها وگال هذي تربة حسين
وهذا الخبر معلوم عندچ يا زچيّه

گالت يَروضة كربلا فزتي بجواره
معراج صرتي للسّما ابشعّة انواره
وانا احزاني تهيج لو طبّيت داره
وظلمه وشفتها وخاليه وچانت امضيّه

منها طلَعت ابهودجي اتحوطه شياهين
عبّاس گايد ناگتي وجدّامي حسين
وارجع بلا وليان بايتام ونساوين
واسمع عليها ينعب غراب المنيّه

هاي المصيبه المالها بالدّهر ثاني
صبها على راسي يخلگ الله زماني
في يوم واحد فاگده جملة اخواني
نلتي الشّرف بگبورهم والحزن ليّه

لقاء جابر الأنصاري بالسجاد

دنهض يَجابر وَصَّل السجّاد مكسور
جسمه نحيل ومدمعه بالخد منثور

بالعجل گوموا استقبلوا شيخ العشيره
ويّا اليتامى جاي بالذّل والكسيره
من بيت أبو طالب ترى ما ظل غيره
گام ابعجل جابر وگلبه ابنار مسعور

تجري ادموعه فوگ خدّينه اوينادي
وينك يَشبل حسين يا مهجة الهادي
ما ظنّتي بگّوا عليكم هالأعادي
مولاي خبّرني اشجرى بَيّام عاشور

اتزفّر ابو امحمد وگلّه ابدمع همّال
إسكت يجابر لا تسايل عن هلَحوال
چم شاب ظل امغسّل ابدمّه ولا انشال
مثل البدر خدّه على التّربان معفور

والله يجابر لو شفت صاحب الصّولات
مفضوخ راسه طايح ابجانب المسناة
جوده على اچتافه وهو ظامي الچبد مات
والطّفل يا جابر نظرته ابْسَهم منحور

لو شفت شبْه المصطفى اللّي مدلّلينه
جابه ابويه حسين جسمه امگطّعينه
وجاسم يَجابر ذوّب احشانا بونينه
غابت ابطف الغاضريّه ذيچ لبدور

ومصيبة حسين الذي هدّت اركاني
من وگع عن مهره الهضم والضّيم جاني
ابعيني نظرته ايحز نحره ابن الزّواني
حزّوا كريمه وخيلهم غارت للخدور

وذيچ الخيَم كلها يجابر فرهدوها
وذيچ الحراير واليتامى روّعوها
وذيچ العزيزه اللّي نشَت بظلال ابوها
عگب الخدر والصّون مسبيّه على كور

والصيَّر ادموعي على خدّي ذروفه
ادخولي مع النّسوان بالذّله الكوفه
والكل علينا امْن الفرح يصفج اچفوفه
وزينب اندهشت بالمصيبه ولا لها شعور

تكسر الخاطر عمّتي يوم ادخلوها
الكوفه وهي متحيّره بايتام اخوها
ما خافوا امْن الله ابمجلس وگفوها
ذلها وتهكّمها الرّجس شرّاب لخمور

واعظم من الكوفه علينا دخلة الشّام
بيها نفانا ابن الخنا من دين الإسلام
والخلگ تتفرّج علينا الخاص والعام
كلنا على هزّل وراس حسين مشهور