دخول الشام ومجلس يزيد

ورود أهل البيت الشام

هالبلدة الگشره كفر لوبيهم اسلام
بس ما وصلناها علينا نشرت اعلام

عن هالبلد بالله دخبّرني يسجّاد
سبعين رايه استقبلتنا من هلبلاد
گلها وسالت دمعته وبيه الألم زاد
عمّه استعدّي للبلا هذي ترى الشّام

بالله استعدّي للمصايب يا حزينه
هالعسكر الجرّار هلّي تنظرينه
كلها يَعمّه تريد تتفرّج علينه
الله يعين اعْلَه الشّماته ونوح لَيتام

لمّي يتامى حسين يا عمّه ولَطفال
ونكسوا يَعمّه الرّوس لا تنظركم رجال
صبري ترى احنا بهالمشومه انقاسي اهوال
كل هلمصاب اللّي جرى والضّيم جدام

گالت يَعَگلي انچان ذوله النا مجبلين
أبرى يتامى حسين خيّي ويني اُو وين
ابهالحال من يگدر يباري عيلة حسين
ذاك الجمل طايح وهذا الجمل گدّام

أرد انشدك يا مهجتي يا زين لعباد
نلگى شماته تشبه امواجه ابن زياد
وانشوف ذلّه مثل ذلّة ذيچ لبلاد
گلها وتحدّر مدمعه بالخد سجّام

الشّام يا زينب أبد ما مش مثلها
تنسّيچ يَعزيزة هلي الكوفه وأهلها
ما يرحمون ايتامنا كفّار كلها
كلهم يَعمّه في أهل هالبيت ظلاّم

الشّام هذي اللّي تسمعين بذكرها
هاي المشومه اللّي تمادت في كفرها
الله يعين اعْلَه شماتتها وشرها
ما بينهم كنّا يسارى الرّوم خدّام

والشّام كلها گوّضت والكل ينادي
هلّي على ظهور الهزل من أيِّ وادي
وهذا يگول انياحهم ذوّب افّادي
وهذا ينادي هالسّبايا چنهم اسلام

وهذا يگول الرّوس چنها روس شجعان
وهذا ينادي هَلوجوه اُوجوه شبّان
وهذا ينادي هلحريم احريم سلطان
واللي على النّاگه امغلّل چنّه ايمام

وگفوا يويلي بالبنات الهاشميات
ابدروازة الشّامات حسّر ثلث ساعات
والشّام كلها معيّده وتضرب الطّارات
والكل يگول الصاحبه أبرك الأيّام

دخول السبايا وسؤال سهل الساعدي

بدروازة الشّام اوگفت ذيچ الخواتين
والشّام مرتجّه واهاليها معيدين

كل الخلايگ لابسين اجديد لثياب
ولا بگى من اهل البلد شيخٍ ولا شاب
وال الرسول منكّسين الرّوس بالباب
وزين لعباد ايصيح وين الهاشميّين

بالأمس حولي من بني هاشم صناديد
فرسان كلهم والحرايب عندهم عيد
واليوم اعالج فوگ ناگه ابجامعه وگيد
الگيد حز ساگي وغلهم حز ليدين

وأگبل سهل والنّاس تتراكض بلدروب
يگولون راس الخارجي في وين منصوب
شاف الاسواگ معطلّه والكون مگلوب
والكل ينادي جوا سبايا الخارجيّين

وعاين يتامي فوگ هزّل في بچا ونوح
وامن الضّرب والسّير ما ظلّت لهم روح
وحده تنادي عگب عزّي وين انا اروح
بيني وبين حجاب صوني فرّگ البين

سلّم عليها وگال يلّي اعْلَه المطيّه
والله حنينچ زيد احزاني عليّه
يخسون اهل هالبلد منتي خارجيّه
چنّچ يمسبيّه من اشيوخ لمسلمين

گالت أنا جدّي النّبي صفوة الجبّار
وابوي حيدر قاسم الجنّه مع النّار
ومكسورة الأضلاع شمّامة المختار
أمّي وانا زينب واخوتي الحسن وحسين

گلها الحسَب والنّسب هلّي تذكرينه
معروف وان صح الخبر جدّچ نبينا
لكن يزينب وين خدر اليوصفونه
تركبين حسره فوگ ناگه واخوتچ وين

گالت لَتسألني وعاين روس لرماح
ذاك الخدر يا سهل عنّي گوّض وراح
واعمود خيمتنا حسين اتزلزل وطاح
بديار غربه يا سهل ضيّعني حسين

وانچان عندك يا سهل شيٍ من المال
هالرّجس خلّه ايميل عنّا ابروس لرجال
گلّه يصد ابروس اهلنا عن هلعيال
والله اختزينا وذابت گلوب النساوين

للرّجس راح يناشده بالله ورسوله
والمال سلّم له وعبراته هموله
تمرّد الطّاغي ورد نصب روس الحموله
بين المحامل والخلگ عكّف الصّوبين

ما بين ماهي فوگ ناگه اتصعِّد انفاس
لن الرّجس جاها وكل جانب نصب راس
واگبالها راس لحسين وراس عبّاس
صاحت يخويه هالمصايب جتني منين

دخول الشام وأحداث مجلس يزيد

بس ما وصل ظعن السّبايا وادي الشام
طلعت أهلها معيّده برايات واعلام

يا عظم وگفتهم ابدروازة السّاعات
كلها بلا ستور وعليها الخلگ لمّات
ومن الحرم واطفالها ارتفعت الضّجّات
واگبالها فوگ العوالي الرّوس جدّام

وطافوا على كل الشّوارع بالظّعينه
وبالرّاس مرّوا على ام اهجام اللعينه
وبنت العواهر بالحجر صكّت جبينه
وتگول هذا راس بِنْ مِيتم الايتام

وزينب على كور الهزيله وشافت الحال
نطحت المحمل وانفجر دمها ابولوال
وتصيح دمّي مثل دمّك يالولي سال
ويلاه من ظلم لَرجاس وجور لَيّام

وشام المشومه مزيّنه بجمل الزّينه
كلها امعيْده والظّعن هايج حنينه
ومغلوله ابرگبة علي اشماله ويمينه
وبالحبل ربقوهم وطبّوا مجلس العام

وطشت الذّهب جدّام بن هند اللعينه
ومن كشف عنّه سطع نوره من جبينه
وكسّر اضراسه ليتها انشلّت يمينه
انتحبت سكينه وفاطمه تلطم على الهام

سكران گام ابن الخنا نسل الاراذيل
يتبختر ويسأل عن النّسوه ولعليل
والرّاس شاله ورفع عن وجهه المنديل
يراوي الرّباب وشافته چنّه بدر تام

واعزيزة الزّهرا اجلست والدمع جاري
جانب من المجلس وحفّتها الجواري
ونادى باسمها ونادته والگلب واري
يبن الطّليق ويا نسل عبّاد لَصنام

احنا أهل بيت النبوّه والامامه
الحمد لله اللّي حبانا بالكرامه
عترة الهادي اجلبتها نسوه ويتامى
فرجه وشماته بمجلسك للخاص والعام

يزيد ينكت ثنايا الحسين

دشّوا ابروس اهل المعالي مجلس الضّال
ويّا اليتامى امچتّفه بگيود وحبال

وراس ابن فاطم بالطّشت ينظر له يزيد
بيده قضيب ويصفج ابإيدٍ على إيد
ويگول يَهْل الشّام سوّوا الذبحته عيد
من بيت حيدر مابگت بس حرم واطفال

وصد الرّجس للرّاس صابه ابخيزرانه
ويگول هذا ابن الذي رمّل نسانا
يحسين چم مرّه الهضم منكم علانا
بوكم قتل عتبه وشيبه گروم لرْجال

ثار العشيره من علي ابذبحك دركته
العبّاس عن شيبه وعتبه بثاره انته
وثار الوليد ابنك علي لَكبر ذبحته
واولاد هاشم كلهم ازياده ولَبطال

مَتشوف عينك چيف جبنا امخدّرتكم
من غير والي ابمجلسي طبّت حرمكم
ماحد تخدّر بالحراير مثل ختكم
تضرب النّاس ابخدرها يحسين لَمثال

وانا هْتَكتها وركّبتها فوگ هزّل
خلّيتها فوگ الهزيله ادموعها اتهل
عزها وخدرها الأولي بالذّل تبدّل
وهذا الدّهر شانه ابصروفه يبدّل احوال

في وين عزوة هاشم أُو وين الفوارس
زينب عزيزتكم ذليله بالمجالس
ابليّا ولي ويزيد فوگ التّخت جالس
متحيّره والدّمع فوگ الخد همّال

وقوف زينب بين يدي يزيد

ابمجلس يزيد امخدّرة حيدر الكرّار
من غير والي تصفج اليمنه بليسار

وسجّادهم واگف ودمعه فوگ لخدود
امريض وجسمه منتحل من ثگل لگيود
وزينب تنادي ليت دهري بالولي ايعود
واتعود دولتنا وترجع ذيچ لَوطار

أنا الذي ما سمعت الأجناب لي صوت
من حول خدري رجال ما ترهب من الموت
وبيت النّبوة الما جرى مثله بلبيوت
عندي اخوانٍ تهزم العسكر الجرّار

لو ردت أزور المصطفى ويّاي حيدر
كل اخوتي عندي وحولي سيوف تشهر
اولا واحد الشخصي من الأجناب ينظر
ابهالحال من داري إلى مسجد المختار

صاحب الغيره يخمد انوار القناديل
خايف علي‍ه تنظر اخيالي الرّجاجيل
ليته يعاين حالتي ابمجلس الضلِّيل
عگب المعزّه يا علي دهري عَلَي جار

جار الدّهر وافنى ارجالي والصّناديد
ما ظل لي غير العليل وناحله الگيد
وتالي زماني ابيسر حسره ابمجلس يزيد
وانا العزيزه مخدّرة حيدر الكرّار

أحوال أهل البيت في المجلس

زين لعباد يصدّع الجلمد نحيبه
من شاف زينب عمّته بمجلس غريبه

كلها بلا ساتر بنات المصطفى اوگوف
والنّاس تتفرّج عليها وحولها صفوف
والرّاس يزهي بالطّشت وعيونه تشوف
نسل العواهر كسّر اضراسه بقضيبه

دار الشّراب وگام يتغنّى وشرب كاس
ظل ايتبَختر والعليل امنكّس الرّاس
من عاين الذلّه وعاين كثرة النّاس
ويصيح والله شيّبتني هالمصيبه

وذاك الرّجس صوب الحريم ايدير بلعين
ويگول في وين الرّباب اعزيزة حسين
زاد الحزن بيها ولاذت بالنّساوين
صوتين نادى باسمها وعيّت تجيبه

گالوا انچان اتريد منها رد لجواب
احلف عليها براس ضنوة داحي الباب
شال الكريم وعاينت له والگلب ذاب
ظلّت تنادي يا خلگ وشهالعجيبه

راسك ينور العين شفته والدّمع سال
يصعب عليّه من انظره بعيني ابهالحال
ويصعب عليك اتشوفني ما بين لرجال
يحسين مثلك في الخلگ من وين اجيبه

مَتشوفنا كلنا حيارى والعدا اعكوف
تتفرّج اعلينا ونتستّر بلچفوف
محّد يخاف الله ولا يعرف المعروف
مَتْشوف زينب تجذب الونّه كئيبه

گلها يزيد الرّجس بطلي من نواعيچ
وحياة راس حسين حاچيني واحاچيچ
شفتي الزّمان اشفعل بحسين وعمل بيچ
خلاّه بالرّمضا وجابچ لي غريبه

وذاك الخدر والعز ما يرجع ولايعود
مالچ كرامه الاّ الهضيمه وشد لگيود
صاحت يظالم عگب ذبحة سر لوجود
لَگضي العمر ثكلى على امصابه وكئيبه

بنات يزيد في المجلس

طلعت بنات ايزيد كلها بفرح وسرور
وهند اُو وصايفها وجلسن خلف لستور

شمتت بنات ايزيد وحريمه بليتام
من عاينوا الهم حايرين ابمجلس العام
بالحبل مچتوفين كلهم مثل الأغنام
ما بينهم زينب تهل الدّمع منثور

وابن الخنا الطّاغي يصدّ الها بعينه
يگلها شفيت الگلب منّچ يا حزينه
الكرّار بحروبه دريتي اشفعل بينه
ابصفّين فاضت من دم الفرسان لبرور

واحنا عگب صفّين يا زينب نذرنا
اعْلَه بوچ واخوانچ انچان الله نصرنا
وانچان بولاده عگب عينه ظفرنا
نسبي بناته ونترك اولاده بلا گبور

منكم شفينا گلوبنا والثّار اخذناه
وجبناچ فوگ امهزّله وخدرچ هتكناه
وصوتچ گبل ما ينسمع واحنا سمعناه
ردّت جوابه ويل گلبي ابگلب مكسور

ظنّيت يوم الضيّگت بينا الوطيّه
وارجالنا جرّعتها كاس المنيّه
اتنال العلى ونهون عِدْ رب البريه
واحنا بَنينا الدّين يا شرّاب لخمور

تحجب بناتك والنّبي تهتك بناته
بسبي التّرك والرّوم تسبي مخدّراته
وشفاعلين اتواجهونا ابهالشّماته
الرّايات منشوره وراس حسين مشهور

صد وزبرها وزادها ذل وهضيمه
وراس العزيز حسين شاله مْن الكريمه
ذوّب گلبها وهيّج ايتامه وحريمه
وضجّت اگباله بالبچا ربّات لخدور

رأس الحسين في الطشت

طشت الذّهب خجلان من شعّة امحياه
تسطع أنواره والرّجس ينكت ثناياه

براس الرّمح نوره ومحاها ظلمة الليل
ما تحجب انواره طشوت ولا مناديل
وبكل صراحه يرتّل القرآن ترتيل
واعلن ابتأويله على الخطّي ومعناه

انذهل من عاين جمال حسين واحتار
شافه على بعد المسافه يسطع انوار
حاول ابمنديله يحجبه عن النظّار
واشتغل باوصافه وبگى يعدّد مزاياه

وعاين المجلس من عگب ذيچ الشّماته
الكل شبح عينه وصابتّه انبهاته
وگالوا شفاة المصطفى لثمت شفاته
وظل ينكت ابثغره عسى تنشل يمناه

عن فعل ابوسفيان من خبّر حفيده
وافعال هند وعن عداوتها الشّديده
بَأسْنان حمزه مْن الرّمح غط الحديده
وذيچ النّجيبه اتوزّعه واتفصّل اعظاه

ما بيه فخر عگب الذبح تكسير لَسنان
عيب ونقص تعبث حرم باجساد لَعيان
الفخر بالميدان وامكافح الفرسان
ينصى جبيله ويشتبك بالعرك ويّاه

لو كر ابوسفيان للحمزه ويلاگيه
چان الأسد خلّى عليه تنعَى نواعيه
وايزيد لوشاف الشّهيد وضرب ماضيه
گبل الملاگى چان حتف الموت لاگاه

عن ثغر أبو السجّاد شيل الخيزرانه
لَتْفرّگ اشفاته ولَتكسّر اسنانه
نور النبوّه يلوح من مبسم حمانا
ينشي التّلاوه ويلحظ ابعينه يتاماه

استنكار سكينة ضرب ثنايا أبيها

زينب يعمّه انشعب گلبي وصار شطرين
هالرّجس شوفي شْيعمل براس الولي حسين

ريحانة الهادي وثمر گلبه وحبيبه
بالطّشت راسه ياخلگ واعظم مصيبه
الفاجر يزيد ايفرّگ اشفاته بقضيبه
ويترنّم امكيّف دهلّي الدّمع يا عين

عز الهواشم من عگب ذيچ الفراسه
بالبر جسمه وبالطّشت ياخلگ راسه
شوفي يعمّه ابن الخنا كسّر اضراسه
الشّامات كلها ما بگت فيها مسلمين

ظلّت تجود بروحها زينب حزينه
اتنادي عسى متنا ولا للشّام جينا
يحسين والله سفرةٍ گشره علينا
يا مهجتي بيني وبينك فرّگ البين

خويه الهضم والضّيم من بعدك علانا
وبالشّام يَبن امّي اشبعت ضيم ومهانه
درفع قضيبك يالذي اتكسّر اسنانه
عن ثغر اخيّي ذابت گلوب النّساوين

بالشّام خويه انتحل جسمي والگلب ذاب
من كثرة النّظّار واحنا اوگوف بالباب
عگب الخدر ترضى يسيره اببّلدة اجناب
وايتامكم تلعي احذاي اشمال ويمين

مرّت علَيْ في الشّام ساعه اتزلزل اجبال
صرنا بوسط حلقه أجانب كلهم ارذال
رگبة علي وزندي ابحبل وارگاب لَطفال
مثل الغنم تمشي ورانا الخلگ صوبين

وادفوف تضرب والخلگ تهرع بلفراح
حتّى النّسا فوگ السّطوح اتصفّج الرّاح
كلما انسحبنا ضجّ‍ت اطفالك بالصياح
تسترحم الگايد وگلب الرّجس مَيْلين

يزيد يسأل عن المعركة

يسأل يزيد الرّجس گومه وشابح العين
للحرم وهْيَ امچتّفه بالحبل صوبين

عن خبر هاي المعركه شرحوا لي الحال
وشْكثر ويّا حسين من راجل وخيّال
ويوم الطلبتوا لي البيعه منّه اشگال
ولن زجر صاح اسمع كلامي وافتهم زين

وصّل الطّف الجيش ولْزمنا الشّريعه
وامْن العساكر ضاگت الأرض الوسيعه
وحسين عنده اعوان من باجي الشّيعه
سبعين واثنين وهلَه سبعه وعشرين

والصّبح من عاشر محرّم عمّر الكون
ولوذ الحمام امْن الصّگر منّا يلوذون
ساعه وخلصوا بين منحورٍ ومطعون
وهذي حرمهم واليتامى وراس لحسين

ولن واحد ايناديه لا تسمع كلامه
أولاد أبو الحسنين سوّوها قيامه
الجيش نصْ هايم ونصْ لاگى حمامه
مرّات ملكوها الشّريعه ومستميتين

گايدهم العبّاس والرّايه بيمينه
وكلما اسوَد الكون يتْشَعْشَع جبينه
مگدر اوصّف نقمة الحلّت علينا
وطب الشّريعه وگفّض الميدان صوبين

وامّا العجيبه يوم شال الماي بيده
وذبّه وبگى ينحب على حالة عضيده
وساعة الگشره من طلع مغضب ابجوده
يوم الجمل هيِّن وهيِّن يوم صفين

صوّل شبيه الزّلزله ببروگ ورعود
لازم البيرگ زين وامحافظ على الجود
طارن ازنوده وهاج بس ابطرگ لزنود
مثل الاسد يسطي وجاه السّهم بالعين

ولَزرگ سطى بعموده وصابه على الرّاس
خر بالتّرب والجيش نادى طاح عبّاس
وحسين حوّل للمعاره وفرّگ النّاس
يمّه گعد ساعه ورجع يصفج بليدين

وابنه علي لَكبر اشسوّى من عجايب
أفنى الجموع وگلبه امن العطش ذايب
ما طاح من صهوة جواده للتّرايب
حتّى ملا الوادي مصاويب ومطاعين

وحسين من حوّل على الجيمان زعلان
يحطم بسيفه وبالجثث فاضت الوديان
برواحها فرّت وظل خالي الميدان
لولا الحجر والسّهم مارد منهم اثنين

سؤال يزيد عن بيرق العبّاس

شيّ‍ال هالبيرگ يفرسان بيمينه
هذا امْن اهل كوفان لو أهل المدينه

ما صار بالرّايات هالرّايه مثلها
ابْضَرْب الهنادي مبضّعه يا گوم كلها
هالضّيغم اللّي شالها وبالعرك فلها
ملزوم صاحب هالفراسه اتعيّنونه

چنّي شفتها بيد حيدر يوم صفّين
يحمل على اهل الشّام بيها اشمال ويمين
شيّالها بالله عليكم گولوا امنين
گالوا نشرها بو الفضل حامي الظّعينه

لو تشوف صولاته علينا يوم جانا
وضيّگ علينا الواسعه وغيّم سمانا
وفاضت ابرور الغاضريّه من دمانا
مثل الأسد سدّد مسالكنا علينا

وزينب تنادي يا جمال الهاشميّه
عسى يخويه يردّك الباري عليّه
وبس ما صرخ زلزل نواحي الغاضريّه
زعلان لكن نور يسطع من جبينه

وطب للشّريعه وبالگلب لاهوب چوّاي
خاضه بيمينه وتَرَس جوده ولا شرب ماي
ويگول گبل ابن النّبي ما يرتوي حشاي
اشلون انا اشرب والعطش ماذي سكينه

وصوّل علينا ابزود وادْعانا شعايب
روس وجثث والخيل گحّمها المضارب
والگلب من حر الشّمس والعطش ذايب
عنّه ابذاك البر ملجا ما لگينه

لولا الگضا مَنگطعت اچفوفه امْن لزنود
وانحل عزمه يوم شاف اتخرّگ الجود
ومن ظهر ذاك الغوج طاح بْضربة عمود
وحسين گلّت حيلته من بعد عينه

وزينب تسمعه والدّمع بخدودها يسيل
ذكرت زمان حسين واخوتها البهاليل
وذكرت وليها يوم صكّ الخيل بالخيل
صرخت شعبتوا اگلوبنا لا تذكرونه

لتهيّجون احزان گلبي ابذكر عبّاس
چم حيد خلّى جثته تفحص بلا راس
شلّع مضاربها وعلى روس العدا داس
ليث الحرب لوگام ما چان انسبينا

خطبة الحوراء في مجلس يزيد

ابمجلس الطّاغي امخدّرة حيدر الكرّار
هزّت ابخطبتها مشاعر كل جبّار

وگفت ومچتوفه ابحبل وايتامها اتلوع
والحرم مربوگه وعلي السجّاد موجوع
واعْلَه الكراسي امْن لَوغاد صفوف وجموع
واعْلَه السّرير امكيّف وجالس الخمّار

فتحت ابحمد الله الخطابه واثنت عليه
اُوصلَّت على المختار جدها وانتمت ليه
وتالي لبن هند الرّجس صدّت تحاچيه
لتگول تبچي ولا تگول الدّمع نثّار

اتگلّه يَضنوة هند هاي امْن العداله
خلف الستار امحجّبات اصل الرّذاله
وبين لَوغاد امچتّفه ابنات الرّساله
تنقاد حسّر بالحبل كلها بلا ستار

يَبن الطّليق وشهّرتنا ابّبلدة الشّام
والكل يتفرّج علينا الخاص والعام
ظنّيت هذي لك كرامه من العلام
واحنا الهوان اينالنا يا صبية النّار

جد واجتهد مَتنال ذرّه من شرفنا
بعيد الرّجس عنّا وبالعليا انعرفنا
لا تظن ما تحصل النّقمه من طرفنا
بشراك دنيا وآخره بالنّار والعار

انبح مثل نبحة أبوك وشوف شيصير
لچلاب تنبح يا رجس والقافله اتسير
وامّا الشّهاده لخوتي كتبه وتقدير
برزوا المضاجعهم وفاقوا كل لَبرار

يا رجس هاي اچفوف تگطر من دمانا
وهاي المنابر تعلن بسبنا وجفانا
والنّصر من رب العرش دايم ويانا
والنا تصير العاقبه في كل لَدوار

سماع هند صوت العقيلة

من هالذي تخطب اُوتتلهّف شجيّه
تشبه علي الكرّار بَلفاظه وحچيّه

تشبه علي الكرّار سجعتها ونثرها
اعله ايزيد تتجرّى ولا سِمْعه انتهرها
هذي عجيبه بالعجل كشفوا خبرها
يگولون عند يزيد نسوه خارجيّه

گالوا خوارج والذي گامت خطيبه
وهزّت المجلس هاي مسبيّه وغريبه
يگولون اسمها زينب ومن اهل طيبه
وحسين أخوها اللّي انذبح بالغاضريّه

وزينب تفرّغ بلَسماع أبكار لَفكار
من جوهر الهادي ومن خالص الكرّار
گلبت الرّاي العام وابن الطّاغي احتار
وانكشفت اسراره وتبيّن كفر اميّه

هجمت بليّا شعور هند امكشّفه الرّاس
سبّت يزيد وصدّت اتخاطب الجلاّس
هالواگفه تخطب مهي زينب يهالنّاس
من بيت عصمه وفخر واشرف فاطميّه

يَيْزيد هالرّاس اليلوح اببّاب داري
هذا مهو راس السّبط صفوة الباري
وهالحايرات ابمجلسك والدّمع جاري
كلهن خوات حسين عز الهاشميه

وصدّت الزينب تگلها وتلطم الخدّين
الله يَزينب عگب ذاك العز تذلّين
ابمجلس يسيره والعشيره وين وحسين
گالت چتل خلصوا قضا الباري عليّه

كلهم گضوا وبگيت مبليّه ابهالعيال
من ديره الديره وعليل ابگيد واغلال
واللي يشوف الحال مانوصف له الحال
ولية عدو وكل اخوتي راحوا مْن ايديّه

شان الدّهر يرفع ارذال ويخفض اعيان
يا هند بالله اتفكّري والدّهر ميزان
من بيت امامه واگفه امچتّفه ابديوان
وانا العقيله اتبدّل اسمي خارجيه

خطبة الإمام السّجاد

ابجامع بني اميّه صعَد يخطب السّجّاد
وبيّن فضايح آل سفيان وبني زياد

سيطر على ذاك الجمع معنى الخطابه
للمصطفى المختار والكعبه انتسابه
وبيّن افعال يزيد وحسين ومصابه
وكلما خطب بيها البچا والنّوح يزداد

بدّل الرّاي وهاج بالمسجد الصّايح
عگب الشّماته والفرح صارت نوايح
وزاد البچا واتكشّفت ذيچ الفضايح
ولن الشّهاده باسم جدّه اتهز لَطواد

ينادي رسول الله محمَّد وانتمى وگال
جدّي رسول الله وانا مگيود بغلال
نبّه الغافل والتفت ليزيد بالحال
وگلّه باسم جدّي وابويه امْلَكِت لعباد

جدّك ابوسفيان گايد يوم لَحزاب
وجدّي رسول الله وابويه داحي الباب
وامّك هند وامّي شفيعة يوم لحساب
وحسين ابويه اللّي بگى عاري بلوهاد

مرمي ثلتيّام عاري بالتّرايب
وباليسر جابونا انقاسي هالمصايب
ترثة هند بگصورها واحنا بخرايب
نشرب دموع العين بيها والبچا الزّاد

هذا رسول الله مهو جدّي المختار
يَيزيد واحنا بالسبي امن اديار لدْيار
وكل عترته تنذبح حتّى اطفال لزغار
والحرم فوگ الهزل لاساتر ولا مهاد