حال القاسم بن حبيب بن مظاهر

حال القاسم بن حبيب لما رأى رأس أبيه

يا بوي دون حسين ضيّعت المداليل
وخلّيتني يابوي دمعي بخدّي يسيل

دون ابن حيدر طلّگت يا بوي دنياك
وتعفرّت بالغاضريّه دون مولاك
گصّر الحظّ ولا نصرت حسين ويّاك
ياليت صدري گبل صدرك داسته الخيل

نلت المعالي يوم خضّبت الكريمه
بدماك دون امدلّل الزّهرا وحريمه
فزتوا بعز المرجله لكن هضيمه
جلب الحريم ميسّره فوگ المهازيل

تعليگ راسك بين عدوانك علَي هان
من شفت راس حسين ياضي فوگ لسنان
مْع راس ابو فاضل وروس اشبال عدنان
فوگ العوالي كلّما هب الهوا تميل

گلبي تفتّت والدّمع بالخد همّال
ظنّيت هالوگعه يبويه ارجال برجال
ولن الحريم تنوح فوگ ظهور
الجمال هاي الحريم ابيسر في وين البهاليل

واگبل على زينب وگلبه ابنار ملهوب
وشاف الخلگ صكّت وضاگت ذيچ لدروب
وامخدره تنعى وبچاها يفت لگلوب
ويا عليل امغللينه بالزّناجيل

نادى ابصوته اتأمّلي يا هاشميه
أرد انشدچ شنهو الجرى بالغاضريّه
چنّچ الحورا مخدّرة راعي الحميه
گالت نعم زينب أنا بنت البهاليل

آنا التي ما شافت العالم خيالي
والنّاس ما نالت من العزّه منالي
واليوم ما يحتاج اوصّف لك احوالي
خلّيت اخويه اعْلَه الثّرى من غير تغسيل

آنا التي بالصّون موصوفه ولخدور
محّد حصل فخري وعزّي ابكل لدهور
واليوم من بعد الخدر حسره على كور
من عزوتي ما ظل عندي غير لعليل

نادى ودمع العين فوگ الخد سفّاح
شفنا الدّهرمن گبل راوى افراح واتراح
لكن مَشِفْنا روس تتعلّگ على ارماح
وامخدّره تركب على اظهور المهازيل

صاحت يهالشبّان يمّي لا تمرّون
تذوبون گلبي چان عن حالي تنشدون
ذكّرتني يَبني ابشبّاني ولغصون
راحوا وخلّونا حريم ابلا رجاجيل