دخول الكوفة، وخطبة العقيلة، ومجلس ابن زياد

العقيلة عند دخولها الكوفة

لاحت الكوفه ونار حزني اسعرت بيّه
دار الخلافه الوالدي حلو السّجيّه

هذي الكوفه چنها بيها ترفرف اعلام
دار المعزّه ابعهد ابونا كهف لَيتام
سلطنه ودوله وانطوت من جور لَيّام
ما ظنّتي اتعود لَوطار الأوليّه

بالأمس خدري ومنزلي ابگصر الأماره
وكل يوم ابويه ابحجرتي تسطع أنواره
والخلگ تتوسّل يطلبون الزّياره
وشخصي أبد محّد كفوا ينظر الفيّه

واخوان عندي اسباتعش توگف اگبالي
فرسان وآنا امخدّره والرّاس عالي
والخلگ تتحدّث ابناموسي وجلالي
واليوم اطب حسره وساتر ما عليّه

خلّوا اظعوني بالفضا وانا اتركوني
مَگدر أطب حسره واهلها يعرفوني
گبل الهضم والضّيم يا ليت ادفنوني
وياليت ظعني لا مشى امن الغاضريّه

مَگدر يخلگ الله على دخلة الكوفه
وگصر الإماره بعد ابويه اشلون أشوفه
بالأمس كعبه والخلگ كلها تطوفه
واليوم بيه ابن الرّجس ضنوة سميّه

رِدِّ الهَوَازل يا زَجر گلبي ترى ذاب
مَگدَر أطبّ وانظر منازل داحي الباب
مگدر أعاين مسْجده وانظر المحراب
أذكر زمان المرتضى وزينة حچيّه

صاحت يبو امحمد ابدخلك مستجيره
چان ادخلوني بلا ستر والله كسيره
منها طلَعت امخدّره وارجع يسيره
بلكت يسمّوني ابظلمهم خارجيّه

گلها يعمّه الأمر ما يحصل على اهواي
لو طاح بيدي ما مشيت ابولية اعداي
وهذي السّلاسل حزّت اشمالي ويمناي
صبري على ضيم الدّهر عمّه اشبديّه

دخول زينب والنساء الكوفة

بالأمس خدرچ ما جرى ابكل البريه
واليوم صار اسمچ يزينب خارجيّه

أسمع يزينب من هل الكوفة الملاعين
ايگولون هالنّسوه كفر ما هم مسلمين
ذوله خوارج خارجه عن ملّة الدّين
والله عجب مَتْسيخ بيهم هالوطيّه

الله يهل بيت النبوّه والرّساله
والما مثلكم بالفصاحه والجلاله
بين العدى تمشون حسرى ابذل حاله
وين الصّناديد الذي اتخوض المنيّه

حامي الظّعينه وين عبّاس لمشكّر
وحسين واخوانه مع الجاسم ولَكبر
ما ينظرون الحرم فوگ الهزل حسَّر
وين الظياغم ولگروم الهاشميّه

گالت على الرّمضا بگوا من غير دفّان
متغَسلين امْن الدّما والسّافي أچفان
وَسفَه عليهم والأسف مَيبرّد احزان
شبّان كلهم ما يهابون المنيّه

بشط الفرات اجروا من دموم العدا بحور
ماگصّروا فرسان هاشم يوم عاشور
لكن قضى الله والذي باللوح مسطور
مكتوب تحويهم اطفوف الغاضريّه

گلها وگلبه من لهيب الحزن ذايب
فرسان مع فرسان لو صارت حرايب
وامّا النّسا من شانها نوح ونوادب
بوطانها لرْجالها تنصب عزيّه

صاحت مشينه ولا بگينا هناك ساعه
وحسين منعونا الأعادي من اوداعه
ودخلوا ابْنا الكوفه يسارى ابهالشّناعه
هلّي دهاني وصابني امگدَّر عليّه

خطبة زينب بالكوفة

والله عجايب يا هل الكوفه تنوحون
وانتوا السفكتوا ادمومنا واليوم تبچون

لاهدَت رنّتكم ولا الكم نشفت ادموع
هذي العتره بين مأسورٍ ومصروع
وابهالمصيبه سيّد الكونين مفجوع
حتّى لطفال انفنت واعياله تيَسرون

طب وحصَرنا جيشكم بالغاضريّه
لا خافوا من الله ولا راعوا نبيّه
وكلْكُم خذلتونا ونصرتوا حزب اميه
يهل الغدر كل يوم بيعتكم تنكثون

عسكر الجرّار اللفى ما هو من الشّام
كلها هل الكوفه الذي هجموا اعْله لخيام
سلبوا حلينا اهل الخيانه وداسوا ايتام
همّتهُم اتْفرهد ثگلْنا ما يورعون

انتوا المنعتونا الوِرِد يا أخس لَرجاس
ومنكم الگطعوا على الجود چفوف عبّاس
والفاجر اللّي بالعمَد صابه على الرّاس
وخلّى بنات المرتضى بعده يضيعون

ومنكم الملحد حرمله ساس اللّآمه
تدرون وين ابن الرّجس نشّب سهامه
للعين واحد والمجد نكس اعلامه
واردى الرّضيع ابسهمه الثّاني الملعون

وامّا لمثلّث لا تنشدوني وگع وين
ابگلب النّبوّه والإمامه مهجة حسين
واهوى ايتلگى الارض يا ويلي بليدين
وحز الكريم ابن الضّبابي وزلزل الكون

وظل جسم عزنا حسين عاري على الغبره
ونخّيتهم ظنتي يوارونه بگبره
وطلعت من اولاد الزّنا اعْله الخيل عشره
صدره وظهره هشموه ولا يبالون

خطاب زينب لأهل الكوفة

چَنكُم يَهَل كوفان ما تدرون بينا
آل الرسول وحيدر الكرّار ابونه

تدرون بينا من حموله وعزوه وامجاد
صبح ومسا ما تنگطع عنّا الوفّاد
وتتصدّقون اعْلَه اليتامى ابفاضل الزّاد
يا ليت فاعل هالفعل تگطع يمينه

بالأمس ابونا حيدر الكرّار معروف
صاحب الغيره وبالكرم والجود موصوف
لولاذ بيه الخايف ايأمِّن من الخوف
والكون كلّه يستضي بغرّة جبينه

ربى يتاماكم واراملكم حماها
وسكّن ابونا جوعها وارْوَى ظماها
هذا الجزا تْسلبون من زينب رداها
بالأمس بمْعَزّه وهاليوم انولينا

بَسْ يا هل الكوفه علينا امْن الشّماته
ونَزلوا بعد هالرّاس من عالي قناته
فوگ الرّمح ويلاحظ ابعينه بناته
ولَيتام كلمن دمعته تجري ابعينه

والله يهل كوفان ذوّبتوا افّادي
هذا علينا حرّمه جدنا الهادي
جسمي انتحل من غربتي وجور الأعادي
ابليّا ستر والناس تتفرّج علينا

بوجوهكم صدّوا ويمنا لا توگفون
كلنا بنات المصطفى غضّوا للعيون
خلّوا الحريم اعلَه العزيز حسين يبچون
والله على الشبّان ساعه ما بچينا

دخول النساء على ابن زياد

دشّت على ابن زياد زينب والخواتين
ويّاهم السجّاد يهمل دمعة العين

والرّجس فوگ التّخت يتفرّج عليها
كلها بليّا استار تتستّر بديها
بيده قضيب وينكت ابْمَبْسَم وليها
ويگول هالّي امغلّل ابزنجيل من وين

گالوا علي گلهم علي ايگولون مذبوح
گالوا نعم لَكبر ابوادي الطّف مطروح
جدّام ابوه حسين ظل ايعالج الرّوح
وهذا الذي ظل من اولاد الخارجيّين

اتكلّم وابو امحمد يجيبه ابدمع سچّاب
گلّه بعد تگدر عليّه اترد لجواب
وآمر يسحبونه ابگيده فوگ لتراب
وضجّت الحاله بالبچا ذيچ الخواتين

وزينب تنادي وين عزنا ماخذينه
گلبي تگطّع هالولد لا تسحبونه
وانچان يا ظالم عزمكم تذبحونه
گبله اذبحوني عيشتي گشره بلا امعين

كلنا غرَايب ضايعات بلا رجاجيل
يا غيرة الله ما بگى لينا ترى اكفيل
بالله عليكم لا تسحبونه ترى اعْليل
بعده يخلگ الله نجيب النا ولي منين

گلها العليل ومدمعه بالخد يجري
زينب يَعمّه اعْلَه الهضم والضّيم صبري
أمر القضا واللي انكتب باللوح يجري
گلبي تراهو ذاب صوتِچ لاترفعين

گالت يَعَگلي الصّبر گوّض والجلد راح
ذوّبتني لوعات گلبي وكثر لنْياح
لو تطلع ابكثر البچا والنّوح لَرْواح
فارگت روحي يوم ودّعني ومشى حسين

لو يچتل الثّكلى الحزن والنّوح متْنا
ولو ضيم گلبي اعْلَه جبل ينهدّ ركنه
من ولية العدوان وين اللّي يفكنا
ما ظنّتي وصّل خبر للهاشميّين

محاورة زينب مع ابن زياد

زينب ذليله تخاطب الفاجر ابن زياد
ويگول منكم يا حزينه گضيت لمراد

بين العباد الحمد لله اللّي فضحكم
يا خارجيّه بتَرح متبدِّل فرحكم
صرتوا مَثَل بين الملا من بعد عزكم
كل اخوتچ منهم أراح الله لعباد

ردّت جوابه مخدّرة بيت الرّساله
الحمد لله اللي حبانا بالجلاله
ابذبحك لخيّي حسين واتْشِتِّت اعياله
يجازيك ربٍ غير ظالم يوم لمعاد

گلها غليل الگلب من خوتچ شفينا
هو بيتچ من حسين ومن اخوانه خليناه
وذاك الجمع كلّه فرد ساعه فنيناه
كلهم نظرتيهم بلا ساتر ولا وساد

شفتي اشفعل رب الخلگ بالعاصي حسين
مطروح خلّيناه عاري ابغير تچفين
والخيل داست جثّته وانتي تشوفين
وگرّت اعيون ايزيد وادرَك كل ما راد

هلّت دمعها وبگت تتمنّى المنيّه
واتصيح يا دهر غدرني وخان بيّه
ابليّا ستر والنّاس تتفرّج عليّه
واللي نحلني ركوبي النّاگه بلا مهاد

وان چان يَبن زياد يشفيك الذي صار
من ذبح ابو سكنه وحرگ الخيم بالنّار
وضيعة ايتامي وجيّتي الكوفه بلا ستار
منّا شفيت اضغون گلبك يَبْن لَوغاد

يا دهر لَگشر شيّبتني گبل لمشيب
عگب الهوادج ركّبوني هزّل النّيب
وعگب البطل عبّاس گايد ناگتي اغْريب
ومن بعد بيت المرتضى مجلس ابن زياد

أهوال الكوفه والشام

صبح اثنعش عاشور وصلت عيلة حسين
دروازة الكوفه واهلها اطْلَعت حزبين

ناس ابسرور امعيّده وطلعت بلفراح
وناس ابحزنها ونوح تصفج راحٍ ابراح
ومن الحزن فوگ السطوح ابدمع سفّاح
ينادون چنكُم يا سبايا الاّ مسلمين

وزينب على ناگه بمصايبها اتِّلوّى
وتصيح بيهم يا عديمين المروّه
احنا أهل بيت الامامه والنبوّه
بالمصطفى الهادي وابونا اتشيّد الدّين

وابن الدّعي خاف الگلوب تميل إلهم
وبيّتوا ليلة ثلتّعشَر في سجنهم
وسافر ابوالباقر الدَفن حسين عنهم
ابضحوة نهار ورجع يهمل دمعة العين

والمجلس الميشوم يوم اربَعتَعَش صار
وگفت بنات المصطفى ما بين فجّار
وابن الدّعي گلبه اشتفى من بيت لطهار
هذا يَدَهر الشّوم فعلك بالميامين

وگفت الحورا ترد على نسل الدّعي اجْواب
وأدّت رسالتها الوديعه بين لَجناب
من منطق الهادي وشجاعة داحي الباب
وخلّت الطّاغي امحيّر ايگلّب الچفّين

هاجت ضغونه ابن الدّعي وللسّجن ردهم
ونادى ابعجل يا شمر لَرض الشّام ودهم
ويلاه من گوّض من الكوفه ظعنهم
وضجّوا فرد ضجّه اليتامى والنّساوين

للشّام يا حيدر بناتك سيّروها
وكلما يمرّون ابمدينه شهّروها
وادروب وعره ابعترة الهادي اسلكوها
الله يَزينب من هَلمْصاب اشتقاسين

واعظم عليها ابهالدّواهي الواجهتها
يوم اصبحت واگبالها اجنازة اختها
وجتها الحوادي للمسير وطالبتها
صاحت ابذاك الحال يا عباس يحسين

يحسين يا عباس دهر الشّوم ذبني
ابهَالدّرب والعيله اُوبجنازه محنّي
وهاي الثّواكل بالنّياحه شيّبنّي
والرّوس منصوبه على راسي نياشين