في طريق الشام

سقوط الطفله وضياعها

ريّض يحادي الظّعن ساعه ابهالمطيّه
خل هاليتيمه الضّايعه تلحگ عليّه

ريّض النّاگه وارحم ابحالي يَميشوم
مَتْشوف حالة هاليتيمه اتّطيح وتگوم
ومثل الحمامه الرّاعبيّه تنوح وتحوم
وتصيح ريضوا لي ابهالنّاگه شويّه

يختي سكينه اعْلَه المطيّه ركّبيني
وآنا العزيزه اشلون بالبر تتركيني
مَگدر على گطع المسافه تعرفيني
ابهَلبر لَگفر تتركيني يا زچيّه

وسكنه على النّاگه تحن واتْدگ صدرها
وتجذب الحسره وتصد للطّفله ابنظرها
وكلما تگلّه يا زجر سبْها وزجرها
ويگول بس من هالبچا يا خارجيّه

صاحت لذب نفسي من النّاگه للتْراب
مَگدر اشوف اختي وگلبها من الشّمس ذاب
والمشتكى لله ولبونا داحي الباب
رد الرّجس ليها وچبده ملتظيّه

وحالة الگشره يوم وصّلها ولفاها
وسكنه على النّاگه وتشوفه يوم جاها
ابرجله رفسها وخرّت الطّفله ابثراها
ورد ورفع سوطه وهي فوگ الوطيّه

وظل يتلوّى السّوط والطّفله على الگاع
نوبٍ على الهامه ونوبٍ فوگ لَضلاع
وذيچ اليتيمه مالها ساتر ولا اگناع
ومن الضّرب بس تجذب الونّه خفيّه

اتصيح ابضعيف الصّوت بويه ضيّعتني
بين العدا ومن زغر سنّي يتّمتني
يا بوي من ضرب السياط اسود متني
وجسمي تراهو انتحل من ركب المطيّه

الرأس الشريف مع الراهب، وموقف أم هجام لعنها الله

راس الشّهيد حسين لو شمسٍ مضيّه
فوگ لسنان ايلوح خبتي يا أميّه

مرّوا ابدير الرّاهب وعاين انواره
بالرّمح يسطع والخلگ كلها حيارى
حتّى اليهود اتعجّبت ويّا النّصارى
راس ابرمح يتلو الكتاب اشهالقضيّه

بس ما سمع هلّت ادموعه صاحب الدّير
وأشّر وراد امن التّعجّب عگله ايطير
وگلّه يراس الفَخَر يا ريْس الجماهير
من يا سلالة شرَف يالنّفس الزجيّه

گلّه انا الذبحوا على صدره فطيمه
والظّامي اللّي بالعطش حزّوا كريمه
واللي على اظهور الهزل حسّر حريمه
هذا كريمي والجسد بالغاضريّه

جدّي حبيب الخالق وخير النّبيين
والوالد الكرّار حامي حوزة الدّين
وامّي شبيهة مريم وست النّساوين
وابّبيتنا الاملاك كل صبح ومسيّه

گلّه يروحاني الملا لو احْضَرِت يومك
چان انسفك دمّي گبل تسفك ادمومك
من گبل عدنا ابكتبنا واضح اعلومك
وهالدّير بانينه على اعْلومٍ خفيّه

منّك يَراس ابن البتول اطلب شهاده
امصدّگ ترى ابجدّك ومتوالي أولاده
يحسين واتبرا من النّاصب اعناده
لمّك وابوك ومن افعال الأوّليّه

شلون المسيحي ياخذه ابحجره ويرسمه
ويعتنق دينه ويسأل المعبود باسمه
واليدّعي مسلم يسب دينه ويرجمه
فكّر يَزاكي العگل واحكم بالقضيّه

إسلام دعواهم وراسه ناصبينه
فوگ الشّجر بحجار ظلّوا يرجمونه
واللي على الرّوشن تصك غرّة جبينه
مسلمه اتگول الفاجره بنت البغيّه

ينشي التلاوه يرتّل ابآيات مولاه
وصكّت جبينه بالحجَر وانفجرَت دماه
وزينب على كور المطيّه اتصيح ويلاه
يا جدّي المختار يالزّهرا الزچيّه

صكّت ابمحملها الجبين وظلت اتنوح
وظل الدّمع والدّم على الوجنات مسفوح
وتصيح بالذّل والحزن ما تطلع الرّوح
يحسين عيشه ابهالهضم گشره عليه

الناظم:
الخادم يَبو السجّاد بلّغته مراده
وهذي الكم يا صفوة الجبّار عاده
ومن فضلك وجودك بعد يطلب زياده
وصحّه ابخدمتك يرتجي منّك عطيّه