دفن الأجساد

إستنهاض الأسديات رجالهن للدفن

گلّت شِيَمكم والحميّه يا مسلمين
وين الذي ينهض يواري هالمطاعين

لبسوا مقانعنا وتخفّوا خلف لستور
واحنا ابعَمَايمكم نروح ونحفر اگبور
ندفن هَلَجساد الذي بالمعركة اتنور
مثل لبدور اعْله الثّرى كلهم مزهرين

رحنا گصدنا المشرعه وجينا المعاره
وشفنا جسد مرضوض واتْرَكنا حياره
أوصاله كلها امگطّعه وتسطع انواره
مگطوع حتى خنصره من چفّ اليمين

بالشّمس مرمي اعْلَه الثرى عريان مسلوب
وگلب العدو من شوفته ينْفَت ويذوب
مطعون بضلاعه وگلبه ابسهم مصيوب
يمّه رضيعه ونظن هذي جثّة حسين

ويمّه ولد مثل البدر جسمه ايتلاله
وكثر الطّعن والضّرب ما غيّر جماله
ما تنحصى اجروحه امگنطر على شماله
الله يساعد گلبها الفگدت هلثنين

وشفنا شباب اعْلَه الثّرى چفوفه خضيبه
عرّيس چنّه وزفّته الذبحه گريبه
الله يعين الفگدته وراحت غريبه
ما ظنّتي بين الذّبح والعرس يومين

جثّه بليّا راس ويّا جملة ابطال
كلهم عرايا امجزّرين اليوث واشبال
شبّان واكهول وبعد ويّاهم أطفال
بسهام مذبوحه اشعظمها فجعة البين

وفتّت مرايرنا بطل يم الشّريعه
مصروع لكن ذبحته والله فجيعه
حتّى من الزّندين چفّينه گطيعه
صاحب علَم چنّه وسلالة هاشميّه

من شوفته اتلوح الفراسه وشدّة الباس
ازنوده بليّا اچفوف والجثّه بلا راس
وانْظن عليه الفارس المشهور عبّاس
گطعوا على جوده العدا اشماله وليمين

حضور السجّاد لدفن الحسين

علّة وجود الكون جسمه بذيچ لَوعار
عاري ولا له غير وحش البر زوّار

مرمي ثلثتيّام لتْجَهَّز ولا انشال
رَدْ له عليله ابگلب واهي ودمع همّال
وبس عاينه فوگ الوطيّه افراشه ارمال
والجسد ما ينشال حن وظل محتار

كلما رفع جانب توزّع جانب وطاح
من حيث جسمه اموزّعينه بطعن لرْماح
خلّه الجسد وانهل دمعه وبالوجد صاح
يا بوي چيف نْشيل جسمك يَبْن لَطْهار

حيّرتني بيش اجمع أوصالك يَمَبرور
هذي لچفوف امگطّعه والصّدر مكسور
وبين الجسد والرّاس يَبن المصطفى ابرور
هذا الجسد والرّاس يتْشَهَّر بلَمصار

جابوا له گطعة باريه وجمّع أوصاله
ولفّه عسى عيني العما ودنّگ وشاله
وحطّه وسط گبره وتخوصر وانحنى له
وشمّه بنحره والضّماير تسعر بنار

انهدّت اركانه ويل گلبي وجذب حسره
اتحنّت اضلوعه يوم هال اتراب گبره
صاح انكسر گلبي وراح اللّي يجبره
امصاب الجرى عليه بكل الدّهر ماصار

لگضي يبويه بالبچا ليلي ونهاري
غيرك مَشِفنه مچفّنينه بالبواري
من عگب ما تبگه ثلثتيّام عاري
فوگ الثّرى وسترك يبويه ابهَلفلا غبار

يا گوم هالعِدْ رجل ابويه حسين لَكبر
هذا الذي من شوفته گلبي تفطّر
هذا الشّباب اللي على الدّنيا تحسّر
هذا الذي خلّى الشّهيد ايدير لَفكار

وهذي لَجساد اللي اندفنوا ابهلحفيره
من بيت واحد كلهم وكلهم عشيره
كل فرد منهم بالخلگ ما مِشْ نظيره
شبّان كلهم من سهمهم گصر لَعمار

رجوع السجاد بعد الدفن

گلبي شعبته ابغيبتك يخْليفة حسين
واظلم نهاري ومرمرت حالي النساوين

غيبتك يَبني هيّجت حزني عليّه
ابهالمرض جاي امنين يا باگي البگيّه
گلها يَعمّه جيّتي من الغاضريه
واريت اخوتي وادْفنت عبّاس وحسين

واريت ابويه وجيت بالحسره ولهموم
والله يَعمّه امن العوادي الجسد محطوم
والچفن سافي التّرب وامغسّل بلدموم
ذاك العزيز اندفن جسمه ابغير تچفين

گالت دفنت اهلك يَبَعد اهلي يَسَجّاد
روس اُوجثَثْ واريتهم لو بَس لَجساد
گلها يعمّه الرّوس طرّشها ابن زياد
ليزيد واحنا من بعدهم غصب ماشين

ماحد تدنّى امن الخلگ شگ الهم ارموس
غيّر محاسنهم يَعمّه حر لشموس
وادفنتهم كلهم يمحزونه بلا روس
وامّا البطل عبّاس لا راسٍ ولا ايدين

وليلى تنادي ذاب گلبي يَبْن الامجاد
بالله دخبّر عن عضيدك شيخ لَولاد
ذاك الجمال اشْحَل عليه من حر لوهاد
گلها يَليلى عن عزيزچ لا تسئلين

لا تسأليني عن علي حاله شَعَبني
بَس عاينت حالة عضيدي انهد ركني
سجّيت جثْته بْحُفْرته وازداد حزني
وكلما شِفِت طوله ابگبره هِملَت العين

وكل ام ولد فرّت تسايل عن ابنها
ورمله تهل الدّمع وتصيح ابغبنها
العرّيس گلّي اجنازته ياهودفنها
الله يَگلبي اشتحتمل من فجعة البين

گلها انكسرتي والكسر ربِّچ يجبره
العرّيس بيدي نزّلت جثته ابگبره
وياه اخوته اموسّدين ابفرد حفره
وگلبي انصدع من شوفته مخضّب الچفّين

وجتّه الرّباب تصيح گلبي من الوجد ذاب
بالله ارد انشدك يالذي واريت لَحباب
عن نور عيني حسين گبل اتهيل لتراب
شِلْت النّبل عنّه ونزَّلْت الجسد زين

ابيا حال شِفْت اجسادهم يا نور عيني
گلها ابعرا گالت أنشدك عن جنيني
شِفْته ابعينك گال بَسْ لا تشعبيني
واريت عبد الله الرّضيع ابحفرة حسين

صاحت يبو امحمد ترى حچيك شعبني
بصدر الشّهيد حسين چيف اموسّد ابني
يا ليت ذاك الگبر ويّاهم يضمني
وشلّي ابحياتي نغّصوا عيشي هلثنين