الغارة على المخيم وإضرام النار فيه

حرق الخيام بالنّار

زينب احتارت يوم شبّوا الخيم بالنّار
طلعت اويّاها الحريم زغار وكبار

تصرخ بعالي الصّوت طايح وين يحسين
خدري انهتك وانتَ غياث المستغيثين
عجّل ادركنا لايهتكون النساوين
لمّن سمع ظل ايتگلّب فوگ الاوعار

گلها يَزينب باليتامى لا تجيني
ولا تكثرين امن البواچي اتهيّجيني
وردّي اسكينه لا يذوّبها ونيني
لا تكثري عتبي ولا تجيني بلا خمار

لا تكثري عتبي وانا جثّه بلا راس
راسي اگبالچ والجسد بالخيل ينداس
روحي الشّريعه بلكت اتشوفين عبّاس
يگدر على النّهضه ويسل سيفه البتّار

صاحت دخيلك يالمگطّع بالشّريعه
ولن النّدا ردّي ترى اچفوفي گطيعه
للخيَم روحي ابهاليتامى يالوديعه
تدرون بيّه مگطّعه ايميني وليْسار

مَستحْمِل اعتابچ وانا جثّه بلا چفوف
مفضوخ راسي وجسمي مگطّع بلسيوف
غصبٍ عليّه يسلّبوچ وعيني اتشوف
وغصبٍ عليّه ابهالمخيّم تشعل النّار

مطبّر ومن جوفي انِّزفَت كل لدموم
شوفي علي الاكبر يَزينب بلكت ايگوم
أيَّست منّه وباليتامى ظلّت اتحوم
تنخه ومن كثر النّواخي گلبها طار

صاحت يَشبه المصطفى يمدلّل حسين
جيتك يَعگلي باليتامى والنساوين
وان چان يبني تعذّرتنا نلتجي وين
گلها يعمّه انتي نظرتي بجسمي اشصار

شفتي جروحي يا حزينه ولا خفى الحال
لولا الشّهيد اببّردته لفني فلا انشال
متوزّع مگطّع ولا يمنه ولا شمال
غصبٍ عليّه ضيعتچ ما بين كفّار

صاحت أجل لاروح للجاسم وانخّيه
وانتحب يَم جسمه وأمِش دمّه واوعيه
بلكت تردّ الرّوح ويردّ النّفس بيه
گلها يَزينب يا عزيزة حامي الجار

وجاسم بعد مثلي يعمّه لا تروحي
لكن أنا زودى بْسَبَب كثرة اجروحي
نوحچ شعب گلبي يعمّه لا تنوحي
سَلْمي على خيّي بقيّة آل الاطهار

ردّت تنادي ضاگت الدّنيا عليّه
كلكم تعذّرتوا وانا ابگيت اجنبيّه
حرمه بليّا رجال چيف اركب مطيّه
وعندي جنايز بالعرا ظلّت بلا ستار

الهجوم على المخيم

وگفَت تناشد بن سعد بنت الميامين
بالله ورسوله والدّمع يجري من العين

خلصوا هلي تگلّه ولا ظلّت لي رجال
ذبوا عليّه الحمل وملاحظ هالعيال
والخيم ممليّه حريم تنوح وأطفال
مَتْراگب الله تامر بحرگ الصّواوين

لحد يمر بينا وخلّونا ابهلخيام
عِدْنا عليل انمرّضه ومن حوله ايتام
بالله شسوّي لو يتيم تروّع وهام
ياهو يجيبه من الفضا وكلنا نساوين

ما رحم غربتها وگلبه صار جلمود
رخّص اجنوده على الخيام وغدت فرهود
نسوه ويتامى شلون دهشه وهجّة جنود
فرّن حواسر بلبرور اشمال ويمين

شحالة بنات المرتضى من هجمت الخيل
أرذال وگصدها النّهب ما يمكن التّفصيل
ضرب وسلب وايتام تلعى وهاجم الليل
والنار تسعر فكّر بحال الخواتين

هذي بليّا اخمار تتعفّر بلوهاد
وهذي ثلثتايام لا مايٍ ولا زاد
وهذي تنادي فرّوا أيتامي يَسجّاد
وزينب تصيح الغوث يا عبّاس يحسين

وهذي تلوذ بزينب وتشچي لها الحال
وزينب بْعَزْم وصبر تجمع ذيچ الأطفال
اتحوم بطلبهم ويل گلبي بروس لجبال
ونوبٍ تهيم وترجع بطفلين ميتين

ورثت من الزّهرا الهضايم والمصايب
وبصبر ابوها اتكافح اثگال النّوايب
حارت بامرها وبالعليل وبالغرايب
والليل ماسي وصفت بَس اتدير بالعين

التجاء زينب بالسجاد بعد مصرع الحسين

فرّت ابْدَهشه مخدّرة حيدر الكرّار
يم العليل تگول داگعد وانظر اشصار

يبني الشّمس غابت وهذا الكون مرجوج
والجو مظلم والأرض يا سورنا تموج
وحسين عهدي بشوفته من لاح بالغوج
والكون متعطّل واظن الفلك ما دار

اتحسّر وگلها بالبچا لا تهيّجيني
گعدي ولعد صدرچ ابراضه سنّديني
وكشفي السّتر يمخَدّره امن اگبال عيني
امتثلت كلامه والگلب مشغول بافكار

دنّگ وعاين للفضا وبطّل ونينه
وهلّت ادموعه واصفج اشماله بيمينه
گالت اشصاير گال يا عمّه انولينه
هذا العزيز حسين متجدّل بالاوعار

طايح أبويه حسين والعالم غصب ماج
غابت انواره ولا بگى للعالم اسراج
وان صدگ ظنّي والدي محزوز الاوداج
گومي يمحزونه استعدي الهتك الاسْتار

وصّاج ابويه حسين من بعده بلعيال
وهذا كريمه تنظرينه فوگ عسّال
وهسّه يعمّه الخيل تدهمنا ولرْجال
گومي اجمعيهم لا تفر وحده بلا خمار

گومي يعمّه وادركي النّسوه والايتام
عندي ادخليهم واتركوا باقي هلخيام
لحّد يظل بيها ترى العدوان ظلاّم
معلوم من بعد النّهب تنضرم بالنّار

صرخت وفرّت والگلب بالحزن مجروح
تنادي يتامى حسين تدْهشني عن النّوح
لوهجمت العسكر عليّه وين أنا اروح
وين التجي بَيْتام اخوتي ازغار وكبار

كلّفني ابن امّي بيتاماه وعليله
ما بين طفله مروّعه وحرمه ذليله
والا يتيم ويشعب الرّوح بعويله
بليّا ولي والليل مجبل والعدا اشرار

فزع النساء الى خيمة السجاد

شمر وزجر هجموا على خيمة السجّاد
شافوه يجر ونّات بيها زين لعباد

گلهم زجر هذا عليل وشالفكر بيه
قط من أهل هالبيت واحد ما نخلّيه
وآخر يگول الهالحرم سلوه نبگيه
جذبوا النّطع گوم الرّذاله وخذوا لوساد

فتّح اعيونه وصاح بالذّل والهظيمه
وعاين النّار مسعّره ولا بگت خيمه
ويمّه الوديعه بكل يتيم وكل يتيمه
والحرم منهوبه وعليها هجمت اوغاد

وين العشيره ووين ابو فاضل الضّرغام
ما يدركونا النّار مشبوبه بلخيام
والگوم نهبت كل ثگلنا وداست ايتام
وزينب تگلّه يا بقيّة بيت الامجاد

دگعد يعلّة هالوجود وفتّح العين
عندك تراهي اتلملمت كل النّساوين
هجمت علينا الخيل گلّي نلتجي وين
واللي ننخّيهم عرايا فوگ لوهاد

گلها يَعمّه ابهالفضا فرّي بلطفال
مَگدر على النّهضه يعمّه ولا لچ ارجال
والنّار ما بگت لكم خيمه ولا مال
فرّي يَعمّه بالفضا بيّه الألم زاد

فرّت بدهشه والاعادي ردّت اردود
وذيچ المقانع والبراگع غدت فرهود
واللي تدافع تنضرب وامتونهن سود
واعزيزة الكرّار فرّت صوب لجساد

فرّت مروعه شابحه العشره على الرّاس
تنخى وشظايا الگلب طارت ويّا الانفاس
يحسين دركونا يبو فاضل يعبّاس
لا ماي عدنا ولا خيم ظلّت ولا زاد

فرار اليتامى في البيداء

طلعت مصونه من عگب حرگ الصّواوين
اتنادي يزينب مهجة افّادي مشوا وين

وزينب ابذاك الحال تتفگد بالايتام
وشافت ثلث طفلات مسحوگه بلخيام
وچم طفل من هول المصيبه بالفضا هام
ولن الفقيده امن الايتام اثنين واثنين

من عصر فرّوا اثنين يا ويلي ابعمرهم
واثنين بالوادي وغدت تتبع أثرهم
بليّا دليل تحوم تبحث عن خبرهم
ولنْها تعاينهم بذاك البر ميتين

متحاضنين اعله الثّرى ولاگوا المنيّه
وگفت تنادي وگفة الزّهرا الزّچيّه
شكواي لله من فعلكم يا أميّه
ماتت يتامانا ابعطش وين أبو الحسنين

الهالحال يبلغ حلمك الواسع يمولاي
هلكت يتامانا عطاشى بجانب الماي
شكواي إلك يمدبر الاكوان شكواي
نسوه ويتامى وشتّتونا اشمال ويمين

ليك الحمد ربي وعلى كل حال مشكور
بالصّبر زوّدني المصايب يوم عاشور
أجساد اخوْتي اعْلَه التّرايب مالها گبور
وانا وحيده وعلى العيله مالي معين

أطلب الهاموا بالفيافي وهاجم الليلل
وهالذي ماتوا ولا ليهم من يشيل
لو للبنات الهشّمتْهن بالخبا الخيل
لو للعليل اللّي نحل جسمي بلونين

يا رحمة الله من العدا محّد رحمنا
هجموا علينا وفرهدونا من خيمنا
للبر فرّينا ومنهم ما سلمنا
حتّى البراجع سلّبوها امن النّساوين