المقتل والساعات الأخيرة

محاورة بين الحسين وزينب وقد سمعت أنّته

سور الحرم يحسين لا تجذب الونّات
بلكت يَعزْنا امن الحرم تهدأ الرّنّات

ودّي أوصّل مصرعك وانجدل ويّاك
لكن اشبيدي لازمه اذيالي يتاماك
لويگدر السجّاد ينهض چان جيناك
خدّك نوسده وبالدّمع نغْسل الطّبرات

تدري الغُربة اتضعضع اعزوم الرّجاجيل
وانا وحيده وعايله ومجبل عَلَيْ ليل
وخوفي ظعنّا امن الصّبح من كربلا يشيل
وتظل عاري ابهالفلا واحنا ضعيفات

گلها بلا تجهيز لازم يتركوني
وباچر تمر بيّه الظّعينه وتنظروني
وانتي وخواتي چان ردتوا توصلوني
مجبل عليچ الليل جيبي الفاطميّات

وانچان يمّي تگدرين تجين لا باس
واتوصّلين المشرعة يَم جَسَد عبّاس
طلعوا بسواد الليل يستركم عن النّاس
ولزمي الصّبر يَعزيزة الزّهرا الأمر فات

لكن أخبرچ چان جيتي يا حزينه
اتشوفين جسمي بالهنادي موزّعينه
بس يالوديعه لا تجي يمّي سكينه
خايف گلبها يذوب من شوف الجراحات

اتعاين اعضاي موزّعه ومفترش رمضا
ومَگدر أصد عن شوفها وطرفي أغضّه
ولوشفت عبرتها تهل گلبي ايتلظّه
وجْدي عليه ايزيد من تجذب الحسرات

الناظم:
يحسين ياللي بالمهد ناغاك جبريل
عبدك تراني ابموزمه وگاصد لك دخيل
قط ما تخيّب قاصدك يَبن البهاليل
واتنجّحه ملزوم وينال العطيّات

غشوة الحسين والهجوم على المخيم

اتحيّر العسكر يوم طالت غشوة حسين
شافوه ثلث ساعات مرمي مغمّض العين

ناسٍ تگول حسين بطّل من ونينه
فارگت روحه وغمّضت للموت عينه
وآخر يگول حسين كلكم تعرفونه
صاحب حميه اعله بناته والنّساوين

وانچان ردتوا تعرفونه حي لومات
هجموا على خيامه وروعوا الفاطميّات
وانچان هو حي وسمع بالخيم ضجّات
لازم يثور بشيمته ويحمي الصّواوين

آمر العسكر بن سعد واستحسن الشّور
وذيچ الحراير بالخيم واگلوبها اتفور
لنّ الزّلم والخيل غارت يم لخدور
طلعت من اخيَمها تصيح الملتجا وين

فرّت بدهشه صارخه كعبة الأحزان
كهف اليتامى انهض ترا هتكوا النّسوان
حرمه وضعيفة حال تبلوني برضعان
بسْ ما سمع صوت الوديعه فتّح العين

گلها يزينب ذاب گلبي من هلعتاب
مَگدَر أرد الخيل خويه عن هلطناب
أنهض ثلث مرات واوگع فوگ التراب
ردّي الخدرچ يا حزينه لا تضيعين

سهم البگلبي نَزف دمّي ومزّع حشاي
امثلّث ولا تمكّنت أطلعه الاّ من اگفاي
خويه تخلّوني أموت ومحّد وياي
جيبي لي سكينه گبل لا يفرّگ البين

صاحت يَنور العين والله تحيّرت بيك
اتمنّيت أجي يمّك واشوف العلّة البيك
ولو هو الدّوا گلبي لَفِتْ گلبي واداويك
واغسل جرح گلبك يخويه بْدَمعة العين

شهادته ومصرعه

حتّى العدو يروي فجايع يوم عاشور
وايگول شفْت حسين مرمي ودمّه يفور

تتحَرّك شفاته مبطّل من ونينه
يبهر جماله وبالدّما مخضّب جبينه
لكن على اخيام الحريم يدير عينه
وكلما نزف دمّه جبينه اتشعشع بْنور

غارج بدمّه والجسد كلّه اصاويب
ظنّيت يدعي ودعوة المظلوم مَتْخيب
يمّه دنيت اسمع كلامه وگلبي امْريب
ولنّه ينادي گلبي امن العطش مسعور

گلبي تفَتّت بالظّما يَعْوان سفيان
واحْياة جدّي المصطفى ظامي ولهفان
گلْت ارد اجيب الماي لك يا شبل عدنان
رحت الشّريعه بالعجل وارجعت مذعور

ولن الأرض ماجت او حل بالكون زلزال
وهبّت الرّيح المظلمه وحتّى العرش مال
وارتفع راس حسين جنّه مطلع هلال
والشّمس غابت عن العالم والسّما تمور

وَصَّلِت يمّ حسين لن حسين مذبوح
جسمه رميّه وفوگ خطّي راسه يلوح
وحتّى السّماوات العليّه ضجّت ابنوح
متعطّله الأفلاك جنها نفخة الصّور

والجيش كبّر وارتفع صوت البشاير
وغارت على خيام الحرم ذيچ العساكر
اتصوّر يَسَامع حالها ذيج الحراير
حرگوا الخيم وايتامها هامت بالبرور

يفت الگلوب الحال ويصدّع الجلمود
حالة بنات المصطفى ساعة الفرهود
ما بين ما هي بالنّياحه ابْخِيَمْها اگعود
والا الزّلم والخيل بين خيامها تدور

يا خلگ فعلة بن سعد محّد فعلها
اطفال وحرم يا غيرة الله او محّد الها
چم أرمله فرّت بدهشه عن طفلها
وهامت بنات المصطفى كلها بلا استور

سلْبت ملابسها او حليها گوم الارجاس
وامّا الوديعه شابچه العشره على الرّاس
تبچي او تنادي هاي تاليها يَعبَّاس
لحّد يبو فاضل سبونا بالعجل ثور

ثور ابعجل ياللي من بلادي جبتني
عبّاس وينك بالعوايل كلّفتني
بسّك من النّومه دگوم وشوف متني
حلّت على راسي مصايب يوم عاشور

محاورة الحسين مع الشمر

ياللي ابْنَعله شرّف ابساط الجلاله
سبطك ترى داس الشّمرصدره بنعاله

مرمي ثلث ساعات بس يجذب الونّه
يلحظ ابعينه وترجع الشّجعان عنّه
ومن غمَض عينه ابن الضّبابي گرب منّه
مغشي عليه شافه او تجاسر واعتنى له

وعاين ابجسمه مركّزه النشّاب والزّان
بالنّعل داسه وزلزل العالم والاكوان
ومكّن السّيف بْنَحر مولى الأنس والجان
واحسين فك عينه وقدّم له سؤاله

ياللي دست صدر الحوى اعلوم النبوّه
صدرٍ على مكنون علم الله تحوّى
فعلك ابْگلب المصطفى تدري اشسوّى
ابنعلك تدوس اعله صدر روح الرّساله

تدري أنا من گال اعرفك بالنّسب زين
حيدر أبوك وجدّك المختار ياسين
أدري امّك الزّهرا واخوك الحسن يحسين
كلّه نسب طيّب ولا يوجد مثاله

لكن مرادي الجايزه تحصل من يزيد
والوعظ والتّوبيخ مَيأثِّر ولا ايفيد
گلّه اشويّة ماي گال المطلب بعيد
للحاميه والماي ما تشرب زلاله

گال احسر الثامك يهالفاجر الشّرير
شبّه الچلب شافه وتصوير الخنازير
أبقع او أبرص والشّهيد اعلن التّكبير
گلّه صَدَگ جدّي يمنتوج الرّذاله

گلّه يشبّهني بعد جدّك بلكلاب
لازم أخلّي وجهك امعفّر بالتراب
وامْن الگفا راسك أحزّه يَبْن الاطياب
يالمحب سامح مَگدر اوصف لك افعاله

چبّه اعْله وجْهه وعلى اچتافه بالنّعل داس
وهبّر اوداجه ويل گلبي وميّز الرّاس
والكون اظلم والشّمس غابت عن النّاس
لكن كريم حسين فوگ الرّمح شاله

ذبح الشمر له

فت الگلوب حسين بالونّه الخفيّه
وهدّت قواه اجروح ألف وتِسعْ مِيّه

زينب على التّل شابحه لحسين بالعين
اتشوفه موسّد داهش العالم بلونين
وصاح الرّجس بن سعد وين اليذبح حسين
فتّت مرايرنا ابهالونّه الخفيّه

اتناخوا على حز الكريم وصار لصياح
وكل مَن دنى يمّه ارتعد من خزرته وراح
وامن الرّعب حتّى امن ايده صارمه طاح
وَسْفه انغشى اعليه وبگه مدّه رميّه

وشمر الخنا من عاينه مغشي لفى له
وصدرٍ حوى الأسرار من رب الجلاله
يا غيرة الله ابن الرجس داسه ابْنَعاله
وفتّح اعيونه وانتبه شبل الزچيّه

گله اشمرادك گال گصدي حز راسك
محد جسر غيري على صدرك وداسك
راح القوى من عندك وشدّة مراسك
وآنا الذي باجرّعك كاس المنيّه

گلّه السّبط ما جيتني بحومة الميدان
وكت اشتعال الكون ومجاول الفرسان
وانا وحيد وفيّضت بالجثث وديان
تلگى المنايا چان لوگرّبت ليّه

گبل انجدل لو لحت ليّه يَبن الاوغاد
واثبتت لي خلّيتك اوْذَرْ فوگ الاوهاد
العطش ماخذني ولمثلّث بالِفَّاد
معلوم تتجاسر يبو الذّات الرّديّه

جدّي رسول الله وابويه فارس الكون
وامّي الزّهرا نور عرش الله المكنون
وخيّي الحسن ياليتهم حالي يشوفون
مطعون واتلظّى على گطرة اميّه

أريد گطرة ماي گبل اتحز نحري
وخفّف الوطأه يا زنيم أوهيت صدري
ظامي تذبحوني وهذا الماي يجري
من جود جدّي ووالدي ويحرم عليّه

على غرار السابقة

هاليوم ون حسين والونّه خفيّه
من ونّته ماجت طفوف الغاضريّه

وشمر الخنا من عاينه مغشي لفى له
وصدرٍ حوى الاسرار من ربّ الجلاله
ياغيرة الله ابن الرّجس داسه بنعاله
وفتّح اعيونه وانتبه شبل الزچيّه

گلّه اشمرادك گال گصدي حز راسك
محّد جسر غيري على صدرك وداسك
راح القوى من عندك وشدة مراسك
وانا الذي باجرّعك كاس المنيّه

گلّه السّبط ما جيتني بحومة الميدان
وكت اشتعال الكون ومجادل الفرسان
وانا وحيد وفيّضت بالجثث وديان
تلگى المنايا چان لوگربِت ليّه

گبل انجدل لو لحت ليّه يبن الاوغاد
واثبتت لي خلّيتك امعفّر بالاوهاد
العطش ماخذني ولمثلّث بلفّاد
معلوم تتجاسر يبو الذّات الرّديّه

جدّي رسول الله وابويه فارس الكون
وامّي الزّهرا نور عرش الله المكنون
وخيّي الحسن ياليتهم حالي يشوفون
مطعون واتلظّى على شربة اميّه

أريد گطرة ماي گبل اتحز نحري
وخفّف الوطأه يا زنيم اوهيت صدري
ظامي تذبحوني وهذا الماي يجري
من جود جدّي ووالدي ويحرم عليّه

للمعركه وصلت الحورا بالنّساوين
حسّر ودلاّهن جواد حسين بحسين
شافن شمر يفري النّحر واهْوَن الصّوبين
وانياحهن زلزل نواحي الغاضريّه

ضجّن فرد ضجّه ينور العين يحسين
دگعد احميها وصّلت ليك النّساوين
محد بگى يحمي يَبو سكنه الصواوين
وزينب تصب الدّمع واتنادي شجيّه

حامي حمانا حسين لا تضيّع يتاماه
جسمه موزّع والعَطش هالفتّت احشاه
وسكنه العزيزه تنتحب وتصيح ويلاه
يا ضيعة ايتامك يبويه ابهالعشيّه

اسوَد الفضا وابن الخنا يهبّر بالاوداج
واهتزت افلاك العليّه والعرش ماج
صرخن يَوَسْفَه راح ملجا كل محتاج
حز الكريم وكبّر العسكر سَويّه

فرّن ومالت للمخيّم ذيچ لجنود
ساعة الگشره اعلى الحرم ساعة الفرهود
داسوا يتامى وبعض منهم راحوا اشرود
مايگدر الواصف يوصّف فعل اميّه

رفع الرّأس الشّريف

غاب البدر واتكوّرت شمس المضيّه
وارتفع راس حسين فوگ السّمهريّه

غرّة جبين حسين لاحت فوگ عسّال
شمس الوجود يصير چنها مطلع هلال
أرض وسما تزهر بنوره گبل ينشال
وبس ارتفع شعّت سماوات العليّه

اتفكّر وعاين للبدر ليلة تمامه
تلگاه كامل لكن بوسطه جهامه
وراس الشّهيد حسين بالجبهه علامه
صواب الحجر فجّر دم الجبهه الزّهيّه

لوعاينت بدر السّما ليلة كماله
مطوّگ وحوله من شعاع النّور هاله
چنّه حبيب المصطفى وحوله ارجاله
مثل الأهلّه منثّره فوگ الوطيّه

ياللي على الخطّي ترتّل بالتّلاوات
بالكون مثلك ماحصل يحسين هيهات
فوگ الرّمح راسك وتقره سوَر وايات
والجسد بالرّمضا تدوسه الأعوجيّه

نوب ابْوعظ تخطب ونوب بزجر تنزيل
تقره الكهف وانتَ على العسّال تأويل
ونوبٍ تخوّف هالارجاس بسورة الفيل
كلّه ولا لانت اگلوب النّاصبيّه

واللي يريد يعاين اهوال المصيبه
يعرّج على ام اهجام ويشوف العجيبه
ايعاين اشصَكّت بالحجر ذيچ النجيبه
متواعده اويا الدّارمي بنت الدّعيّه

واعله الشّجر منصوب تتساطع انواره
يا غيرة الله ويرجمونه بالحجاره
وينصبه يزيد الخبيث اببّاب داره
وبالطّشت والمجلس تأمّل للقضيّه

نسل الخنا يفرّگ شفاته بخيزرانه
اتذكّر بدر واشيوخها وهاجت أضغانه
ومن شاف نوره اللّي سطع كسّر اسنانه
ونادى استوفينا الديون الاوليّه

الناظم:
ياللي ابراس السّمهريّه يسطع اضياك
لبچي وابچي عليك طول العمر وانعاك
أنخاك وانا اعتقد متخيّب الينخاك
الخادم محال يخيب يالشّمس المضيّه