وداع العائلة

وداعه زينب والنساء بعد مقتل جميع أصحابه

خلصت انصاره وظل أبو السجّاد محتار
جيشٍ ثجيل ومنع ماي وگلّة انصار

ينادي بگيت وحيد يَنْصار الحميّه
وامن الضياغم ظلّت اخيامي خليّه
ومن كل جانب حايْطَتْني جنود اميّه
والعطش مض الچبد والجو اشتعل نار

يا صفوة العالم گضيتوا حگ لوداد
للمصطفى الهادي ونمتوا فوگ الوهاد
اهتزّت يخبّرنا أبو الباقر السجّاد
رادت تثور وكل فرد يشْهَر البتّار

گلهم ابنومتكم تهنّوا يا مطاعين
وبلغوا سلامي المصطفى وخير الوصيّين
گولوا بگى مفرود ما بين العدا حسين
حزتوا الشّرف والفوز ياسادة الأحرار

للخيم رد يودّع وداع المنيّه
عند العليل وعمّته يَمّه شجيّه
گلها يمهجة فاطمه سمعي الوصيّه
أمّچ الزّهرا اووالدچ حيدر الكرّار

أمّچ الزّهرا وهالمصيبه تحمّليها
وبْصَبر حيدر يالوديعه گابليها
وتجلّدي اعْلَه الهضم والعيله احفظيها
لزْغار حفْظيهم وسَلّي گلوب الكبار

گالت يحصْن اللّي يصد عنّه الجماهير
يا سدّةٍ عالي النّزل لو طارت يطير
يا جفن عيني العين بعد الجفن شتْصير
يحسين من سابج انا بگلبي هالاخبار

من گبل ما نطلع يخويه امن ارض طيبه
گلبي يحس يا نور عيني ابهالمصيبه
معلوم عندي تنقتل وابگى غريبه
ويلاه يَسَاعة مشيتي وانت بلوعار

خطاب زينب له وهي تودعه

خلصت رجاجيله اووگف متحير حسين
رد للمخيّم مگصده وداع النّساوين

بوداعة الله يصيح زينب يا سكينه
حافظكم الله وطبگ ضجّن يا ولينا
عنّا تروح ومن بعد وصّيت بينا
وحسين يسترجع وبس يدير بالعين

فرّن حواسر والإزر بالحال طاحت
والكل على حسين شبحت والرّوح راحت
واتجلّدت زينب على الشدّه وصاحت
بعدك يخويه هالحراير تلتجي وين

چيف البُصُرْ لوچلچل الليل بظلامه
كلها حريم وفاگده وعِدْها يتامى
وهالعسكر الميشوم ماندري اشمَرامه
ياهو اليصاليها تريد رجال ظفرين

يحسين أنا ويّاك كل شدّه أصالي
بگوّة عزم ما دام اعاين لك اگبالي
ولو رحت يبن أمّي أنا شيصير حالي
ما ينوصف والله وعدوانك ملحدين

گلها بْصَبر حيدر تلگي هالنّوايب
كعبه صفيتي للرّزايا والمصايب
سلب وسبي وتشهير ما بين الأجانب
وابهالحريم وروسنا الكوفه تطبّين

گالت صبر مالي يبعد اهلي اعْلَه فرگاك
للموت خذني يا عزيز الرّوح ويّاك
ابهالبر تضيّعنا وللشدّه ذخرناك
وقبّلت نحره وصاحت الله اوياك يحسين

لزمي الخبا يگلها وجمعي شمل لعيال
باري العليل وسكّني ضجّة هلطفال
أدري العدو يَمْخَدّره ما يرحم الحال
وعنها مشى وخلا گلبها يصير شطرين

وداع سكينة له

وگفت اگبال حسين سكنه الهاشميه
اتگلّه يبويه يا هو إلنا ابهالعشيّه

چنّك يبويه بمشيتك عازم على الموت
ماشي وعَليمَنْ يالولي تترك هلبيوت
يا ياب بوداعك تركت الگلب مفتوت
تمشي وتخلّي الحرم بيد اعلوج اميّه

گلها يَسكنه يطول نوحچ عگب فرگاي
ردي الخيمه يا عزيزه اتمرّد احشاي
ولا يرتفع صوتچ وخلّي النّوح بهداي
اجتمعت ترى اهموم الدّهركلها عليّه

بَسْ دمعة عيونچ يَسكنه كفكفيها
گلبي ترى مجرّح وهالنّحبه اخفيها
وزينب على ملاگى النّوايب ساعديها
تمشي بيسر وابهاليتامى مبتليّه

ما دام روحي بالجسَد لا تشعبيني
ترى يَسكنه ابهالبواچي اتهيّجيني
ولو طحت من ظهر المهر تالي اندبيني
ونوحي يبويه وعدّدي بظهر المطيّه

نوحي يبويه ولايسمعون العدا النّوح
ترا الشّماته بالضّمير أسطى امن الجروح
صاحت يبويه وين تالي بعدك نروح
بتضيع هالعيله بوادي الغاضريّه

بعدك يَوالينا نصك بوجوهنا وين
لوهجمت علينا العدا وكلنا نساوين
يا غيرة الله نضيع ما بين الملحدين
مجبل علينا الليل يَرْباب الحميّه

حنّ السّبط وتحنّت ضلوعه عليها
والوت على المظلوم باللهفه إيديها
يا هو يلوم الثّاكل الشافت وليها
يودّع وماشي ويل گلبي للمنيّه

الحسين يودّع فاطمة الصغرى

وگفت اگبال حسين تنحب طفلة حسين
اتگلّه العطَش ضرني يبويَ والگصد وين

الله يَبو السجّاد ما تعطف عليّه
فَتّ العطَش گلبي ودَنَت منّي المنيّه
وَصِّل الشّاطي وجيب لي گطرة اميّه
وعاين يبويه اطفالنا من العطش ميتين

گلها يَفاطم بالبچا نحلتي اگواي
گعدي يَبويه بالخبا وانا اطلب الماي
بالله يَزينب سكّتيها مهجة احشاي
گلبي تراهو من حچيها صار شطرين

صاحت يبويه وين گصدك عنّي اتروح
يا ياب گلبي امن العَطش والحزن مجروح
ويّاك اخذني للنّهر ما بگت لي روح
العطش فَت اگلوبها كلها النّساوين

گلها يبنتي للحريبه اشلون أودّيچ
وبالمعركه يا نور عيني من يباريچ
وتالي للمخيّم يبويه من يرد بيچ
لو طحت ويّامَن للمخيّم تردّين

تگلّه يبويه وياك اروحن وارجع اوياك
للنّهر وصّلني يَتَاج الفَخَر بحْماك
گلها ينور العين ما أرجع من هناك
أعتاگ انا وانتي يشمّامه تضيعين

اببّاب الخبا گعدي يبويه وارگبيني
وانچان ما حال الگضا بينچ وبيني
الماي أجيبه وبالنّحب لا تشعبيني
گعدت الطّفله وراح عنها المعركه حسين

طالت المدّه واليتيمه ظلّت اتجود
يَمّ الوديعه والدّمع يجري بلخدود
تگلها بعد يَمْتَى يَعمّه والدي يعود
فَتّ العَطش گلبي وقلْ شوفي من العين

ساعه ولن المهر جا يسحب شكيمه
والسّرج مايل حيف ويصيح الظليمه
وفرّن من الخيمه الحرم وامّا اليتيمه
اعْلَه الوجه خرّت تلطم الهامه باليدين

الحسين وولده السّجاد

ثار العليل يصيح زينب يا زچيّه
گومي بعجل جيبي العَصا والسّيف ليّه

حسين انفرد وحده تعالي سنّديني
وجيبي العصا ابْيسراي والسّيف بيميني
يختي سكينه بعجل گومي نَهِّضيني
نخوات ابويه اتْزلزل السّبع العليّه

بسيفه طلع والدّمع يجري فوگ الخدود
اينادي يبويه من اخوتك ظلّيت مفرود
لبّيك يَبْن المرتضى يا سر الوجود
وين الانصار ووين فرسان الحميّه

في وين فرسان الحريبه زهير وهلال
وبرير وين او مسلم وسردال الرجال
أعني حبيب اللّي لجلنا خاض الاهوال
گلّه بگوا كلهم على حرّ الوطيّه

ولحّد من انصاري بگى يحمي خيامي
كلهم تفانوا والدّهر نكّس اعلامي
گلّه يبن حيدر أنشدك عن عمامي
عبّاس واخوانه ابدور الهاشميّه

في وين راعي المرجله رب الشّجاعه
شيخ العشيره التِزْهر الخيمه بشعاعه
گلّه على شاطي النّهر گطعوا اذراعه
وزينب تنوح عليه نوح الراعبيّه

گلّه يبويه وين شبه المصطفى راح
لمَّن سمع حنّ وصفگ راح على راح
گلّه توزّع جسم اخوك بطعن لرماح
واهناك جسمه ياضيا عيني رميّه

گلّه يبويه وين شبل الحسَن جسّام
گلّه تخضّب بالدّما وفوگ الثّرى نام
وانچان تسأل ما بگى واحد بالخيام
كلهم تفانوا والخيم ظلّت خليّه

ما ظل غيرك للحرم يحمي حماها
وارجع يبويه للنّسا سكّن بجاها
اعوينك الله اعْلَه الرّزايا اللي تراها
بعدي تشوف اهوال يا باگي البقيّه

بَسْ الله الله يا علي بعدي بهلَيتام
حافظ على النّسوان ساعة حرگ لخيام
شبيدي على زينب عگب هالعز تنضام
ماهي يبويه معوّده تركب مطيّه

أوصيك لوشِفْت العدا يبني لفتكم
دارت عليكم بالمخيّم فَرْهدَتْكُم
إنتَ يبويه وعمّتك باروا حرمكم
لتْضيع بعدي هالبَنات الفاطميّه

بس انجدل من فوگ هالميمون معفور
شوف اشْيحل ابهالحراير وسط لخدور
والله هضيمه چان زينب ركبت الكور
عگب المعزّه يصير اسمها خارجيّه

دعوة فضة على القوم

للخيم ردّ حسين يسأل يا نساوين
ياهي دَعَت منكم على گوم الملاعين

زينب يحاچيها وگلبه بالتهابه
أرد انشدچ يَمخدّرة بيت النّجابه
خويه اخبريني امنين هالدّعوه المجابه
من رخّصچ يَعْزيزة الكرّار تدعين

گالت له بالشدّات صبري مثل صبرك
ولا لي أمر تدري يخويه غير أمرك
گلّي ينور العين بالله اشلون بصرك
انشد علي السّجاد وانشد هالخواتين

طب للخيَم يا نور عيني وفتِّش وشوف
نازل على العالم ترى زلزال وخسوف
عايَن ولن فضّه تحِن والرّاس مكشوف
وتقسم على الباري بشرف ست النّساوين

والكون متغيّر وهي تجري دمعها
تنادي يربّي بجاه من كسروا ضلعها
وحسين رحمه ونقمة الباري دفعها
وگلها يَفضّه اعْلَه الغصص لازم تصبرين

منّا يفضّه انتي ومحسوبه علينا
صبري المصايبنا وبلانا اللّي ابتلينا
شفتي اشسَدا اعْلَه امنا وشفتي صبر ابونا
سلمي الأمر لله يَفضّه لا تجزعين

انتحبت وگالت سيّدي ما ظل لي شعور
من شفت عبد الله الرّضيع بسَهم منحور
خلاّني أدعي على العدا والگلب مسعور
حالك وحال الطّفل واحوال الخواتين

هيّج عليّ الحزن ذبح الطّفل عطشان
وزيّد عليّ الفاجعه ضجّة النّسوان
وانتَ يَبو السّجاد مفرد بين عدوان
خوتك فنَوا واستوحدوك الگوم يحسين