استسقاء الحسين لطفله الرضيع
هالطفل لهفان ودنت منّه المنيّه
هالكثر ماعدكم رحم يَجنود أميّه
غارت عيونه من ظماه وذبل عوده
نشْفَت ارياگه وانمحت وَرْدَة اخدوده
واحنا العلينا الماي حرّمتوا وروده
والطّفل شنهو جرمته ردّوا عليّه
من وگفتَه بطِفْله الجيش اتحزّب أحزاب
منهم خوارج يصحبون گلوب نصّاب
والطّهر واگف ينتظر بَسْ رد لجواب
لنّ الرّضيع اتّطوّگ بسَهْم المنيّه
فَرْفَرْ على رگبة ابيّه وشبك بيده
وفارگت روحه والسّهم فاري وريده
والسّبط جر السّهم من رگبة اوليده
وصعّد دمومه يشتكي الربّ البريّه
ردّ بالرّضيع وفرّت سكينه تناجيه
بالماي روّيته يبويه ووين باجيه
گلبي تفطّر ليت وادي الطّف ما جيه
إنطاها الطّفل وامْدامعه بخَدّه جريّه
بسْ عاينتّه بسَهَم مگطوع الوَريدين
وطار الگلب منها وغدت تخمش الخدّين
طبّت الخيمه والحرم حفّت الصّوبين
وضجّت فرد ضجّه الحريم الهاشميّه
صارت الضجّه ورد ابوالسجّاد مألوم
ينادي اشهالصّيحه يَزينب يم كلثوم
بالهون نوحَن يا حراير شِمتَت الگوم
طلعت الحورا تِجْذِب الونّه خفيّه
تگلّه مصاب الطّفل فت گلوب لعيال
تدري اشْيِسَوِّي بالثّواكل فگد لطفال
لكن يخويه حسين شيله يهوّن الحال
ودفنه عساها تهون هالضّجّه شويّه
مصرع رضيعه ورجوعه به إلى أمه
يطلب النّاصر والمعين من العدا حسين
والطّفل من مهده وگع بين النّساوين
لبّيك نادى والحرم ضجّت ابولوال
ومن سمع صيحتهن إجا يسْتَخْبر الحال
ويصيح خفّوا من البچا وسَكتوا هلطفال
يختي يَزينب شمْتت علينا الملاعين
گالت يَبَعد اهلي الطّفل من سمع نخواك
امْن المهَد ذَبْ روحه يَبو سكنه ولبّاك
بلكت يرحمونه الأعادي دخْذه وياك
يبْسَتْ اشفاته امن العطش ومغمّض العين
راح بكتاب الله وطفله يخاطب الگوم
وبن سعد صاح بحَرمله القاسي الميشوم
وارداه يَم المصحف بْمَنْظَر المظلوم
وسهمه فرى نَحْر الطّفل وين لمسلمين
بيده رفع دمّه الرب العرش شكّاي
ينادي على صدري انذبح طفلي يمولاي
وسكنه تنادي وين بويه فاضل الماي
گلها سگاه السّهم من دمّ الوريدين
منّه خذتَّه وجابتَه بالحال لمَّه
بالمهد خلّته غسيل بفيض دمّه
نوبٍ تشيل ايده وتقبّلها وتشمّه
ونوبٍ تگلّه ليش ساكت يا ضيا العين
يَبني گلت لك لاتصيح امّك نحيله
ما گلت لك تسكت ابهالسّكته الطّويله
ناغي أخيّچ يا سكينه وحرِّكي له
بلكت يفك عينه ومنّه نسمع ونين
يَبني يَعَبد الله گلِت لك هيّد ونام
ما گلت يبني نام نومه طول الايّام
بيمَن اتْسَلّى لو فگدتّك يابن الايمام
عندي ولد غيرك واگولن والده حسين
ساعة رضاعك يا ثمر گلبي گلِتْ ليك
لا تخمش بْصَدري ولا تِرفس برجليك
ماگلْت الك تهْدأ وحتّى النّفس مابيك
مَتردّد الانفاس روحك يالولد وين
اترك تعليق