عاشوراء في الوجدان الشيعي

هلال المحرم

عاشور هلّ وبالضّماير شب نيران
راح الفرح عنّا وغشانا بظلمة أحزان

صارت مآتم في السّماوت العليه
وبنت النّبي اويا الحور نصبت له عزيّه
والكل ينادي يا غريب الغاضريّه
وهذا ينادي واشهيدٍ مات عطشان

لبست الشّيعه ابكل وادي اثياب لسواد
عافت المكسب والحزن بالگلب وگّاد
نصبت مآتمها على بو زين لعباد
تبذل على ابن المصطفى غالي الأثمان

واتشوفها لوطبّت الماتم ابزفره
هذا يهل دمعه وهذا يجر حسره
هذا يدگ راسه ويلطم فوگ صدره
والكل عليه امن الحزن واللطم عنوان

محّد تولّع بالبكى ابكل البريه
مثل الحزين الواله ابن الحنفيّه
هل الهلال وهلّت ادموعه جريّه
بس ينتحب ويصيح يا وحشة هلوطان

سافر أبو السجّاد يگطع بيد لبرور
گاصد للعراگ وتركها موحشه الدّور
خايف على اخواني أنا مْن أيام عاشور
الله يعوده الهالمنازل گمر عدنان

زيارة الحسين في وجدان الشيعى

وحگ راسك المگطوع يا شمس المضيّه
للحشر ما ننسى مصابك والرزيّه

ننسى وسهم الصاب گلبك يا ذرانا
ذلنا وفت اگلوبنا ونكّس لوانا
وتگطيع جسمك بالثّرى گطَّع أمعانا
وخيلٍ وطت صدرك على حر الوطيّه

داست يَبن حيدر على اصدور لمحبّين
وبگلوبنا اتخلّيك عاري ابغير تچفين
وذبح الطّفل ننساه هذا امحال يحسين
ولا ينّسى اركوب الوديعه اعْله مطيّه

يحسين كلنا نعتني لك كربلا انزور
بس ما نوصّلكم وننظر ذيچ لگبور
ندخل الحاير بالحنين ولطم لصدور
وانحوم مثل الجلَب لو فارگ حميّه

ونشوف عد رجلك علي يحسين مدفون
واتهيج زفرتنا ويگرّح ماي لعيون
ونتذكّر اوگوفك عليه ابگلب محزون
محني الظّهر واتصيح يَبني اگطعت بيّه

وابكل فريضة اتروح للحاير الشّيعه
ومن مشهدك تطلع وتگصد للشّريعه
اتزور لگمر لَزهر أبو اچفوف الگطيعه
شيّال رايتكم وسور الهاشميّه

وبعد الزّيارة للمخيّم بالبچا انعود
بس ما نطبها اتسيل دمعتنا بلخدود
نذكر امنادى بن سعد يا گوم فرهود
حرگوا الخيم سلبوا الحريم الخارجيّه

نذكر اوگوف مخدّرتكم شابحه العين
للمعركه والخيل حاطت بالصّواوين
اتنادي يعدوان الله الله ابهالنّساوين
لا تروّعوها راگبوا رب البريّه

يا ليتنا كنا معكم

يا مهجة الزّهرا وشمامة المختار
عفت لَوطان وجيت من جملة الزوّار

يحسين ما لبّاك جسمي يوم لطفوف
عند استغاثاتك وحولك حايطه صفوف
حظّي گعد بي عن امصافح ذيچ لسيوف
فازوا ابْنصرتك يا شفيّه صفوة انصار

وانچان ما لبّى لك الساني يصنديد
يوم اوگفِت محتار ما بين العدى اوحيد
واتعاين الشبّان صرعى ابغير توسيد
لبّاك گلبي يا بقية بيت لَطهار

گلبي أجابك وانفطر واتفجّر ادموم
وسمعي بسماع مصيبتك والنّوح كل يوم
وعيني أجابت واهمَلت منها الدّمع دوم
گلبي وهواي اوياك والمهجه اشعَلت نار

كعبة الشّيعه امصيبته اتفت الجلاميد
ذاك العزيز اشلون يبگى بحرّة البيد
من حول جسمه مصرَّعه ذيچ الأماجيد
دمهم غسل واچفانهم سافي امْن لغبار

يا شيعة الكرّار ما فيكم حميّه
ما چان أخذتوا اچفان رحتوا الغاضريّه
شلتوا حماكم لا تدوسه الاعوجيّه
وجبتوا حريمه لا تروح ابيسر كفّار

گوموا نروح الغاضريّه وناخذ انعوش
ونواري اجسادٍ بگت طعمه للوحوش
زين لعباد إمامكم بالمرض مدهوش
انعزّيه بهله ومن خيمهم نخمد النّار

گوموا نروح الكربلا انغسّل الشبّان
ونشيل جسم حسين ونفصّل له اچفان
وراسه يشيعه اننزّله عن راس لسنان
والحرم نرجعها ولزينب ناخذ خمار

ظلّت تراهي امسلّبه وحسين مطروح
وعدها عليل ومن ونينه يذوّب الرّوح
حرمه بلا والي تنادي وين أنا روح
وحسين باليني ابيتامى ازغار وكبار

حرمه وغريبه ودمعها بالخدّ همّال
واصيح وين اهلي وعمامي اتعاين الحال
عندي جنازه امعطّله ولا عندي ارجال
اسمعتوا يشيعه هالمصايب مثلها صار

وانچان گلتوا ابن النّبي مَيْچفنونه
هذا شهيد ومن دماه ما يغسّلونه
ذاك الشّهيد اللّي يظل ما يسلّبونه
وامّا المسلّب ما يوارونه بلَستار

وانچان گلتوا حسين متغسّل ابدمّه
هذا صدگ لكن اموزّع صار جسمه
واعضاه كلها امفرّگه گوموا نلمّه
وابگلوبنا اندفنه ولا يبگى بلوعار