اجتماع العسكر ومحاصرته لسيد الشهداء

اجتماع العسكر عليه في الطف

خيّم الجيش وباليتامى تحيّر حسين
وضجّت بنات المرتضى وسط الصّياوين

طلعت من خيام النّسا زينب تنادي
يحسين هالعسكر ترى ضيّگ الوادي
وانچان هاللي خيّموا كلهم اعادي
وللحرب كلهم يا ضمدنا مستعدّين

تبگى منازلنا خليّه بالمدينه
وانچان رحتوا الكافي الله احنا انولينه
الله يعدّيك البلا ردّ الظّعينه
لرض الوطن يا بوعلي رد النّساوين

گلها ودمع العين فوگ الخد فيّض
خلصت يزينب مدّتي والعمر گوّض
راسي بخطي يرتفع والصّدر ينرض
وبحالةٍ گشرا عگب عيني تصيرين

واللي گبالچ يا حزينه من الرّجاجيل
كلهم وعدهم من تصك الخيل بالخيل
ساعه ولا يبگى بخيمكم غير العليل
ومن الصّبح للشّام بيتامي تشيلين

جسمك يذوب وينتحل من سفرة الشّام
ويشيب راسچ يا حزينه بذيچ الأيام
كل ساع يختي تطيح وحده من هالايتام
تلوى عليها سياطهم وانتي تشوفين

گالت اجل يحسين للذلّه جبتني
بَرْض المدينه چان يَبْن أمّي اتركِتني
يحسين وين الملتجا لوضيّعتني
مگدر على ذلّه وهضم يا گرّة العين

ويّاك جيت من المدينه وعفت الأوطان
خفت المذلّة والتجيت العزِّ الاخوان
گلت الأخو يدفع صروف الدّهر لوخان
گال الدّهر سكتي عگب عزّچ تذلّين

والله يخويه لو غريبه ومشت ويّاك
محّد كفو يذلها وهي يا خوي بحماك
وانا تخلّيني يخويه بوليَة عداك
بعدك يبو سكنه دگلّي الملتجا وين

اجتماع رايات الكوفة عليه

من يوم سادس بيّنت رايات كوفان
لزموا الشّرايع وامتلت بالجيش وديان

كلها من الكوفه المشومه مستعدّين
سبعين الف سدّوا الفيافي شمال ويمين
وحسين ما غير اخوته ونيّف وسبعين
والخيم مَمْلِيّه حرم واطفال رضعان

خندق على خيام الحرم صاحب الغيره
وكلها ملاها بالحطب ذيچ الحفيره
وصارت النّار على المخيّم مستديره
هاي المصايب يالموالي وهاي الاحزان

طلعت بلوعه من الخبا زينب حزينه
تگلّه يخويه هالجيوش اللّي تجينا
إلنا ينور العين گلّي لوعلينا
الوادي يبو السجّاد فايض من الفرسان

گلها يزينب والگلب يسعر لهيبه
كلها علينا واستعدّي للمصيبه
تبگين يختي ابهالارض بعدي غريبه
بيد الاعادي وتبتلين ابجيش نسوان

هذي يزينب كربلا وهذا نهرها
وهذا زمان مصيبتي وهذا شهرها
حتّى العدو يمخدّره عنده خبرها
تقاسين بيها من الكروب اشكال والوان

تگلّه يتالي السّلف من وصّيت بينا
وياهوعگب عينك يردنا للمدينه
وابهالفيافي من يصالي هالظّعينه
وياهو اليباريها ويباري عليل وجعان

گلها عليچ ملاحظ النّسوه ولَطفال
وتجلّدي يَبْنَة الزّهرا بكل الأحوال
الله عوينچ لو حدى حاديكم وشال
وشفتي الجسد عاري وراسي براس لسنان

خرّت المحزونه تون والگلب صادي
اتگلّه يخويه ابهالحچي اتفتّت افّادي
الله يبو السجّاد نبگى بيد اعادي
كل المصايب والهضم ولْية العدوان