طفلي مسلم

رثاء طفلي مسلم بن عقيل

فرّوا يتامى اثنين من خيمة المظلوم
وامهم تحوم محيّره والگلب مهموم

طلعت تحن وتصيح يا زينب تعالي
والله مصايب يا خلگ تيّهت بالي
هاموا اولادي ابهالفضا ياذل حالي
راحوا وخلّوني حزينه ابحال ميشوم

كثر المصايب يا خلايگ تذهل الرّاي
كلهم السّاعه اتذبّحوا يا خلگ وِلْياي
ظنّيت هالطّفلين تبگى سلوه وياي
بالبرّ تاهوا وبطلبهم محد يگوم

والله مصايب بوعلي فتّت افّادي
گومي يزينب بالعَجل ننظر الوادي
من الخوف فرّوا للفضا وتاهوا اولادي
يحرسكم الله يا ضيا عيني من الگوم

يا ليتكم ليّه بسلامتكم ترجعون
ربّيتكم يا مهجة گليبي وتضيعون
ييتَام مَدْري وين هالليله تنامون
يطلَعْكم الله من الكوفه بلدة الشّوم

وانچان يَوْلادي وصلتوا للمدينه
خبروا محمَّد بالّذي جاري علينا
وگولوا ترى زينب ترَكْناها حزينه
وذيچ اليتامى بالهجير اتطيح وتگوم

هالبرّ الاگفَر لا نَزِل يوجد ولا بلاد
خوفي عليكم يا ولادي من ابن زياد
ما ظل أحد من عزوتي يطلب هالاولاد
بس العليل ومدمعه بالخد مسجوم

وقوعهما في قبضة السجّان

خفّف علينا الگيد وارحمنا يسجّان
احنا من اهل بيت النّبي وبينا الدّهر خان

مسلم ابونا والأهل كلهم سلاطين
جدنا علي صاحب البيعه وخالنا حسين
وذيچ العشيره صاح بيها صايح البين
ظلّوا على حر الثّرى وضاعت النّسوان

واحنا انهزمنا وروّعتنا هجمة الخيل
بالبرّ توّهنا وعلينا هوّد الليل
ولا درينا اشصار بالنّسوه والعليل
يگولون جابوهم سبايا لرض كوفان

گلهم شعبتوني وفت گلبي حچيكم
زغار اويتامى اشحال گلب امكم عليكم
من ايّام يا بعد الأهل مرّوا بسبيكم
فوگ المطايا وخالكم راسه على سنان

بعيني شفت حرّه على ظهر المطيّه
ذوّبت گلبي تنوح نوح الرّاعبيّه
وكلمن نظرها گال هذي الخارجيّه
نوبٍ تحن ونوبٍ تباري الرّضعان

ومرّت علَيْ ناگه بلا هودج ولا مهاد
وحُرمه بظهَرها من النّواعي تفت لَكباد
تنادي شعبني فگد اخوتي وفگد الأولاد
راحوا اولادي وخايفه غيلة العدوان

ويّا الحرم عاينت شاب مگيّدينه
يبچي على اهله وبالسّلاسل باهضينه
وكلما يون يوحّش العالم ونينه
چنّه مريض ومن العلّه الجسد نحلان

گلّه على وَصْفَك هالمغلّل بالزّناجيل
هذا البقيّه من عشيرتنا البهاليل
واللي تحن وتباري النّسوه والعليل
هاي الوديعه مخدّرة فارس الفرسان

واللي وراها فوگ ناگه تجر ونّه
وتنعى على الأولاد هاي الضّايعه امنا
ياليتنا ابهالخبر لگشر ما سمعنا
ويا ليت نمنا ويا العشيره ابفرد ميدان

خطابهما لقاتلهما

اتوعَّى يَعگلي هجمَت علينا المنيّه
ما يحصل النا ابهالزّمن نومه هنيّه

كلما طلعنا من بلا شفنا بلايا
ياليتنا ويّا الأهل صِرنا ضحايا
وياليت ساگونا بيسر ويّا المطايا
اهون علينا من الحبس ظهر المطيّه

ضعنا يخويه وابتلينا ابّلدة ارجاس
ضيعه ويتاما وجوع وسط السّجن يا ناس
لنّ الرّجس صابه ومنّه كسَّر أضراس
ودماه فوگ الصّدر خلاّها جريّه

وردّ ورفس لاخر وگلْهُم حان اجلكم
لشفي غليلي يا يتامى اليوم منكم
متعوب يولاد الخوارج في طلبكم
گلّه ارحمنا يرحمك ربّ البريه

لا أهل عِدْنا ولا أبو يثور بطلبنا
صغار ويتامى وين ما رحنا انتشبنا
متراگب الله اكسب أجر وارحم تعبنا
عندك ترا احنا ضيوف جينا ابهالعشيّه

ويّاك مَتْگول اشفَعَلنا من جنايه
ترفس أخيّي ومنّي تكسّر ثنايا
گلّه عليكم حامت طيور المنايا
هالرّوس لابن زياد اودّيها هديّه

واحنى الكبير على الصغير بگلب صادي
واحتضن خيّه والدّمع بالخد بادي
وصاروا بحاله تفتّت گلوب الأعادي
وذاك الزغيِّر خوف يتلوّذ الخيّه

قتل الشقي لهما

نطلب يغادي البَخَت منّك أربع خصال
بلكت تجاوبنا على وحده يرجّال

گلّه اذكرهن گال لابن زياد وَدْنا
وراگب الهادي وراگب الكرّار جدنا
ساعه ترى من الليل والله ما رگدنا
ما نهتني بالزّاد بَسْ انقاسي اهوال

ميْصير گال ابن الخنا گلّه ارحمنا
احنا ضيوف وملتجين ارحم يتمنا
شبگى علينا الدّهر ما تعاين هضمنا
گلّه شلون ارحَمكم ومگصودي المال

گلّه ابذلنا يا عديم الفعل للسّوم
تحصل أضعاف اللّي تأمّل من الميشوم
گلّه مهو لازم ذبحكم واصل اليوم
گلّه دحِلْ گيدك نصلّي والدّمع سال

صلّوا يويلي والدّمع يجري من العيون
واحنى على عضيده يون ونّة المطعون
ودّع أخيّه وخاطب الفاجر الملعون
يگلّه گبل خيّي اذبحني يبن الانذال

گلّه اذبحني ريت يومي گبل يومه
مگدر أشوفنه مغرّگ من دمومه
ولن الزّغير ايصيح وادموعه سجومه
گبلك انا مگدر أشوفك فوگ لرمال

والرِّجس من شاف المسابگ للمنيّه
حز راس لَكبر وانجدل جدّام اخيّه
وظلّ يتمرّغ بالدّما سودا عليه
ولَصغر وگع فوگه وتخضّب بالدّما وگال

خلني على جثّة عزيز الرّوح ساعه
بَتْخَضَّبْ بدمّه اتزود من وداعه
ما رحم نحباته وفَتَح بالسّيف باعه
حالاً گطع راسه شمَفْظَعْها من أحوال

صرخت بلا شعور العجوز ولطمت الهام
وخرّت عليهم معولة والدمع سجّام
تصيح الضّيافه هذا تاليها يالايتام
يا خجلتي من المرتضى خوّاض الاهوال

ظنيت يحبابي تفوزون بسلامه
ما چنت اظن ابهاي وارجع بالنّدامه
بلغوا سلامي الطّهر جدكم يا يتامى
مگدر أواريكم ترى ما عندي رجال