دخوله مكة وما جرى فيها

دخوله مكة وخروجه منها

شرّف ابن مكّه ومنى الكعبه بقدومه
شعشع الوادي كالبدر حوله نجومه

اهتزت الكعبه مرحِّبه بس ماوطاها
وامتلا الوادي من روايح طيب طه
حيدر أبوه الطَهَّر الكعبه وحماها
بسيفه وعزمه والشّرك فرّگ غيومه

لازم الكعبه ابوعظه ولبّى الدّعايه
ووضّح من القرآن تثبيت الولايه
وبين شنايعها بني اميّه الدّعايه
وكل يوم للشّامات تتوصّل اعلومه

وامتلت بالحجّاج من مكّه الوديان
وحضرت الموسم من بني الاسلام لعيان
اُووصلت مكاتيب الخيانه من اهل كوفان
اُووردت من الشّامات رايات المشومه

وصلت بشاير عصبة الطّاغي من الشّام
تظهر الحج واسلاحها امغطّه بلحرام
والگصد منهم ياخذون ابثار لَصنام
وامحطّم اللات وهبل تسفك ادمومه

حافظ على حرمة الكعبه والصّبح شال
من يوم ثامن واصبح العالم ابزلزال
والخلگ تحرم والسّبط ما بين لجبال
يسعي الوادي كربلا ويحسب اليومه

عارضه محمَّد والدّمع يجري من العين
يگلّه يخويه اليوم ثامن والگصد وين
نازع احرامك والخلگ كلهم امحرمين
هلّت ادموعه بو علي وهاجت اهمومه

يگلّه يبو جاسم مراد جنود اميّه
ايهِتكون بيت الله ابقتل عترة نبيّه
وحجّي بشهر عاشور برض الغاضريّه
اليوم القيامه شيعتي اتجدّد ارسومه

عاشر امحرّم عيدنا واحنا الضّحايا
وترتفع ضجّات الحجيج من السّبايا
الله يذاك اليوم تتنكّس روايا
ويحوم طير البين ذاك اليوم حومه

وداعه لمحمد بن الحنفية

ودعتك الله يا حمى الخايف يصنديد
گلّي يبوالسّجاد وين اتعيّد العيد

لاوين گاصد يا عضيدي ابهالظّعينه
غصبٍ عليّ ارجع بليّاك المدينه
وانظر ابيوتك خاليه وبنتك حزينه
اسكون المدينه من بعدكم صاير امچيد

گلّه انا ادري گلبك امن الوجد مجروح
لكن عگب حجّك يخويه سافر وروح
سكّن بواچي بنت أخوك وخفّف النّوح
والخبر عنكم من طرفنا ما هو ابعيد

چان انتصرنا يجيك مكتوب السّلامه
وچان انذبحنا لازم اترد هاليتامى
وبيني وبينك حمْرَة الدّنيا علامه
وافعل يخويه امن البواچي كل مَتريد

تلهّف على عضيده وجذب ونّه وتحسّر
وشمّه ابنحره وللثّرى خر وتعفّر
وگلّه يخويه اشهالحچي گلبي تفطّر
سلّيت روحي من جسدها ابهالمواعيد

مگدر أعاين وحشة الاوطان يحسين
ودّعتك الله انهد ركني يا ضيا العين
بالله دخبّرني يخويه الگصد لاوين
وحدي تخلّيني وتسافر بالصّناديد

عند الوداع اتناحبت ذيچ الحموله
هذا يلوج وذاك عبراته هموله
لَطفال تبچي والحريم اتحوم حوله
وزينب تنادي هالبچا والنّوح مَيفيد

گلها يزينب سفرتك تصعب عليّه
مرتاب گلبي من اطفوف الغاضريّه
وعگب الخدر خوفي يركبونچ مطيّه
وتمشين حسره اميسّره للفاجر ايزيد

لقاؤه مع عبد الله بن جعفر

هذي ظعينه ماشيه مشية سلاطين
عدهم هوادج واظن ويّاهم نساوين

هذي ظعينه ماشيه والله عجايب
كلها سويّه طالعه خيل ورچايب
مدري برض مكّه اشحلّت من مصايب
الحاج يلفي وهالرّكب لا وين ماشين

الحاج يلفي وهالظّعن لا وين خارج
ومكه تموج وبالملا حلّت صواعج
ليتك يبويه تشوف زينة هالهوادج
بيها يبويه حافّه اليوث وشياهين

كل الهوادج حافّه الشبّان بيها
تشبه اليوث الغاب بس تفتر عليها
والنّوگ كلها من الحرير ملبّسيها
چنها بنات اشراف هيأة هالخواتين

گدّامهم فارس وشعر الرّاس منشور
بيده علم يشبه علم حيدر المنصور
گايد النّاگه وينتخي والسّيف مشهور
مثل الأسد يبرى الظّعينه شمال ويمين

راياتهم كلها يبويه حيدريّه
وامّا شمايلهم بلا شك هاشميّه
وهاي الهوادج للحريم الفاطميّه
واللي على الميمون چنّه خالي حسين

واللي يسوگون الظّعن كلهم هواشم
والنّوگ هاي محمّله عليها الفواطم
وذاك البطل عبّاس والأكبر وجاسم
شبّان كلهم للحرايب مستعدّين

ومدري يسوگون الظّعن لا وين يردون
شنهو السّبب باجر الموقف ما يحجّون
واسمع الحادي والحرم كلهم يحنّون
حن ولطم صدره وهلّت دمعة العين

ساعه ولنّ الخيل وصلت والرّجاجيل
واعْلَه الاچتاف سيوفهم كلها مساليل
تلگاه يتلهّف ودمعه بخدّه يسيل
ويگول بهلك والحريم تريد لا وين

هيّجت حزني ابهالسّفر لا وين شايل
تخلّون حجكم ليش من دون الگبايل
گصدك الكوفه لوتردّون المنازل
نازع احرامك والخلگ كلهم محرمين

گله ودمع العين فوگ الخدّ منثور
حجّي بطف الغاضريّه يوم عاشور
عندي ضحايا بكربلا شبان وبدور
نغتسل من فيض الدّما ونبگه مطاعين

محمد بن الحنفية وأم البنين

والله مهل هلال عيدي يم البنين
هلال عيدي تعرفينه غرّة حسين

وانچان عندچ علم أخويه حسين بيعود
سالم ولاحد من أخواني يروح مفگود
ويرد أبو فاضل علينا صاحب الزّود
واجب علينا العيد لرجوع السّلاطين

وانچان ما عندچ خبر ظلّي حزينه
وثوب الحزن هاليوم لازم تلبسينه
خلّى محمَّد يصفج شماله ويمينه
وين الفرح والعيد واخواني بعيدين

صاحت ودمع عيونها يجري على الخد
معذور لو ساهرت ليلك يا محمّد
خلنا على باب المدينه نروح نگعد
ونسأل عن شيوخ الهواشم عيّدوا وين

حنّ وتزفّر واهملت بالدّمع عينه
ما أبرح الا واگف اببّاب المدينه
الغلمان كلمن مر عليهم يسألونه
ما شوف علم سرور لافيني عن حسين

ناسٍ يگولوا لي وصل مكّه وسالم
وناسٍ يگولوا لي عضيدك طلع هايم
وانا أحزاني زايده والدّمع ساجم
ما أسمع الاّ بدورهم حل ناعي البين

چبدي انفتت والگلب فايض من الهم
وحزني يهد أركان ثهلان ويلملم
وعندي صباح العيد مثل الليل الاظلم
بعد الأهل لا تغمضين الليل يا عين

لازم يريد العيد هيأه وزينة أحوال
وانا الا دوبي انتحب والدّمع همّال
وشلون أعيّد والأخو من منزله شال
وانحلت جسمي من نواعيها امّ البنين

حزن ابن الحنفية على وحشة الدور

محمَّد ينادي ويصفج شماله بيمينه
لاتذكرون العيد لي يهل المدينه

دوبه يجر ونّه ويصفج إيدٍ بإيد
يهل المدينه لا تهنّوني ابهالعيد
مشتغل بحزاني على فراگ الصناديد
والعيد من بعد أخوتي ويني وينه

بعد العزيز حسين ويني ووين السرور
شلون أعيّد والأخو هايم بالبرور
ومن عزوتي ظلّت خليّه وموحشه الدّور
ومجلس أخويه حسين بابه سادّينه

يحرم عليّه العيد من بعد الهواشم
أبو علي وعباس والأكبر وجاسم
نذرٍ عليّه چان عاد حسين سالم
العيد والله لانصبه من گبل حينه

وانچان عاد حسين سالم ويّا الكرام
والله لسوّي العيد واجب سبعة أيّام
واعمل الزّينه بالمدينه وانشر أعلام
يا بو علي هالعيد وين معيّدينه

شيّبت راسي يالأخو من گبل لمشيب
بعدك فلا عيشي هني ولا گلبي يطيب
وتتزايد احزاني من أنظر هالمحاريب
ظلمه ونور حسين منها فاگدينه

وينظر غراب البين ينعى بالمنازل
ويصيح من گلبٍ حزين ودمع سايل
يغراب گلّي وين اخويه حسين نازل
وبأيّ وادي عزوتي حطّوا الظّعينه

هيّجت حزني يا غراب البين بنعاك
خايف على خيّي وعضيدي يذبح هناك
ياليتني شايل ينور العين وياك
ولا چان تتركني يخويه بالمدينه

ويدخل على فاطم وهي تجذب الونّه
يگلها يبنتي بونّتچ ضلعي تحنّى
تدرين ابوچ حسين باع السّهم منّا
وخلاّني وخلاّچ يا فاطم حزينه

واهل المدينه جوا يهنّوني ابهالعيد
من حين سمعت لطمت الخدّين بالإيد
وين الفرح يا عم واهلي عنّي بعيد
العيد يا عمّي فلا يطري علينا

العيد لمّن يزهر المنزل بالحسين
أنشر بيارگ في المدينه شمال ويمين
وافرح واودّي بالبشاره لأم البنين
بعد الفرح وتعود دولتنا علينا

من هالسّفر يا عم ما ظنهم يعودون
من حيث أنا گلبي اعْلَه بويه حسين محزون
وانچان وصلوا كربلا ما ظنّتي يجون
ما نسمع إلا بعلم أبويه ذابحينه