مصائب أمير المؤمنين وشهادته

أحوال ليلة التاسع عشر

والله عجايب خارجيّه وضنوة اشرار
لكن مهرها ما جرى مثله ولا صار

بس ما نظر يمها وصد الها ابعينه
واگبل عليه ابن اللعين وباع دينه
گلها اخبريني ابمهرچ اللّي تطلبينه
لازم مرامچ تبلغينه وين ما صار

لبست حليها والحلل وارخت شعرها
واتبخترت يمه وضمّته الصدرها
اتگلّه طلبتي بالخلگ محد گدرها
انچان تگدر من علي تاخذ لي الثار

گلها دطلبي غير حيدر گالت امحال
لازم أجاهد في هلاكه وابذل المال
گصدي أشتت هَلَولاد ايمين واشمال
أفنى هلي وخلّه بگلبي تشعل النّار

اتحيّر وگلها ما سمعنا ابكل لدهور
يگطام مهرچ ما جرى مثله بلمهور
لكن لخلّي بيرگ الاسلام مكسور
ليلة تسعتعْشَر أعفّر حامي الجار

ليلة الگشره من لفت حيدر بگه ايدور
ويعاين انجوم السّما والدّمع منثور
ويگلّب الطرفه وبناته تنوح بالدّور
مستوحش العالم على حيدر الكرّار

ام كلثوم طلعت تسحب اذيال المصيبه
وتصيح يا ناصر الهادي يا حبيبه
الليله يبويه حالتك والله عجيبه
ما غمّضت عينك واشوفك عندك أفكار

گلها يبنتي العمر گوَّض والأجل حان
محّد يفر امن المگدّر والذي چان
يحفظكم الله امن التّشتت يال عدنان
صاحت يَبويه ذوّبت گلبي ابهلَخبار

يا بوي ما نگدر على هضم وفجايع
اتروح وين وتترك الإسلام ضايع
اگعد ابيتك والحسن يطلع الجامع
مكفي البلا يَمزيل حيرة كل محتار

خوفي يبو الحسنين يتنكّس لوانا
وخوفي يْتهدّم سورنا ويهتك حمانا
خوفي يغيلونك وتتشمّت عدانا
لا گاله الله من جمالك تختلي الدار

ردها وطلع والدّمع يجري فوگ خدّه
يگلها حبيبي المصطفى صادق ابوعده
وانحل يويلي ميزره واوگف يشدّه
ونادت على اخوتها ودمع العين نثّار

نادت حسن يحسين يابن الحنفيّه
عبّاس ياجعفر دگوموا بالسّويّه
دركوا أبوكم والذي عشتوا ابفيّه
ليروح غيله ياحسن يانسل الاطهار

گام الحسن من مضجعه والدّمع مسفوح
ايگلّه يبويه الليله المسجد أنا روح
گله يَبويه هالأمر مكتوب باللوح
درجع يَنور العين يا مهجة المختار

رد الحسن للدّار يصفج راحٍ ابراح
ويصيح يا وسفه على عزٍّ گضى وراح
صيوان عالي للهواشم گوّض وطاح
والكافي الله امن الدّهر ياخلگ لو جار

ضربته ووفاته

غاله الطّاغي بسجدته انشلّت يمينه
طرّت الهامه او وصْلت الجبهة الجبينه

بالفوز معلن صاح واتغرّگ امصلاّه
وحوله على ذيچ الكريمه اتفايض ادماه
ومدّة حياته بو الحسن مالفظ بالآه
يحمد الباري ويشكره ما هو بونينه

مولود بالكعبه وهذا الخبر مشهور
وعقد الزّواج محقّق اّبيته المعمور
والخاتمه بمسجد الكوفه الرّاس مطرور
ويلاه من طلعوا اولاده شايلينه

جبريل يعلن بالنّواعي ابذات لبروج
ومثل السّفينه الأرض ترجف والسّما تموج
تعلّت الضجّه وبالخلايگ ضاگت افجوج
وزينب تنادي يخوتي الكرّار وينه

عندي أبويه الليل كلّه يضرب أفكار
صلّى صلاة الليل عندي وطلع محتار
ما تخبروني اشصاير بحيدر الكرّار
گالوا يحورا انصاب بالمحراب ابونا

ليث الحرايب وصّلوه الوسط داره
و من نزف دمّه اتغيّرت شعّة انواره
شدّوا الرّاس ابميزره وزاد اصفراره
وجا بوا الطّبيب وعاينه وهملت عيونه

عاين الضّربه وگال يا شمس المضيه
حان الأجل جدِّم يبو حسين الوصيّه
وصلت دماغك ضربته نسل الدعيه
مثلك يليث الغاب من يدنى العرينه

ويلاه من بيّن فجر ليلة العشرين
وبطّل عمت عيني ونينه وفتّح العين
وقال اطلعت يا فجر يوم ونام ابوحسين
وانتحبت اولاده عن اشماله ويمينه

وليلة القدر الثّانيه غابت انواره
أوصى بليله يدفنونه وخلت داره
اتلگّاه ابو ابراهيم و الباري اختاره
وگاموا بجهازه بالبچا وضجّت بنينه

الحسن عند مصرعه وحمله إلى الدار

هالضّربة الگشره يبويه امنين حلّت
بعدك يداحي الباب شوكتنا افتلّت

هالضّربة اللّي هدّت اركان لمسلمين
هلّي فعلها راح يا باب العلم وين
من جسر يا لاهوتها الأعظم يبو حسين
بطّل ونينك يالولي گلبي تفتّت

بطّل ونينه والدّمع هل او تحدّر
صابغ ابدم الرّاس و ينادي يَشّبر
هذا الذي مكتوب لي من عالم الذّر
من عالم التّكوين هالطّبره انكتبت

آنا الذي ما هاب من خيل ولا رجال
ولا هاب من خوض المنايا وخوض لهوال
لو حوربت بالكون بيه يحل زلزال
گلبي فلا تروّع ولا الزّندين چلَّت

إسمي أنا معروف بالشدّات لصعاب
وابوك تدري ما يهمّه ابراسه اصواب
واشوف يبني طحت من ضربة المحراب
مگدر أحاچيكم ترى ادمومي انّزفت

صلّيت أنا بصفّين في حومة الميدان
وشگّيت لجّه من النّبل والبيض والزّان
ولا سطى ابهالجسد بتّارٍ ولا سنان
وطبرة الطاغي شگّت الهامه ونزلت

اصفرّت الوانه وسال دمعه وضل ينادي
لتهيّجوني بالصّوايح يا ولادي
سكتوا ترى نزف الدّما فتّت افّادي
شالوه فوگ الرّاس والضجّه ارتفعت

وزينب اتنادي هالذي محمول من وين
بالله اخبروني ياخواني حسن وحسين
گالوا لها يمخدّره سيّد الكونين
صرخت وصفگت بيدها وبالحال خرّت

حنّت ودمع العين فوگ الخد همّال
إطلعت سالم وارجعت ليّه ابهَالحال
محمول يا بوحسين فوگ اچتاف لرجال
معلوم من بعدك بني عدنان ذلت

عهده ووصاياه

ظلّت بنات المرتضى كلهم ينوحون
يگولون ابونا يا حسن متغيّر اللون

اتحرّك يَويلي المرتضى وبطّل ونينه
اتحسّر على اولاده و صد الهم بعينه
گلهم كلامي يا ولادي تسمعونه
لازم حسن وحسين من بعدي تطيعون

چنّي بشبلي الحسن فوگ التّرب نايم
بالسّم چبده مگطّعه وحوله الهواشم
والكل ذابت مهجته والدّمع ساجم
والحسن يتگلّب واخوه حسين محزون

وامّا المصيبه اللّي اتزلزل هالوطيّه
امصيبة عزيزي حسين برض الغاضريّه
چنّي أشوفه اعْله الثّرى نايم رميّه
من حوله الشبّان بالغبره يونّون

و زينب انفجعت حين سمعت هالوصيّه
وصاحت أجل يا بوي من وصّيت بيّه
بانت يحيدر أوّل الذّله عليّه
ياليت بعدك هالحراير لا يضيعون

اتحسّر يويلي صاحب النّفس العطوفه
وصد ونده زينب وعبراته ذروفه
چنّي أشوفچ حايره ابوسطة الكوفه
ويّا يتامى اعْله الهزل كلهم ينوحون

هلّت دمعها ونادته والگلب ذايب
بيّه توصي لو اتبشّرني ابمصايب
بعدك يبويه يساعد الله اعْلَه النّوايب
ياليت مَتگَضّت ايّامك يا ضِيا الكون

كلامه مع زينب

أوصيچ يا زينب ونفذي هالوصيّه
كفلي يتامى حسين برض الغاضريّه

گالت يبويه هالمصيبه اللي تجينا
من عگب عينك يا حمانا ويا ولينا
گلّي يبويه يا علي اشيجري علينا
گلها مصايب تفجع العالم سويّه

الله يما اجسادٍ على الرّمضا طريحه
وياما دمومٍ من بني هاشم سفوحه
وياما شباب اعْلَه الثّرى يعالج بروحه
وفي كربلا تبگى مضاربهم خليّه

واعظم عليّه مصيبةٍ تحني الأضلاع
ادخولچ يَزينب مجلس الطّاغي بلا اگناع
مگدر أخبّركم وهذي ساعة انزاع
صاحت يبويه امن الذي وصّيت بيّه

گلها من اخوانچ وتختارين لا باس
كلها صناديد وشفايه ترفع الرّاس
هذا الحسن وحسين ومحمّد وعبّاس
وجعفر وكلهم ما يهابون المنيّه

گالت اريد امن اخوتي اللّي يخدموني
أما الحسن وحسين تخدمهم اعيوني
اخواني كلها ابطال چان اتخيّروني
كافل أختار البطل عبّاس الشفيّه

نادى عليه ودم دمع عينه يذيعه
عبّاس هذي اختك ترى عندك وديعه
گلّه أنا أعظم من احصون المنيعه
مادام راسي سالم وسيفي بديّه

مادام راسي سالم وسالم لچ حسين
أضمن يَزينب بالمعزّه ماتذلّين
ولو طاح جسمي اعْله الثّرى لازم تعذرين
من عگب حز الرّاس لا لومٍ عليّه

حال الحوراء زينب

نزلة الكوفه يا علي گشره علينه
نطلب من الله تطيب وتردنا المدينه

گشره علينه نزلة الكوفه يبو حسين
فالك عسى فال السّلامه يا ضيا العين
گلها الحسن يختي السّلامه للأبو منين
ما تنظرين السّيف شگ غرّة جبينه

ما ظنّتي من طبرته حامي الحمى يگوم
هذا الطّبيب يگول سيف الرّجس مسموم
مگزِّر أبونا حسبته يومٍ بعد يوم
لونه تغيّر وانتحل ما تنظرينه

گالت يَعگلي نطلب امن الله السّلامه
ويگوم ابو الحسنين ويتمّم اصيامه
ونعيد ابزينه ولا انعيّد يتامى
گلها يَثكلى العيد لا تتذكّرينه

يختي يَزينب چان عيد اتعيّد الشّام
چان الخبر وصّل يصير أبرك الأيام
واحنا بعد ليله ويوم ونصبح ايتام
عند الفجر كهف الأرامل تفگدينه

صاحت عسى بعيد البلا يا گرة العين
بالموت لا تفاول على عز المسلمين
اسم الله على كهف الأرامل والمساكين
لا گاله الله يا حسن نفگد ولينه

فتح عيونه المرتضى والدّمع يجري
وگلها يزينب بالنّجف محفور گبري
گالت يبو الحسنين بعدك چيف صبري
يا بوي چيف ارجع بليّاك المدينه

تجهيزه ودفنه

مات الوصي ونهضوا اولاده يجهزّونه
موصي عليهم وسط بيته يغسّلونه

اختصّوا بتغسيل المطهّر حسن وحسين
وضافوا على امياه الثلاثه امدامع العين
يتگلّب اعلَه المغتسل ما بين لثنين
وبخمسة الأثواب أوصى يچفّنونه

امنجّي سفينة نوح حطّوه ابسريره
وشالوه حسن وحسين بدموعٍ غزيره
تتخضّع الجدران لَنواره المنيره
مرفوع لمقدّم وساروا يتبعونه

طلعت الحورا تنتحب والگلب مرتاع
بوداعة الله اتصيح يا حصني يَمنّاع
سلَّم على الهادي ومكسورة الاضلاع
ريضوا اشويّه بالنّعش يا شايلينه

وَسْفَه وألف يا حيف ياهزّاز لحصون
يمذلل الشّجعان من يتعمّر الكون
ساجد الربّك غالك الغادر الملعون
أحزن عليك المصطفى وامّي الحزينه

چيف البصر يا والد الغر الأماجيد
لو هيأوا المنبر يَبويه الخطبة العيد
من يبتسم ثغره وياهو يلبس جديد
مَتشوف غير اليصفج اشماله بيمينه

يا ياب طلاب العلم واهل الفضايل
لو گصدوا الباب العلم والكل يسايل
يَولاد حيدر وين حلاّل المشاكل
حاوي علوم المصطفى باب المدينه

ينشعب گلبي ومهجتي تتواگد ابنار
لو اسمعت لاجي يصيح يا حيدر الكرّار
لو لاحظت عيني يبويه بعدك الدّار
ومنها يسور المنع نورك فاگدينه

باچر يبويه ايصير بَرض الشّام عيدين
واحنا صباح العيد عدنا يصير حزنين
منّك نشوفه خالي المسجد يبو حسين
هاي المنابر والخطيب اليوم وينه

رثاء أبوها عند تجهيزه

شافت ابوها وبالدموع انفجرت العين
صاحت عسى بعيد البلا مسجّى يبو حسين

يا حسن شيل اعمامته وهَلجرح شدّوه
وبهداي فوگ المغتسل يحسين مدّوه
وهذا يَبعد اهلي الگطن للجرح خلّوه
بِلهون گلّب والدي وشدّ الجرح زين

ليفيض دمّه اعله الوجه يبن الشفيّه
خوفي يخويه تخضّب الشّيبه البهيّه
لو ترخصوني چان أگلبنّه بديّه
واغسل يخويه طبرته بمدامع العين

كهفٍ منيع وحصن عالي وحيف مادام
امظلّل علينا و انهدم من جور الايّام
ضاعت عگب عينه حريم وضاعت ايتام
مثله يخويه ينوجد في العالم امنين

شگّت الجيب ولطمت الهامه ولخدود
تندب يداحي الباب يا صفوة المعبود
ذوّبتني اعْله المغتسل يا بوي ممدود
معلوم من بعدك يبويه اتيتّم الدّين

رثاء زينب عند تشييعه

ريضوا بنعش المرتضى ركن العرش مال
من شال ابو الحسنين ويّاه المجد شال

ردّوا نعش حيدر إلى المنزل اشويّه
بتودّعه زينب وكلثوم الزچيّه
فراگك يبويه أعظم الفرگه عليّه
خلّه الدّمع يجري دما وبالگلب ولوال

گلها المشكّر بو الفضل عبّاس يختي
لا ينسمع صوتچ ترى گلبي شعبتي
آنا كفيلچ من بعد حيدر دسكتي
ما دام انا موجود ما ينضام لچ حال

لكن يزينب لو نزلنا الغاضريّه
عذري كفيلچ من تشوفينه رميّه
صاحت تهيجني رزيّه اعْلَه رزيّه
گلبي امفتّت لا تذكّرني ابهَلحوال

والله اشعبت گلبي ابذكرك ذاك لمصاب
واشغلت بالي عن مصيبة داحي الباب
اسم الله على زنودك وراسك يبن لطياب
ريّض يخويه ابنعش ابونا سور لعيال

ردّوا النّعش ليه وخلوني أنظره
أسفر عن اچفانه واحبنّه ابصدره
گلها وعبراته على الخدّين تجرى
هيهات يا زينب يرد عنّچ علي انشال

لَملاك شالوا امقدّمه وشلنا المؤخّر
ردّي الخدرچ وايّسي ميعود حيدر
نادت ابعالي صوتها الله واكبر
والله فجيعه ماجرت في أوّل وتال

گلها الحسن ردّي الخدرچ يامصونه
من طلعتچ يختي نسينا امصاب ابونا
لا ترفعي صوتچ ترى يصعب علينا
واحنا فلا نرضى تعاين شخصچ ارجال

لسان حالها بعد وفاته

چيف البصر مظلم علينا البيت يحسين
صاير اوحش من عگب عز الهاشميّين

وين التّلاوه و وين ذاك النّور لَزهر
يستَر گلبي لو سَمعت آبوي كبّر
واعظم عليّه صرخة الحورا يحيدر
يا بوي ضيّعت الأرامل والمساكين

يحسين راح اللّي يزيل الضّيم عنّا
يزيح الهضم عنا يخويه لو انهضمنا
أگفى الدّهر من فات داحي الباب عنّا
وراح السّرور وشِمتت اعلينا الملاعين

باچر شماته اتصير بَرض الشّام وسرور
وياما عَلَم في بيت ابو سفيان منشور
واحنا عَلَمنا يا عزيزي صبح مكسور
بس ما سمع منّه انتحب واتزفّر حسين

گلّه يخويه البيت مستوحش علينا
لنّه بحيدر نوبةٍ وحده اندهينه
ومحد فگد مثل الذي احنا فا گدينه
والا النّشيج ارتفع عند الباب بونين

شال الحسن راسه ولن زينب تنادي
والدّمع منها فوگ صحن الخد بادي
گلبي تفتّت والحشا يحسين صادي
من عاينت بيتي خلي من مظهر الدّين

بالأمس ابونا لو طلع قاصد المسجد
يسطع النّور ابغرته وظل ايتهجّد
يبتهل ويعفّر وسط محرابه الخد
واتجاوبه الحيطان لو أذّن ابو حسين

واليوم من شخصه منازلنا خليه
بيها الحزن والنّوح وامظلمه عليّه
من عگب عينه انهدم سور الهاشميّه
واحنا ابمصيبتنا وأعادينا امعيدين

ضيعتني وخلّيت گلبي اموجّر ابنار
مستوحشه الكوفه عگب عينك يَكرّار
والحسن من بعدك يبويه ظل محتار
وحسين متحيّر و بس ايدير بالعين

سؤال زينب لما رجعوا من دفنه

ودّيت يَبن المصطفى باب العِلم وين
وردّيت لينا بالكسيره ياضيا العين

والله عجب صفوة الباري وسر لوجود
والجوهر السّامي وحبل الله الممدود
بحر الكرم والجود چيف اتضّمه الحود
كهف الأرامل واليتامى والمساكين

يَولاد حيدر وين ابوكم نور لكوان
يحسين خويه يا حسن يَولاد عدنان
هالرّوس نكسوها ترى بينا الدّهر خان
وظلّت خليّه ابيوتنا من نور ابوحسين

گلها الحسن والدّمع بالخد منثور
مَيفيدنا كثر البواچي و لطم لصدور
ولا النّواعي ترجع النّايم بلگبور
هذا الذي مكتوب من عالم التّكوين

يختي دصبري والصّبر من شان لكرام
مادام انا سالم وبو فاضل الضّرغام
تركي البچا والنّوح يختي الحزن جدّام
بعدي وبعد حسين يا زينب تضيعين

داروا يعزّوها اعْله بوها وسكّتوها
ونشّفت دمعتها وإجت يم دار ابوها
وصاحت ابهم يحسين هالدّار اغلگوها
مگدر أعاينها خليّه يا مسلمين

مگدر أعاين يا ضيا العينين هالدّار
كلما نظرت الها يشب الحزن بي نار
چانت امزهره و تشع من حيدر بلنوار
واليوم ظلمه شلون اشوفنها ابْياعين

يا ياب محلى مشيتك ما بين لولاد
دوبي امريبه وخايفه امراوغ الحسّاد
اشبيدي على عزٍ رحل عنّي ولا عاد
يا خلگ يرجع غايب الأموات من وين

من شفت حالك يا علي تجذب الحسرات
تطلع وتدخل والدّموع اتفيض عبرات
هملت اعيوني وبالگلب صارت الحسبات
ظنّيت ما اتّمّم اصيامك يا حمى الدّين

زينب ودار أبيها الخالية

زينب تصب الدّمع من عظم الرزيّه
امْن اتشوف دار المرتضى منّه خليّه

توگف ابّباب الدّار واتهل عينها ادموع
اتنادي يبويه الهالمنازل مالك ارجوع
من حنّة ايتامك عليك الگلب مفجوع
ما يمكن الثّكلى تعزّيها شجيّه

واللي يفت گلبي ويخلي حزني ايزيد
يابه عگب أيّام لو گالوا لفى العيد
لازم العاده تلبس الأطفال لجديد
واولادك ابيوم الفرح تنصب عزيّه

يا بوي ضاعت من عگب عينك هلولاد
ومن بعد موتك يا علي ما نعرف أعياد
چيف الفرح واحنا بگينا مالنا اسناد
راح المحامي والذي عشنا ابفيّه

خطبة العيد اضحت تنادي واخطيبي
والمنبر ينادي انگطع منّه نصيبي
وانا أحن ولا أبطل من نحيبي
واولادك اتنوح ومدامعهم جريّه

ونادت على السّبطين حلوين المعاني
نوحوا على حامي حماكم ياخواني
من بعد حيدر وينا ووين الّتهاني
والله شماته وحصّلوها بني اميّه

فرحت بني سفيان و الطّاغي ابشامه
لمّن لفى ليه الخبر نشّر اعلامه
قر واستقر واستحمد الله اعْلَه السّلامه
يگول استرحنا من علي وضاگ المنيّه

أحوال أولاده اليتامى بعده

العيد مجبل والحزن زايد عليّه
وعاينت دار المرتضى منّه خليّه

فگد الأبو نغّص علينا ابهالسّنه العيد
وامن الصّبح باچر عليّه احزاني اتزيد
نبچي ونلطم والبچا واللطم مَيفيد
نشبت مخالبها ابحشاشتنا المنيّه

محلى الأبو في العيد لو جمّع أولاده
ولبّسهم الزّينه على جاري العاده
ورفرف عليهم بالهنا طير السّعاده
ايطيب الگلب واتصير عيشتهم هنيّه

واحنا أبونا گبل عيده ابتسعة ايّام
سافر وخلاّنا وصرنا بعده ايتام
وافراحنا راحت وصار العيد في الشّام
باچر النّاس امعيّده واحنا ابعزيّه

باچر يخوتي هالمنازل غلّگوها
خلّوا اثياب العيد أبد لا تطلّعوها
و اعلام سود اعْلَه المنازل نشّروها
ولا ريد احد من هالبلد يدخل عليّه

والله لگضّي العيد كلّه ابنوح واصياح
ولحّد يجيني من هل الكوفه بالافراح
عندي مصيبه يا خلگ عنّي الفرح راح
زادي البچا والنوح عبراتي الجريّه

والله لگضّي العيد باچر وسط لبرور
وامشي واسايل وين داحي الباب مگبور
أگعد على گبره واهلّ الدّمع منثور
وانعى على عزنا الذي عشنا ابفيّه

واتهيّج احزاني عليّه خطبة العيد
باچر تمرّ الخلگ كلها المسجد تريد
ولاشوف ويّاهم علي واحزاني اتزيد
ويذوب جسمي ولا تظل بيّه بگيّه

كنّا بالاوَّل من يمر عيدٍ علينا
نلبس اثياب الفرح وانبكّر لبونا
وهالعيد جانا وطود عزنا فاگدينا
وبعده تنكّس علم عزّ الهاشميه