يحسين ريّض!

يبكي محمّد والدمع بالخدِّ منثور

يحسين ريّض للضّعن باودّع هلبدور
 

اِينادي يخويه والدمع بالخدِّ غدران

ريض الضعن يحسين باودّع الشبّان

لاوين شايل يا بقيّة آل عدنان

يحسين من بعدك علينا موحشة الدور

اِتزفّر محمّد وانتحب واَهمل العبره

اُوضمّه ابصدر اُوحبّ راسه اُوشمّ نحره

اُونادي على اَخوانه اُوهو يجدب الحسره

دوروا على ايميني اُوعلى اِشمالي يلبدور

بحسين اُوصيكم ترى هو علّة الكون

لَيكون يا نجوم السعد والعزِّ لا يكون

لو ضاقت احلقها عن الوالي تحيدون

جولوا على الأعدا اُوحوموا حوم للصقور
 

اِتزفّر أبو فاضل اُوصب الدمع هتّان

ما يحوج توصينا يخويه يوم لطعان

لازم يجيك الخبر طيبة بالذي كان

واتقر عينك من فعلنا اُو قلبك اينور
 

واِتزفّر العرّيس عنده اُو جدب ونّه

اُو ناداه ما يحتاج توصينا يعمنَه

هذا خلف بونا اُو هذا خلف جدّنه

والكُلّ قلبه بالفدا لحسين مسرور

واِتزفّر الأكبر اُوصب الدمع همّال

اُوناداه ما يحتاج توصينا يمفضال

ما تشوف مشيتنا عن اِيمينه اُو لشمال

مثل القمر حفّت حوالي نوره اِبدور

واتواثبت اُولاد حيدر ترعد اِرعيد

اُونادوه ما يحتاج توصينا يصنديد

لا تخاف يوم الزعرعة عن عزّنا انحيد

تخسى العِدى تدناه يمحمّد يمبرور

اُو هذا الخبر عندك يبن حيدر يقيدوم

باتجى لك الأخبار باللي ايصير معلوم

مثل الصقور اِنحوم من فوق العدى حوم

بانزلزل الدّنيا اُوحتى الفلك ما يدور

ويش هالنخاوي يا محمّد ويش هلرجاف

لا يحتزنْ قلبك على اِعضيدك ولا يخاف

لو تبلغ الجيمان حدْها لا جبل قاف

ابعونة الله اِنخلي اِدماهم كما لبحور