عگب ذلة الكوفه اوكثرة الهم
لعند الشام ظعن اليسر ارزم
سرت نوگ الظعن وانووا على الشام
اوعليها الحرم تتصارخ والايتام
راس احسين يبره الظعن جدام
يعاينها او على اعياله ايتهظم
مابين الهزل تگطع بالوهاد
وگف رمح العليه راس ابو السجاد
لفه الحادي يناشد زين العباد
يگله الراس ما يرضه ايتجدم
صاح اسدر وعاين للظعينه
اخافن طفل منها امطيحينه
اشوفه اعلى الدرب شابح ابعينه
اويّه الشايله گام ايتكلم
لفوا گاموا يفگدون النساوين
وهو اعلى الرمه ليهم شابح العين
سمعوا صوت ينده يالمظعنين
تراني امن التعب جدمي تورم
يهلنه بهونكم تانوا اليتيمه
وراكم مالي حيل اگطع الهيمه
تسيب اوتگبع ابثوب الهظيمه
اثاري المن زغر سنها اتيتم
سمعتها النسه او ظلت عليها
تخمش اخدودها او تصفج بديها
بچت لمن تشافه الدهر بيها
اوعليها كل عدو گلبه تولم
بگت طول الدرب ذاكه اعلى هالحال
تون اعلى الهزل وتلوع الاطفال
اوزين اعبادها امچتف بالحبال
عليل اوبيه ماغير النفس تم
اترك تعليق