وين الفاجده الشبان .. وين الضايگه اللوعه
هاي ام جاسم العريس .. بالعريس مفجوعه
وين الفاجـــــده الشبــان .. خــل وياي تتعنه
لأم جاسم نريد نروح .. نساعــدها على الونه
ونرد الحوفة العريس .. ونجيم بحوفته حنه
ونلگه ام الشباب اتجـول
على بنها العگـل مذهـول
وتتنعه على الولد وتكول
يشمامة المن سباح .. هرش الچبد مگطوعه
لگينه ام الشباب اتجول .. وگمنه نجول وياها
ام وفاجــــده اعله النــوح .. مايحتاج ننخاها
اولگينه شمعة العـريس .. مطفيه او علگناها
وشــدينه الطم والنـــوح
ابحرگه والگلب مجــروح
ومن شفنه الولد مطروح
شفنه جثه العريس .. أسهام ونبل مزروعه
بين اللطـــــم والصـايح .. وبين الدمـعـه والحسره
اجتهن عمة العــريس .. زينب شـــــابچه العشره
ولگت شمع العرس داوي .. وصاحت لاچن ابعبره
شنهي الشــمـع وي البين
احنه وعرس جاسم وين
لايسمع اخــــوي احسين
ومن يسمع يجي بهمه .. ويطفي الشمع بدموعه
بالله الشمع طفنّه .. نريد اعله الولد نلطم
انه عمته وامــه .. وهـــــاي اموجله وتهم
للطف جيت ماظنيت .. اليه البين متـولم
وثبت بالدلـيــل اســهــام
وهد حيلي بعرس جسام
آيا بـــــدر ســعــدي التام
راح وصورته ضلت .. وسط احشاي مطبوعه
من ايدي بن اخـويه راح .. راح الچــان الي ونسه
حسبت احساب ظني خاب .. عمته وتفرح بعرسه
راح العرس من جسام .. وضلت حــســرته بنفسه
ويا حسرة بني هــاشم
المفجوعه بعرس جاسم
مبــارك عــالــثــره نـايم
وعمك يبن اخوي عليك .. نار وسرت بضلوعه
يومك يبن اخوي يوم .. هد حيلي ولوه جيدي
وامــك بالخيام تصيح .. راح الــولــد من ايدي
اريــدن موتتي ويـــــاك .. ياعـــــريس يوليدي
يجاسم شوف حال امك
تــلــوج وجــاعــده يمك
تخضـب راسها بــدمــك
حگها ام الولد عنها .. حچاية العتب مرفوعه
هاي امك يجاسم هــاي .. بيك الدهر دوهنها
سهرت ربت اوتعبت .. وخاب من الربه ضنها
تصيح ارباي اريد ارباي .. گلي اشتعتذر منها
تصيح ارباي اريد ارباي
منـك يا ضـــــوه عيناي
يجاسم مو مروّه هـــاي
تروح وضلت اعله امك .. دواهي الحزن مجموعه
اترك تعليق