لاچن عرّضوا للراچب اثنين
من مكه اطلعوا من بعد الحسين
وگفو ناشدوا عن جيته امنين
جاوبهم امن الكوفه اواكظم
گالوله اشلون الناس بيها
اوياهو اليامر اوينها عليها
گاللهم لفه ابن زياد ليها
اوكتل هاني بن عروه اوكتل مسلم
اومسلم گاموا ايسحبون جثته
اوهاني اوياه يسفح دم رگبته
هذا اللي ابعيني اهناك شفته
اومن بعدي اشصار الله يعلم
بچو حين اسمعوه اوصار همهم
لبو السجاد يصلون ابعلمهم
حته لو يخبروه اوسمعهم
يرد الظعن ومن الچتل يسلم
وصلو ليه اوصاحو يبو اليمه
لفينه ابخبر نحچي لو ننظمه
تفكر لخوته اولولاد عمه
گلهم ماعليهم خبر ينظم
گالوله اودمعهم گام يهمل
شفت الراچب اللي چان مجبل
نشدناه اوخبرنا ابمسلم اچتل
وابن ازياد بالكوفه ايتحكم
سچب دمعه اوصاح اوجذب ونه
وسافه اعليم ياراعي المحنه
صارت من اخوته اعليه حنه
والنسوان عجب بالمخيم
غدت تلطم حميده اعليه وتنوح
اوتنون مثل الحمام اليون بالدوح
وسافه تنچتل مظلوم وتروح
يبويه اومن زغر سني اتيتم
سمع ونها الحسين وحن عليها
اوغده ينادي يازينب سكتيها
يخويه گطعت گلبي بحچيها
يتيمه واليتم عالطفل يزحم
صفگ ايد اعلى ايد وصاح هضمه
مسلم ينچتل ويروح دمه
عاين لخوته اولولاد عمه
اوگام احسين وياها ايتكلم
التفت لولاد عمه اول بعينه
اوگاللهم خذت منكم العينه
گوموا اوردوا لديار المدينه
كفاكم چتل مسلم يا بني العم
انتخوا حين اسمعوه وگاموا الكل
سلّو بيضهم والدمع يهمل
اشلون انرد يعزنا و مسلم اچتل
اوچتاله ابهوا يبگه ايتنعم
لا واللي طبر مرحب وابن ود
عن الوجه ما نترك ولا نرد
نريد الثار خاف الثار يبعد
يبو السجاد بينه الهظم وسم
بعد هيهات نسدر للمدينه
اويذهب ثار مسلمنه امن ادينه
يبو اليمه اشتگول الناس بينه
اوتدري الناس تنگل مدح يو ذم
رد عاين لخوته اوصاح يكرام
انعكس امري اوصار الخطر جدام
مني ماعليكم حرج وذمام
اليريد يروح خل يرشد اويسلم
من سمعوه گاموا ليه اخوته
لاچنهم ابكثر الهظم موته
نرد والثار أبو طاهر نفوته
لا واللي هوه ابسيف ابن ملجم
يبو السجاد عنك نرد لاوين
حته انعيش بعدك ياضوه العين
انته الروح واحنه الجسم يحسين
اوريت الجسم عگب الروح يعدم
گوم ارشد ابنيتك وين ماتريز
يبو السجاد واگطع درب البعيد
لاحوا على الخيل ونحروا البيد
لاچن بالگلوب النار تضرم
اترك تعليق