شبل احسين سدّر للمخيم
او جبده امن العطش بورح اوفحم
سدر متنومس ابحرب الصناديد
لبوه احسين منها الجايزه ايريد
يصيح ابصوت يحسين الضمه ايچيد
تراني امن العطش چبدي تولم
يبويه ذاب من العطش گلبي
او بعد هيهات يسعدني اعلى حربي
يبويه امن العطش ما شوف دربي
او بياض الكون كله ابعيني اظلم
يبويه اليوم من عندك طلبتي
اريدن شربة اميه الچبدي
يبويه ميت الف واكثر گلبتي
اردها اشلون وآنه الريج علگم
يگله او دمعته اعلى الخد سچيبه
يبويه الماي گلي امنين اجيبه
علي هوّن امصابك كل مصيبه
او همك بالگلب زاد اعلى كل هم
يبويه روح شوف الطفل باي حال
يلوع امن العطش وتلوج العيال
يبويه اليوم لو گلبي امن الجبال
او عليه هاي النوايب چا تهدم
يبويه اصبر اورد الحربك اردود
او عليهم شد يالاكبر شدة العود
عليك اليوم جدك لابد ايجود
ابچاس الورد وبشربه اتنعم
يويلي من سمع عذر ابو اليمه
تراكم فوگ هم العطش همه
جذب ونه او غده ايودعه او يشمه
اوعليه احسين دمعه انحدر واسجم
اترك تعليق