ظل نايم او مهره ايجول يمه
يلم صرعه او يحشم ببو اليمه
عرف ما بيه بعد للرچب همه
صهل واعول او انوه اعلى المخيم
طلعت زينب اوطلعت العيله
مهر احسين من سمعن صهيله
مرج لنه اودمع عينه يسيله
او بسنونه لعد الصرع فصّم
صرخت زينب او صاحت يمكدر
وين احسين من ظهرك تگنطر
اسمع بالمعياره اصياح گبر
عليمن فزع هذا الجيش والتم
يمهر احسين گلي احسين وينه
اخذنه اوياك ودينه الولينه
هاي الخيل ساعه ولفت لينه
نريده ايگوم وبردها ايتوزم
يمهر احسين اخذنه اوللوي روح
نشوفه ابيا كتر نايم اومطروح
نريد انعالجه اونلحگ على الروح
گبل ما يلحگ اعليها المحتم
وگفت زينب اعلى التل تنادي
وين اوگعت يا سلوة الهادي
يخويه غارت اعلينه العوادي
او رحلك بين عدوانك تجسم
يخويه الخيل اجت للخيم صمصوم
تريد اتسلب اخوانك يمظلوم
يخويه انچانك حي للحرم گوم
گبل متصير للعدوان مغنم
سمع زينب تحشم بيه وتصيح
وهو ايعالج ابروحه اودمه ايسيح
گام ايگوم نوبه اونوبه ايطيح
سبب غير النفس بحسين ماتم
گام يصيح يجلاف آل اميه
وين الشيم راحت والحميه
خلو الحرم وآنه اتعنو ليه
اكتلوني او خلوا الحرم تسلم
آنه الچنت احاربكم بالاكوان
او گبلتكم لعد امطالگ الزان
عيب الزلم تتگرب النسوان
او من شان العرب للحرم ترحم
سمعوا ما يريد احسين وشگال
گالو خل نردله او خلوا العيال
داروا بيه سبعين الف خيال
او عليك ذاك الجمع كله تچوم
زينب موچبه او للعكسر اتشوف
لخوها اتواردوا برماح وسيوف
تعنت للمعاره ابگلب ملهوف
تگوم اوتوگع اوعالراس تلطم
هوت فوگه تصيح ابصوت يحسين
عليك امك يخويه ديرلي العين
ون اوصاح يازينب اشتردين
كسرتي الگلب مني اوزدتي الهم
ردي ابخيمتچ لمي اطفالي
اوعگب عيناي عينچ على اعيالي
يخويه الشمر هالموچب اگبالي
دشوفيه اعلى چتلي اشلون مهتم
گامت للشمر زينب تگله
لعد هاي اليتامه احسين خله
يظالم من تذبحه اشتگل لله
اويصير اهناك خصمك جده الاعظم
يخايب شوف اصاويب البسدره
تسع ميه والف طعنه او طبره
غير اللي تعده الخرز ظهره
شبة فوگ او لعند الخرز فصم
اترك تعليق